ەلىمىزدە «اۆتوبۋس» جەدەل-الدىن الۋ ءىس-شاراسى باستالدى. وسىعان وراي استانا قالاسى ىشكى ىستەر دەپارتامەنتى باسشىلارى ارناۋلى بريفينگ وتكىزدى. جيىنعا قاتىسقان ءىىد اكىمشىلىك پوليتسيا باسقارما بولىمشەسىنىڭ باستىعى نۇرجان ءادىلوۆ پەن ونىڭ ورىنباسارى نۇرلان ۋۆاەۆ جولاۋشىلار كولىگىنىڭ كەسىرىنەن ورىن الاتىن جول-كولىك وقيعاسى تۋرالى باياندادى.
ماسەلەن, بيىل بەس اي ىشىندە قوعامدىق كولىك جۇرگىزۋشىلەرى اراسىندا 700 رەت جول ءجۇرۋ ەرەجەسى بۇزىلعان. تەحنيكالىق اقاۋى بار اۆتوبۋستاردى جولعا شىعارعانى ءۇشىن 24 لاۋازىمدى تۇلعا اكىمشىلىك جاۋاپكەرشىلىككە تارتىلدى. نۇرلان ۋۆاەۆتىڭ ايتۋىنشا, جەدەل الدىن الۋ شاراسى كەزىندە تەحنيكالىق جاي-كۇيى, كونسترۋكتسياسى جول قوزعالىسى قاۋىپسىزدىگىنىڭ بەلگىلەنگەن تالاپتارىنا سايكەس كەلمەيتىن جانە زاڭ تالابىن ساقتامايتىن اۆتوبۋستار مەن جەڭىل كولىكتەردى ءارى قاراي پايدالانۋعا تىيىم سالىپ, ارناۋلى جازا قولدانىلادى. سونداي-اق, ەكىنشى رەت ءتارتىپ بۇزعان اۆتوبۋس جۇرگىزۋشىلەرى قايتادان ءبىلىمىن تەكسەرۋگە جىبەرىلەدى. ەگەر ەكى ايدىڭ ىشىندە ەمتيحاندى تاپسىرا الماسا «جول قوزعالىسى تۋرالى» زاڭعا سايكەس كولىك جۇرگىزۋ قۇقىن توقتاتۋ تۋرالى شەشىم قابىلداۋ ءۇشىن سوتقا جولدانادى.
بريفينگتەن سوڭ جۋرناليستەر رەيدكە شىقتى. ولار قاراعاندى تاس جولى باعىتىنداعى «قىزىلجار» بەكەتىندە بولىپ, جول-پاترۋلدىك پوليتسيا جاساقتارىنىڭ جۇمىسىن باقىلادى.
قوعامدىق كولىكتەردىڭ سوڭعى توقتايتىن ايالداماسىنىڭ ءبىرى – تەمىرجول ۆوكزالى. جول تەحنيكالىق ينسپەكتسيا ءبولىمىنىڭ ينسپەكتورى داستان دارمۋرزين وسى اۆتوبۋس تۇراعىندا ەرەجە بۇزعان №21, 40 قوعامدىق كولىك جۇرگىزۋشىلەرىن توقتاتتى. ينسپەكتوردىڭ ايتۋىنشا №21 اۆتوبۋستىڭ ىشىندەگى جارىق شامدارى ىستەن شىققان. جانە جاياۋ جۇرگىنشىلەردىڭ جولىنا تىم جاقىن توقتاعان كورىنەدى. ال جۇرگىزۋشى جول جيەگىندە تۇرعان كولىكتەردىڭ كەسىرىنەن اۆتوبۋستارعا توقتايتىن ورىن جوق دەپ بايبالام سالدى. مۇنىڭ بارىنە اۆتوبۋس پاركى كىنالى ەكەندىگىن العا تارتتى. ينسپەكتور جول ەرەجەسىن بۇزعانى ءۇشىن اۆتوبۋس جۇرگىزۋشىسىنىڭ كولىك جۇرگىزۋ قۇقىعىن راستايتىن قۇجاتىن الىپ قويدى. ەندى ول 5 اەك كولەمىندە ايىپپۇل تولەيدى. بۇل 9260 تەڭگەنى قۇرايدى.
رەيد بارىسىندا №40 اۆتوبۋستىڭ جۇرگىزۋشىسىنە 5 اەك, اۆتوبۋس پاركىنىڭ مەحانيگىنە 20 اەك كولەمىندە ايىپپۇل سالىندى. سەبەبى, اۆتوبۋستىڭ الدىڭعى تەرەزەسى سىنعان, ىشىندە جارىق شامدارى ىستەمەيدى. وسىلايشا, پوليتسيا قىزمەتكەرلەرى زاڭ بۇزعانداردىڭ جازاسىن بەرىپ, قۇقىق بۇزۋشىلىقتىڭ سوڭى نەگە دۋشار قىلاتىنىن تاعى ءبىر مارتە ەسكەرتتى.
ايگۇل وزەكوۆا, ستۋدەنت
