استانا قالاسى پوليتسيا دەپارتامەنتىنىڭ جەرگىلىكتى پوليتسيا باسقارماسى قىزمەتكەرلەرى ۇستىمىزدەگى جىلدىڭ 5 قىركۇيەگى مەن 5 جەلتوقسانى ارالىعىندا «ۋچاسكە» جەدەل الدىن الۋ ءىس-شاراسى جۇرگىزىلىپ جاتقانى بەلگىلى.
وسىعان وراي, جاقىندا استانا قالاسى ەسىل اۋدانى ىشكى ىستەر باسقارماسىنىڭ ۋچاسكەلىك ينسپەكتورلارى – پوليتسيا مايورى ازامات وسپان, پوليتسيا لەيتەنانتتارى رۋسلان ءىلياسوۆ پەن ەرجان قالمۇراتوۆ قالاداعى كەيبىر بۇقارالىق اقپارات قۇرالدارى وكىلدەرىنىڭ قاتىسۋىمەن ءوز اۋدانىندا ارنايى رەيد وتكىزدى.
بۇل رەيدتىڭ نەگىزگى ماقساتى قۇقىق بۇزۋشىلىق پەن قىلمىستىڭ الدىن الۋ, قوعامدىق ءتارتىپ پەن قوعامدىق قاۋىپسىزدىكتى قامتاماسىز ەتۋ, قوعامدىق ءتارتىپ بۇزعان تۇلعالاردى ەسەپكە قويۋ جانە ولاردى دەر كەزىندە انىقتاۋ, سونىمەن قاتار اكىمشىلىك ۋچاسكەلەر مەن باسقا جەرلەردە قىزمەت كورسەتەتىن كوشى-قون ۇدەرىسىنىڭ جاعدايىن باقىلاۋ بولدى.
رەيد كەزىندە ءار ۋچاسكەلىك پوليتسيا قىزمەتكەرى وزىنە بەكىتىلگەن اۋماقتا تۇرعىندارمەن كەزدەسىپ, ولاردىڭ ارىز-شاعىمدارىن تىڭدادى. سونداي-اق, پاتەر ۇرلىعى, باعالى زاتتاردى اۆتوكولىكتىڭ ىشىندە قالدىرىپ كەتپەۋ ءارى وسىعان بايلانىستى قانداي قاۋىپسىزدىك شارالارىن قولدانۋ كەرەكتىگى تۋرالى جادىنامالار تاراتىپ, ۇيلەردىڭ كىرەبەرىسىندەگى حابارلاندىرۋ تاقتالارىنا ءىلدى.
قورعالجىن تاسجولى داڭعىلى بويىنداعى №23 ءۇيگە كەلگەنىمىزدە, №126 پاتەردىڭ قوڭىراۋىن باسقان پوليتسيا لەيتەنانتى ەرجان قالمۇراتوۆقا ەسىكتى ەگدە ايەل اشتى. ءمان-جايدى تۇسىنگەننەن كەيىن «ەسكەرتۋلەرىڭىز دۇرىس. ءبىز ءوزىمىزدىڭ ۋچاسكەلىك ينسپەكتورىمىزدى جاقسى تانيمىز. بىزگە ءجيى كەلىپ, وسىنداي جادىنامالار ءىلىپ, ءوزىن تۇرعىندارمەن تانىستىرىپ تۇرادى» دەدى.
كەلەسى №133 پاتەردىڭ يەسى – ايەل ادام ەكى-ءۇش پوليتسيا قىزمەتكەرى مەن قولىنا بەينەكامەرا ۇستاعان وپەراتوردى كورگەندە ءبىراز ابدىراپ قالدى. «قانداي ماسەلەمەن كەلدىڭىزدەر؟ ءبىزدىڭ ۇيدە تەك ءوز وتباسىمىز عانا تۇرامىز. زاڭسىز تىركەلمەي تۇرىپ جاتقان ارتىق ادام جوق» دەپ ءوزىنىڭ وسى ءۇيدىڭ يەسى ەكەنىن ايتا باستاپ ەدى, پوليتسيا مايورى ازامات وسپان توپتىڭ كەلۋ ماقساتىمەن جان-جاقتى تۇسىندىرگەننەن كەيىن اتى-ءجونىن ايتىپ, اشىلا سويلەپ كەتتى. ونىڭ ايتۋىنشا, كورشىلەرىنىڭ بارلىعى دا ارتىق-اۋىس ءسوزى جوق قاراپايىم ادامدار كورىنەدى. قاي-قايسى دا تارتىپكە باعىنادى. وسى ۇيدە تۇرعانىنا ون جىلعا جاقىنداپتى, بىردە-بىرەۋىنىڭ قوقىس تاستاعانىن, نە بولماسا تۇندە داۋرىعىپ سويلەگەنىن ەستىمەپتى.
شىنىندا دا, كوپ قاباتتى ۇيلەردە تۇرعىندار كوبىنە كورشىلەرىنىڭ مازاسىزدىعىنا, تازالىق ساقتامايتىندىعىنا شاعىمدانىپ جاتادى. ال رەيد جۇرگىزىلگەن ون ەكى قاباتتى №23 ءۇيدىڭ تۇرعىنىنىڭ ەشبىرەۋى دە ونداي ماسەلەنى ءسوز ەتكەن جوق. تەك اۋلاداعى بەينەكامەرالاردىڭ ساپاسىن جاقسارتىپ, تۇرعىنداردىڭ قىراعى بولۋىن قالايتىندىقتارىن جەتكىزدى.
«كەيدە اۋلادا, ۇيگە كىرەبەرىس باسپالداق الاڭدارىندا ءجۇرىس-تۇرىسى كۇدىك تۋدىراتىن بوگدە ادامدار جۇرەدى. سونداي كەزدە پوليتسياعا تەلەفون سوققاندا ولار تەز جاۋاپ بەرىپ, شۇعىل كەلسە وڭدى بولار ەدى» دەدى سالتانات ەسىمدى تۇرعىن.
بۇدان كەيىن رەيد جۇمىسى اقمەشىت كوشەسىندەگى №9, №11 ۇيلەردە جالعاستى. مۇندا دا تۇرعىندار وزدەرىنىڭ ۋچاسكەلىك ينسپەكتورىنا ەسىك اشىپ, سەنىم بىلدىرەتىندىكتەرىن انىق بايقاتىپ جاتتى.
– ءبىزدىڭ نەگىزگى ماقساتىمىز دا تۇرعىندارمەن اراداعى سەنىمدى نىعايتۋ, – دەيدى ەسىل اۋدانى №13 پوليتسيا بولىمشەسىنىڭ ۋچاسكەلىك ينسپەكتورى رۋسلان ءىلياسوۆ. – ءوز اۋماعىمىزدا جەدەل جاعدايدى تۇراقتاندىرۋ, قىزمەت كورسەتەتىن اكىمشىلىك ۋچاسكەلەردە قۇقىق بۇزۋشىلىقتىڭ الدىن الۋ جۇمىسىن جانداندىرۋ, حالىق اراسىندا ۋچاسكەلىك پوليتسيا ينسپەكتورلارىنىڭ جانە جالپى ىشكى ىستەر ورگاندارىنىڭ ءيميدجى مەن بەدەلىن ارتتىرۋ, ازاماتتارمەن تىعىز قارىم-قاتىناس ورناتۋ – بۇگىنگى كۇنى بىزگە قويىلىپ وتىرعان باستى تالاپتار.
تەك رەيد كەزىندە قانا ەمەس, كوپ قاباتتى ۇيلەردىڭ ءاربىر پاتەرىن, اۋلالاردى, جەكە ۇيلەردى كۇندەلىكتى ارالاپ, وندا تۇرىپ جاتقان ادامدار جايلى اقپارات ءبىلىپ وتىرامىز. بۇعان قوسا, پاتەرلەر مەن ۇيلەردى, اكىمشىلىك ۋچاسكەلەردى تەكسەرىپ, تۇرعىندار تۋرالى مالىمەتتەردى اكىمشىلىك ۋچاسكەنىڭ تىركەۋ جۋرنالىنا ەنگىزەمىز.
سونىڭ ناتيجەسىندە ۋچاسكەلىك ينسپەكتورلارعا دەگەن حالىقتىڭ سەنىمى ارتىپ كەلەدى. ءۇيدىڭ كىرەبەرىسىنە قوقىس تاستاعان نەمەسە ارنايى بەلگىلەنبەگەن جەرگە تەمەكى تارتقان ادامدار بولسا نەمەسە باسقا دا كەلەڭسىز جايلار مەن سەزىكتى وقيعالاردى بايقاسا, تومەندە حابارلاندىرۋ تاقتاسىندا ءىلىنىپ تۇرعان ينسپەكتوردىڭ تەلەفونىنا بىردەن قوڭىراۋ شالىنادى. كوبىنە ارىز-شاعىمدار تۇرعىنداردان وسى باعىتتا ءتۇسىپ جاتادى. ال ءبىز ولاردىڭ شاعىمدارىنا بىردەن نازار اۋدارىپ, ءتيىستى شارالار قابىلدايمىز, – دەيدى رۋسلان ساكەنۇلى.
«ۋچاسكە» جەدەل الدىن الۋ ءىس-شاراسى باستالعالى ۋچاسكەلىك ينسپەكتورلار 140 مىڭنان اسا پاتەر مەن 14000-نان اسا جەكە ءۇيدى ارالاپ شىققان. وسى كەزەڭدە تۇرعىلىقتى جەرى بويىنشا 6000-نان اسا ازامات تەكسەرىلىپ, ۇيىندە قارۋ ۇستايتىن 13000-عا جۋىق ازاماتتىڭ قۇجاتى مەن وسى قارۋدى ۇستاۋ زاڭدىلىعى تەكسەرىلگەن. سونداي-اق, 1000-نان اسا جالعا بەرىلەتىن پاتەر انىقتالىپ, ول تۋرالى مالىمەتتەر استانا قالاسىنىڭ مەملەكەتتىك كىرىس دەپارتامەنتىنە جىبەرىلگەن.
جالپى, ءىس-شارا باستالعالى 17 مىڭعا تارتا ادام اكىمشىلىك جاۋاپكەرشىلىككە تارتىلدى. اتاپ ايتقاندا, ولاردىڭ 2000-دايى ۇساق بۇزاقىلىعى, 4000-نان استامى ەلىمىزدە تىركەلمەگەنى نەمەسە جەكە باسىن كۋالاندىراتىن قۇجاتى بولماعانى ءۇشىن جازالانعان. ال كوشى-قون زاڭىن بۇزعان 2000 شەتەلدىك انىقتالعان.
استانا قالاسىندا جەتپىستەن اسا ۋچاسكەلىك پوليتسيا بولىمشەسى بار ەكەن. ونداعى ۋچاسكەلىك ينسپەكتورلاردىڭ باستى مىندەتى – تۇرعىنداردىڭ قۇقىعى مەن ەركىندىگىن, زاڭدى ءمۇددەلەرىن قورعاۋ. سوندىقتان ءار تۇرعىن ءوز ۋچاسكەلىك پوليتسيا ينسپەكتورىنىڭ اتى-جونىن, جۇمىس تەلەفونىن بىلگەنى ءجون. ال ءسىز ءوز ۋچاسكەلىك ينسپەكتورىڭىزدى تانيسىز با؟
