تۇتىنۋشىلار قۇقى ءتۇسىندىرىلدى
كەشە استانا قالاسىنىڭ «ارتەم», «شارىن» قاتارلى ساۋدا ورتالىقتارى مەن بازار اۋماقتارىندا «ءاربىر تۇتىنۋشىعا – قاۋىپسىز ازىق-تۇلىك» اكتسياسى وتكىزىلدى.
اكتسيانىڭ ماقساتى – تۇتىنۋشىلاردى قاۋىپسىز ازىق-تۇلىكپەن قامتاماسىز ەتۋ, ولاردىڭ قۇقىقتارىن قورعاۋ ادىستەرىن ءتۇسىندىرۋ جانە قۇقىقتىق ساۋاتتىلىقتارىن ارتتىرۋ.
اكتسيا بارىسىندا استانا قالاسى تۇتىنۋشىلاردىڭ قۇقىقتارىن قورعاۋ دەپارتامەنتىنىڭ ماماندارى مەن «ادىلەت» تۇتىنۋشىلاردىڭ قۇقىقتارىن قورعاۋ قوعامدىق بىرلەستىگى تۇتىنۋشىلارعا ءتۇرلى كەڭەستەر بەردى.
ساتىپ الۋشىلار ازىق-تۇلىكتەردىڭ ساپاسىن جانە قاۋىپسىزدىگىن سول جەردە انىقتاي الدى. سونىمەن قاتار سانيتاريالىق-ەپيدەميولوگيالىق ساراپتاما ورتالىعى كوكونىستەردەگى نيتراتتىڭ قالدىعىنا, ازىق-تۇلىكتىڭ ميكروبتىق لاستانۋىنا, بالدىڭ تابيعيلىعىنا جانە ءسۇت ونىمدەرىنىڭ قىشقىلدىعىنا تەگىن زەرتحانالىق زەرتتەۋلەر جۇرگىزدى.
اكتسيا جەمىس-جيدەك پەن باقشا ونىمدەرىن ساتۋ مەرزىمىنە بايلانىستى ۇنەمى وتكىزىلىپ تۇرادى.شاعىن جانە ورتا كاسىپكەرلىك سۋبەكتىلەردى تەكسەرۋگە تىيىم سالىنۋىنا بايلانىستى وسىنداي اكتسيالاردى وتكىزۋ كەزىندە قالادا ساتىلاتىن ازىق-تۇلىكتەردىڭ ناقتى نۇسقاسىن كورسەتۋگە قول جەتكىزىلەدى جانە تۇتىنۋشىلاردىڭ بەلسەندىلىگى قاجەت ەكەندىگى انىقتالادى.
جۇما قازيەۆ