تۇرىكتەردەن ءتالىم الدى
ەلباسىنىڭ «قازاقستان جولى 2050: ءبىر ماقسات, ءبىر مۇددە, ءبىر بولاشاق» اتتى حالىققا ارناعان ءداستۇرلى جولداۋى ەل دامۋىنىڭ جاڭا مىندەتتەرىن ايقىنداپ بەردى. پرەزيدەنت سىبايلاس جەمقورلىققا قارسى جاڭا ستراتەگيانى قالىپتاستىرۋ جانە ونى ىسكە اسىرۋدى جالعاستىرۋدىڭ قاجەتتىگىنە توقتالدى.
وزدەرىڭىزگە بەلگىلى, قارجى پوليتسياسى اكادەمياسى 1999 جىلدان باستاپ قارجى پوليتسياسى جانە كەدەن ورگاندارىنا ارناۋلى ماماندار دايارلايدى.
سىبايلاس جەمقورلىققا قارسى جاڭا ستراتەگيانى قالىپتاستىرۋ جانە ونى ىسكە اسىرۋ ماقساتىندا اكادەميا بىرقاتار شارالاردى جۇزەگە اسىرۋدا. ماسەلەن, تاياۋدا ەلورداعا تۇركيا ۇلتتىق پوليتسياسى باس شتابىنىڭ قىزمەتكەرلەرى كەلدى. باس شتابتىڭ زاڭسىز تابىستارعا قارسى كۇرەس باسقارماسى باستىعىنىڭ ورىنباسارى سەيفۋللا بۋدجاك پەن ءبولىم باستىعى وگۋزجان مۋتلۋ جەدەل قىزمەتكەرلەردىڭ بىلىكتىلىگىن ارتتىرۋ كۋرستارىنا قاتىستى. «زاڭسىز جولمەن الىنعان پايدانى جانە ونىڭ ءىزىن جاسىرۋدى تەكسەرۋ» تاقىرىبىندا لەكتسيا ۇيىمداستىرىلىپ, ترەنينگتەر وتكىزىلدى.
شارا بارىسىندا جالعان پلاستيكالىق كارتالاردى جاساۋ ءتاسىلدەرى, زاڭسىز جولمەن الىنعان تابىستى ايقىنداۋ, تاۋەكەلدىلىكتى تالداۋ, اقشانى جىلىستاتۋدى زاڭداستىرۋ ءادىستەرى, مەملەكەتتىك ساتىپ الۋ سالاسىنداعى سىبايلاس جەمقورلىق قىلمىستاردى اشۋ جولدارى قاراستىرىلدى.
وسى ءبىلىم ورداسىندا سونداي-اق, «قازاقستان رەسپۋبليكاسىنىڭ ۆەدومستۆولىق جوعارى وقۋ ورىندارىندا زاماناۋي كاسىبي ءبىلىم بەرۋدىڭ وزەكتى ماسەلەلەرى مەن دامۋ بولاشاعى» تالقىعا ءتۇستى. وقۋ ۇدەرىسىن جەتىلدىرۋ ماقساتىندا قولعا الىنعان بىلىكتىلىكتى ارتتىرۋ كۋرستارىنا پروفەسسورلىق-وقىتۋشىلىق قۇرام قاتىستى. باسقوسۋدا ءبىلىم بەرۋدىڭ عىلىمي-ۇيىمداستىرۋشىلىق ماسەلەلەرى, تاربيە جۇمىستارىن جەتىلدىرۋ, زاڭ ءبىلىمىن زاماناۋي كەزەڭىندە مودەرنيزاتسيالاۋ ماسەلەلەرى كوتەرىلدى.
ايگەرىم ابجاتوۆا,
قارجى پوليتسياسى اكادەمياسىنىڭ باس مامانى