نۇر-سۇلتان قالاسىنىڭ اكىمى التاي كولگىنوۆ ازاماتتاردى ونلاين قابىلدادى. مۇنداي قابىلداۋدا ازاماتتاردىڭ قوزعايتىن ماسەلەلەرىنىڭ ءبىرى – باسپانا الۋ.
«ازاماتتاردى جەكە قابىلداۋ بارىسىندا تاعى 10 ادامنىڭ پروبلەماسى قوزعالدى. وسىعان دەيىن ايتقانىمداي, نەگىزگى پروبلەمالاردىڭ ءبىرى – تۇرعىن ءۇي. مەملەكەت باسشىسىنىڭ تاپسىرماسى بويىنشا جەڭىلدەتىلگەن قولجەتىمدى تۇرعىن ءۇي سالۋ كولەمىن ۇلعايتۋ بويىنشا جۇيەلى جۇمىس جۇرگىزىپ جاتىرمىز. ەلوردادا 14 قازاننان باستاپ جاستارعا ارنالعان «Elorda Jastary» ارنايى تۇرعىن ءۇي باعدارلاماسىنا قاتىسۋ ءۇشىن قۇجاتتار قابىلداۋ باستالدى. بۇل تۇرعىن ءۇي باعدارلاماسى جاستارمەن بىرلەسە ازىرلەگەن 2021-2023 جىلدارعا ارنالعان «Elorda Jastary» اۋقىمدى باعدارلاماسىنا كىرەدى. «Elorda Jastary» باعدارلاماسىندا ءبىلىم بەرۋ, جۇمىسپەن قامتۋ, بوس ۋاقىتتى وتكىزۋ جانە ت. ب. باعىتتار بار» دەپ ءتۇسىندىردى قالا باسشىسى.
جاستارعا ارنالعان «Elorda Jastary» تۇرعىن ءۇي باعدارلاماسىنا 35 جاسقا دەيىنگى (35 جاستى قوسا العاندا, ايەلىنىڭ/كۇيەۋىنىڭ جاسى ماڭىزدى ەمەس) جاستار قاتىسا الادى. بۇل باعدارلاماعا قاتىسۋشىلار تۇرعىن ءۇي ساتىپ الۋ ءۇشىن 18 ملن تەڭگەگە دەيىن قارىز الا الادى (جىلدىق 5% جەڭىلدىكپەن). قاجەتتى قوسىمشا اقپاراتتىڭ ءبارى تۇرعىن ءۇي قورىنىڭ سايتىندا جاريالاندى (zhilfond.kz).
«ازاماتتاردى قابىلداۋ كەزىندە تۇسەتىن سۇراقتار قىسقامەرزىمدى, ورتامەرزىمدى جانە ۇزاقمەرزىمدى بولىپ بولىنەدى. مىسالى, جۇيەلى ماسەلەلەر بويىنشا شەشىمدەر دە قابىلداندى: وڭالتۋ ورتالىقتارىنىڭ جەلىسى ەداۋىر كەڭەيتىلدى, ەلدى مەكەندەردە بىرقاتار مەكتەپ سالىندى, سونداي-اق كەلەسى جىلى تۇرعىن ءۇي الاپتارىندا تاعى 4 مەكتەپ سالۋ جوسپارلانىپ وتىر, تۇرعىن ءۇي سەرتيفيكاتىنىڭ سوماسى ۇلعايتىلدى, قاتىسۋشىلار ساناتى كەڭەيتىلدى جانە تاعى باسقالار» دەپ ءمالىم ەتتى ا.كولگىنوۆ.
