پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا ەلدەگى سانيتارلىق-ەپيدەميولوگيالىق جاعداي قارالدى.
دەنساۋلىق ساقتاۋ ءمينيسترى الەكسەي تسوي قازاقستانداعى سانيتارلىق-ەپيدەميولوگيالىق جاعداي تۇراقتى ەكەنىن ايتتى. بارلىق وڭىرلەردە اۋرۋ دەڭگەيى, اۋىر جاعدايداعىلار مەن ستاتسيونارلىق جانە امبۋلاتورلىق ەم الىپ جاتقاندار سانى ايتارلىقتاي تومەندەدى. ۆيرۋستىڭ رەپرودۋكتيۆتىلىك يندەكسى – 0,97. ينفەكتسيالىق توسەك-ورىندار جۇكتەمەسى – 34%, رەانيماتسيالىق توسەك-ورىندار جۇكتەمەسى – 29%.
بۇگىنگە دەيىن ىندەتكە قارسى ۆاكتسينانىڭ ءبىرىنشى كومپونەنتىن 8 ملن-نان استام ادام, ەكىنشى كومپونەنتىن 7,2 ملن-عا جۋىق ادام الدى. ۇجىمدىق يممۋنيتەتتىڭ 60%-ىنا قول جەتكىزۋ مىندەتى قويىلدى. COVID-19-دىڭ تارالۋ قارقىنى بويىنشا «جاسىل» ايماقتا – شىمكەنت قالاسى, اقتوبە, تۇركىستان, جامبىل, ماڭعىستاۋ جانە قىزىلوردا وبلىستارى, «سارى» ايماقتا اتىراۋ, الماتى, قاراعاندى, باتىس قازاقستان جانە شىعىس قازاقستان وبلىستارى ورنالاسقان. «قىزىل» ايماقتا الماتى جانە نۇر-سۇلتان قالالارى, اقمولا, قوستاناي, پاۆلودار جانە سولتۇستىك قازاقستان وبلىستارى قالىپ وتىر. قازاقستاندا تۇماۋعا قارسى ەگۋ ناۋقانى جالعاسۋدا. قازىرگى ۋاقىتتا 1,4 ملن قازاقستاندىق تۇماۋعا قارسى ەكپە سالدىردى. ۇكىمەت باسشىسى ىندەت پەن تۇماۋعا قارسى ەگۋ ناۋقانىن جالعاستىرۋدى تاپسىردى.
