سەيسەنحان ماحانبەتوۆتىڭ سۋرەتشىلىگى ايتىلسا-اق مەنىڭ كوڭىلىمە «ءا» دەگەننەن ونىڭ كارتيناسىنداعى اقبوز اتتار كەلەدى. ويتكەنى ەكەۋمىز تانىسقالى بەرى قىرىق جىلداي ۋاقىتتا ونىڭ شىعارماشىلىق كورمەسىنەن اقبوز اتتار امسە ۇزىلگەن ەمەس. بىردە ۇيىرىمەن شاۋىپ, بىردە قوساعىمەن جۋساپ, ەندى بىردە باتىر, بايانداردىڭ تاقىمىنان تابىلىپ, كورەرمەننىڭ, قازاق شىركىننىڭ بويىندا اعىپ جاتقان قامبار اتا قانىن قىزدىرۋمەن كەلە جاتىر.
سوناۋ وتكەن عاسىردىڭ جەتپىسىنشى جىلدار ورتاسىندا سۋرەتشى كاميل مۋللاشەۆتىڭ «تاڭ» اتتى كارتيناسىندا زەڭگىر كوكتەن, شولپان جۇلدىز ءالى سونە قويماعان, كۇن ۇياسىنان ەندى كوتەرىلگەن كەزدە, كەڭ جايىلعان پاراشيۋت باۋىنا يرەكتەي اسىلىپ كوسموس شارى ءتۇسىپ كەلە جاتاتىن ەدى. سوندا جەردە, مي دالادا, سوناۋ كوكجيەك سىزىعىن موينىمەن سىزىپ, سوڭىنان اق بۇيرا شاڭ قالدىرىپ, اقبوز اتتار باتىستان شىعىسقا قاراي ارىنداي شاباتىن.
ونەر بىتكەننىڭ بارىنەن ۇلەسىم بار دەپ جۇرگەن سەيسەنحان سۋرەتشىنىڭ بەينەلەۋ الەمىنە ءبىرجولا بەت بۇرۋىنا وسى ءبىر اقبوز اتتاردىڭ تىكەلەي قاتىسى بار.
– ون سەگىز جاسىمدا, العاش اۋىلدان الماتىعا كەلگەندە ارنايى بارىپ كاميل اعامەن تانىسقانىم ەسىمنەن كەتپەيدى. ول كىسى ماسكەۋدەن سۋريكوۆ اتىنداعى كوركەمسۋرەت اكادەمياسىن جاڭا ءبىتىرىپ كەلگەن, «جەر, قازاقستان, ۋاقىت» اتتى تريپتيح كارتيناسىمەن بۇكىلوداقتىق لەنين كومسومولى سىيلىعىن الىپ, كەڭەس وداعى كولەمىندە اتى دۇرىلدەپ تۇرعان كەزى-تۇعىن. سونداعى كەڭ مول سۇحبات, كارتيناسىنىڭ جازىلۋ بارىسىنداعى جيعان تاجىريبە, قىزىقتى ساتتەرىنە قانىپ, قاتتى اسەرلەنىپ شىققانىم, اتالمىش شىعارمالارىنىڭ كوشىرمەسىن «وگونەك» جۋرنالىنان قيىپ الىپ, بولمەمنىڭ قابىرعالارىنا ءىلىپ قويعانىم دا جادىمدا. بەينەلەۋ ونەرىمەن شىنداپ «اۋىرتىپ», ءومىرى جازىلماستاي قىلىپ جىبەرگەن كامەكەڭنىڭ «تاڭ» اتتى كارتيناسى, ونىڭ اقبوز اتتارى ەدى. مەن ءار كەزدە كاميل اعانى ءبىرىنشى ۇستازىم دەپ بىلەمىن, – دەيدى ءبىزدىڭ بۇگىنگى كەيىپكەر. ءوز كەزەگىندە, قازاقستان مەملەكەتتىك سىيلىعىنىڭ لاۋرەاتى, قازاقستان رەسپۋبليكاسىنىڭ ەڭبەك سىڭىرگەن قايراتكەرى كاميل مۋللاشەۆ اعامىز دا سەيسەنحان سۋرەتشى تۋرالى: «سۋرەتشى ءىنىم جازعان «جەتى ارعىماق» كارتيناسىن كورگەنىمدە مەنىڭ شىعارماشىلىعىمنىڭ اسەرىن بايقادىم… ونىڭ كارتينالارىنا ءتان ەرەكشەلىك – كەڭ تىنىستىلىق, الۋان رەڭكتىلىك. پەيزاجدارىنان اۋانىڭ مولىنان سەزىلىپ تۇراتىنى. سەيسەنحاندى كەشەگى وتكەن و.تاڭسىقباەۆ, ءا.قاستەەۆ, ج.شاردەنوۆ, س.رومانوۆ سەكىلدى قازاق سۋرەتشىلەرى سالىپ كەتكەن ۇلتتىق ءداستۇرلى رەاليستىك مەكتەپتىڭ ءىزىن جالعاستىرۋشى دەپ ەسەپتەيمىن» دەيتىن پىكىردە.
ءيا, «تاڭ» كارتيناسىنداعى جانۋارلار كاميل ۋالياحمەتۇلىنداي سۋرەتشىنىڭ باتاسىمەن سەيسەنحان شىعارماشىلىعىنا, ارىنىن باسپاعان كۇيى شاۋىپ كىرىپ, سۋرەتشىنىڭ نازىك سىرشىل جانىنداي مىنەزگە يە بولىپ, كەۋدەسىن مەكەن ەتىپ قالىپ قويعان بولاتىن.
* * *
سەيسەنحان ماحانبەتوۆتىڭ قىلقالامىنان تۋعان سۋرەتتەرى تۇگەلگە دەرلىك رەاليستىك مانەردە ناقىشتالعان. كارتينالارى پەيزاج بەن ناتيۋرمورت, پورترەتتەر مەن توپتى ادامدار, قانسوناردا قۇس سالعان اڭشىلار, قولىنا سۇڭقار ءىلىپ, سوڭىنا تازى جۇگىرتكەن ساياتشى بولىپ كەزەكتەسىپ ءتىزىلىپ وتىرادى.
كارتينالار قورىندا باتاليا جانرى دا كەزىگەدى, قالا پەيزاجى دا بار.
سۋرەتشى, اسىرەسە, پەيزاج جانرىنا دەندەپ ەندى. تەرەڭىنەن كەن قازدى, مولىنان قازىناعا جولىقتى. شەشەك اتىپ, الما گۇلدەگەن, تىرنالار قيقۋلى كوكتەممەن جادىرا جازدى ءسۇيىپ, سۇيسىنە جازدى. تابيعات كورىنىستەرىنىڭ كولدەرى تۇنىپ, جاعاسىندا جىلقىلارى جۋساي قالاتىن. نەشە ءتۇرلى رەڭمەن جۇقالاي, جۇمساق جازىلعان بۇلتتارمەن استاسقان اسپان, كۇنەس پەن كولەڭكەسى قاتار الماسقان قارلى تاۋلار, سول تاۋلاردىڭ وڭىرىنە قاپتاي شىققان قاراعاي, ەتەگىنەن سارقىراي اققان وزەن كارتينالارىنىڭ ىشكى ولشەمدەرىنە, ەكىنشى, ءۇشىنشى قاتارىنا ورىن تەپسە, بەرىدە ءبىرىنشى قاتارعا, گۇل كومكەرگەن كەزەڭگە جاسىل شالعىن تۇنىپ, جامىراي بۇتا وسەر ەدى. سەيسەنحان سالعان جۇماق وڭىردە سايگۇلىكتەرى جايىلىپ, سالت اتتىلار جەلدىرتىپ جۇرەر. عاشىقتار كەزدەسەر.
قازاقستاننىڭ مەملەكەتتىك سىيلىعىنىڭ لاۋرەاتى, رەسەي, قىرعىزستان, چەحيا كوركەمونەر اكادەميالارىنىڭ اكادەميگى ەربولات تولەپباەۆ: «سەيسەنحان ماحانبەتوۆتىڭ سوڭعى جىلدارى جازعان جۇمىستارىندا ەلىمىزدىڭ تاۋى مەن دالاسى, اسەم تابيعات كورىنىستەرى مولىنان كورىنىس تاپقان. سۋرەتشى كورىنىستەردى جاي كوشىرىپ قويماي, سۋرەتشىلىك كوزقاراسپەن وي ەلەگىنەن وتكىزىپ, شىعارماشىلىق مۇمكىندىكتەرىن كورسەتە العان. ونىڭ جۇمىستارىنىڭ باسىم كوپشىلىگى پلەنەرگە (تابيعاتتىڭ وزىنە) كوپ شىعىپ, سونىڭ ناتيجەسىندە جازىلعانىن بايقايمىز. سۋرەتشىنىڭ كارتينالارىندا ءوز تانىمى مەن شىعارماشىلىققا دەگەن ۇلكەن ىنتىزار تالپىنىسى انىق سەزىلەدى. ونىڭ شىعارماشىلىعى اسەم تابيعاتتىڭ الۋان كورىنىسىن ءوز جىرىنا قوسقان تاۋ مەن دالا باللادالارى سەكىلدى سەزىلەدى» دەسە, قىرعىز رەسپۋبليكاسىنىڭ حالىق سۋرەتشىسى, ت.ساتىلعانوۆ اتىنداعى مەملەكەتتىك سىيلىقتىڭ لاۋرەاتى يۋريستانبەك شىعاەۆ «س.ماحانبەتوۆتىڭ پەيزاجدارى, ءبىر جاعىنان, ءابسوليۋتتى رەاليستىك باعىتتا, ناتۋرادان «كوشىرىلگەن» بولسا, ەكىنشى جاعىنان, ليريكالىق, پوەتيكالىق باعىتتا, ءوز ولكەسىنىڭ تابيعاتىنا ۇلكەن ماحابباتپەن, ونىڭ الۋان تۇرلىلىگىن بوياۋلاردىڭ ءوزارا بايلانىسى ارقىلى كورسەتۋگە دەگەن ۇلكەن ۇمتىلىسپەن جازىلعان. ونىڭ ءتىپتى كىشكەنە فورماتتاعى پەيزاجدىق كارتينالارى دا ءبىز ءوزىمىز مەكەن ەتەتىن, جاقسى كورەتىن, ونسىز ءوز ءومىرىمىزدى ەلەستەتە المايتىن ۇلكەن عالامعا اشىلعان وزىنشە ءبىر تەرەزە سىندى» دەپ تولعايدى.
سەيسەنحان كەشە ورال تاڭسىقباەۆقا ەلىكتەسە, بۇگىنگى اتىشۋلى باتو دۋگارجاپوۆقا «عاشىق». «مەن تولدىم, قالىپتاسىپ بولدىم» دەپ ءومىرى ايتقان ەمەس. وزىنەن جالىعا باستاعاندا-اق «پاليترامدى اۋىستىرۋىم كەرەك», «سيۋجەت وزگەرتۋىم كادىك», «باسقا تەما جازىپ باستاۋىم شارت» دەپ وتىرعانى.
* * *
كازگۋ-دىڭ جۋرفاگىن بىتىرگەن ونىڭ شىعارماشىلىق جولىنا دا, تىرشىلىك سوقپاعىنا دا باسپا سالاسىندا كوركەمدەۋشى رەداكتور بولعان ۇزاق جىلدار ءوز جەمىسىن توگىپ بەردى. قاراقۇرىم جۋرناليست, ءنوپىر باسپاگەرلەردىڭ اراسىندا ءجۇرىپ «گازەت قالاي جاسالادى, جۋرنال قالاي قاتتالادى, ولارعا جازىلۋ قالايشا جۇرگىزىلەدى؟ كىتاپ قايتىپ تۇپتەلەدى, بروشيۋرا قايتىپ تىگىلەدى؟ ولاردى قايدا باسادى, كوبەيتۋدىڭ وڭاي جولى قايسى؟» دەيتىن بىلايعى جۇرتقا بۇلدىر دا كەرەكسىز سۇراقتاردىڭ سان قيلى جاۋابىن تاپتى. كادەسىنە جاراتتى, كاسىپ قىلىپ سوڭىنا دا ءتۇستى. ودان يگەرگەن مول تاجىريبەسىن كوممەرتسيامەن شەبەر ۇندەستىرىپ, كىتاپ شىعارۋشى, ونى تۇتىنۋشى دەيتىنىن كىرپياز-كىناز قاۋىمنىڭ كىلتىن تاۋىپ, ءساتتى اينالىسا بىلگەندىگىنەن ونىڭ قالتاسى وزگە سۋرەتشىلەردەي تەسىك بولا بەرمەيتىن. كەيىننەن داۋلەتتىلەر قاتارىنا جازىلعان تاعدىر ەكەش تاعدىرى دا ونىڭ تۇرمىس-تاۋقىمەتىمەن باسىن اۋىرتپاي, ونەر جولىمەن الاڭسىز اينالىسۋىنا ۇلكەن سەبەپ بولدى. قىم-قيعاش ءومىر جولى قاي قيىرعا اپارمادى, قاي بيىككە شىعارمادى؟
سەيسەنحان سۋرەتشىنىڭ جيھانگەز, «ءدارۋىش» ەكەندىگى ءتانتى ەتپەي قويمايدى. ەلىمىزدەگى ءتۇرلى قالالارى, نەشە ايماقتارىندا, ارقيلى دەڭگەيدە ۇيىمداستىرىلىپ جاتاتىن نەشە الۋان پلەنەردىڭ ىشىندە, قاۋعا ساقال كوپ سۋرەتشىنىڭ تاپ ورتاسىنان اقسيا كۇلەتىن اقسارى ءجۇزى, كەڭ مول تۇلعاسى, كۇن قاعارى كەرە قارىس شي قالپاعى مەن مۇندالار ەدى. «امانسىڭ با, قايدا ءجۇرسىڭ؟» دەپ تەلەفون شالسام-اق جاۋابى: «جايىققا, كاسپيگە كەتتىم», «ۇستىرتتەن ءبىر كورىنىس ءتۇسىردىم», «زەرەندىدە ءجۇرمىن», «ويبوي, سەن تۋعان قارابۇلاقتى كوردىم!», «كولسايدا سۋرەت سالىپ وتىرمىن» بولىپ كەلەتىن. ساپارلارىنان كەلىپ, سان قيلى, نەشە ءتۇرلى, الۋان ءتۇستى, ءىرىلى دە ۇساق جازىلعان, ماي بوياۋى كەۋىپ ۇلگەرمەگەن, اسەرگە تولى, كورىپ-بىلگەن, تابان ءىزى قالعان جەرلەردىڭ سامالى مەن اڭىزاعىندا, سۋىعى مەن جايماشۋاعىندا دۇنيەگە كەلگەن ەتيۋد-كارتينالارىن الدىڭا تارتادى. قىزىعاسىڭ با, قىزىعاسىڭ!
تاعى بىردە تەلەفون ءنومىرىن تەرسەم, ونىڭ قازاقستان اياسىنان شىعىپ كەتكەنى بەلگىلى بولار ەدى. اۋدەم ۋاقىتتان سوڭ قارقىلداي كۇلىپ, «جەڭىس-اكا, ەسسەنتۋكيدەن ارىرەك بارىپ, كاۆكاز سۋرەتشىلەرىمەن تانىستىم», «بابيچ دەيتىن پلەنەردىڭ شەبەرىمەن جولىقتىم», «رەسەي فەدەراتسياسىنىڭ سۋرەتشىلەرىمەن قوسىلىپ ەلبرۋستى كەنەپكە تۇسىردىك», «ۋاي, نەسىن ايتاسىڭ, ترەتياكوۆ گالەرەياسىن ابدەن ارالادىم!», «ورىس مۋزەيىن كوردىم», «بەلارۋس سۋرەتشىلەرى مىناداي ەكەن», «ماجارستاننىڭ پالەنشە دەگەن سۋرەتشىسىن تانيتىن با ەدىڭ؟», «سەن كىتابىڭا جازعان كلود مونەنىڭ جيۆەرنيدەگى مۋزەي ءۇيى كەرەمەت ۇنادى», «…پرادو», «لۋۆر…» دەپ شۇباتىپ الا جونەلەر ەدى. بارعان جەرلەرىنەن كەسەك-كەسەك البوم الىپ كەلەر ەدى. قىزعاناسىڭ با؟ ءيا, اق پەيىلمەن «قىزعاناسىڭ»!
تۋ, سوناۋ بالا كۇندەرىنىڭ ءىزى قالعان قىزىلقۇم وڭىرىندە اكە-شەشەسى ءبىر وتار مال باعادى ەكەن. بەينەت بىتكەننىڭ سوڭىندا جۇرگەن اكەسى جازعان اۋىرىپ, ءبىر كۇنى شوكەلەي جىعىلىپتى. جانىنا بار-جوعى 11 جاسار سەيسەنحاندى شاقىرىپ, «بالام, ەندى سەن ءداۋ جىگىت بولدىڭ, مەنىڭ ناۋقاستانىپ جاتىسىم مىناۋ. انا مالدى اشىقتىرىپ-ءيىرىپ قويا المايمىز. بۇگىن تۇندە وتاردى سەن جايىپ كەل» دەپتى. شىجىعىن شىلدەنىڭ كۇنى مال وتىعا ما, ولاردى تەك تۇنىمەن جايادى ەكەن. سودان قوس وركەشىنىڭ ورتاسىنان تاقياسى زورعا كورىنەتىن قۇرتتاي سەيسەنحاندى تۇيەگە مىنگىزىپ, مال سوڭىنا جىبەرەدى. كەش تۇسكەننەن جايىلىپ, ون بەس, جيىرما شاقىرىم جەردى تۇنىمەن شارلاپ ءبىر وتار مالى تاڭ اتا ءۇي جانىنداعى سۋاتقا ورالاتىن كورىنەدى. سونشا مالعا يە, ەس بولىپ (تۇيەسىنەن تۇسە المايتىن, تۇسسە قايتىپ مىنە المايتىن, شيەبورى ۇلىعان قورقىنىشتى, تاسقاراڭعى تۇندە), قوي سوڭىنان ەرىپ, ونداعان شاقىرىمدى جالعىزدان-جالعىز كوكتەي وتكەن بالا سەيسەنحاننىڭ بۇگىندە جارتى قۇرلىقتى وڭدى-سولدى شارلاعان, جەلگەك كەزبە بولمىسىندا اداممەن ارالاسا ءبىلۋ, كىسىنى سوزگە تارتۋ, ءۋالىنى ۋاجگە جىعۋ, جان بىتكەننىڭ ءتىلىن ءبىلۋ دەيتىن ەكىنىڭ ءبىرىنىڭ پەشەنەسىنە جازىلماعان ەرەكشەلىك جاتادى. كىم كورىنگەنگە ءىشىن الدىرا بەرمەيتىن, نەبىر تۇيىق دەيتىن, ماڭىنا ادام جۋىتپايتىن تاككاپپار سۋرەتشىلەردىڭ شەبەرحاناسىنان سەيسەنحاننىڭ وپ-وڭاي تابىلا كەتەتىنى. جانىندا ءجۇرىپ, قۇپياسىنا ءۇڭىلىپ, سىرىنا قاناتىنى. ول شىركىندەردىڭ شىعارمالارىنىڭ قالاي باستالىپ, قايتىپ اياقتالعانىنا كۋا بولاتىنى. ودان قالسا, گازەت-جۋرنالدارعا ەسسە-اڭگىمەلەر جازاتىنى.
«ساليحيتدين اعامىز بىلاي دەپتى», «ماعاۋيا امانجولوۆپەن جۇزدەسكەندە», «ءابدىراشيت سىدىحانوۆ كورمەمە كەلگەندە», «اينابەك وسپانوۆ ايتقانداي», «وسەرباي شورانوۆتىڭ قاسىندا جۇرگەنىمدە», «سەمبىعالي سماعۇلوۆتىڭ كومپوزيتسياسىن ۇققانىم», «باقىتنۇر بۇردەسبەكوۆتىڭ جازعانىنا قاراپ تۇرىپ», «ونەرتانۋشى يۆانينانىڭ سۋرەتشىلەر تۋرالى جازباسىن وقىعانىمدا», «قىرعىز سۋرەتشىلەرمەن ارالاسقانىمدا», «انەبىر رەسەيلىك شەبەردىڭ شەبەرحاناسىنا بارعانىمدا» دەپ باستالاتىن سۋرەتشىلەر تۋرالى سان-سابات, قات-قابات, قىزىق تا قىمبات اڭگىمە-ەستەلىكتەرىن قاعازعا تۇسىرسە – ادەمى ەسسەگە, كولەمدى كىتاپقا جۇك. ارتتاعىلارعا دا, وكشەباسارلارعا دا تاۋسىلماس ازىق. بالا كەزىنەن-اق باقىلاعىش, جان-جاقتى بولسام ءارى رەجيسسەر, ءارى اكتەر, ءارى باسپاگەر-جۋرناليست, ءارى جازۋشى ءھام وقىرمان, وپەرا ءانشىسى بولسام دەپ ارمانداپ وسكەن سەيسەنحان سۋرەتشى بۇگىن دە كوپ قىرلى. جۇرگەن جەرى دۋ بازار. سامبىرلاپ سويلەيدى, ساڭقىلداپ كۇلەدى. ماڭايىن ۇيىتىپ, مايىن تامىزىپ اڭگىمە دە ايتاتىن سول. اۋەلەتىپ ءان دە سالادى (كەزىندە ءانشى جانىبەك كارمەنوۆتەن دە ءدارىس العانى دا بولەك اڭگىمە). كەۋدەلى, كومەيلىلەر عانا يگەرەتىن «اقباقاي», «قۇسني-قورلان», «قاراتورعاي», «تەربەلەدى تىڭ دالا» تۇرپاتتى تىنىسى بيىك شىعارمالاردى اۋەلەتىپ شىرقايتىن دا سول. سوزگە جوق, بىرتوعا سۋرەتشىلەردىڭ اتورايى بولىپ, ايتقانىنا سەندىرىپ, ىڭعايىنا كوندىرىپ, ءازىل-قالجىڭعا كەنەلتىپ جۇرگەن دە ءبىر ءوزى.
ايتقان سوڭ سەيسەنحان ماحانبەتوۆتىڭ كارتينا تانىعىشتىعىن, نەشە جۇزدەگەن كارتينا ىلىنگەن ات شاپتىرىم گالەرەيالاردا, ىعى-جىعى, قيساپسىز كورەرمەننىڭ ءدال ىشىندە ءجۇرىپ, الگى گالەرەياعا ىلىنگەن سۋرەتتەردىڭ ەڭ مىقتىسىن تاپ باسا تانيتىن (باياعىنىڭ الدىنان نەشە ءۇيىر جىلقى ايداپ وتسە, ىشىندەگى ىلۋدە ءبىر حاس جۇيرىكتى تاني قوياتىن سۇڭعىلا سىنشى سەكىلدى), جاڭىلماس تۇيسىگىن دە ايتۋ كەرەك. تاني قويىپ, ءۇنسىز دە كەتپەيدى. وعان قاراپ «كومپوزيتسياسى مىناداي ەكەن, بوياۋ ءۇردىسى, كولوريتى, شەبەرلىگى بىلاي ەكەن, ىلدي-ىرعاعى, شاما-شارقى اناۋ ايتقانداي ەكەن» دەپ, كارتينانى «جىلىكتەپ-شاعىپ», تاراتىپ-تارقاتىپ تا بەرەتىن ايتقىشتىعىن جانە قوسىڭىز.
ونىڭ ارنايى سۋرەت ونەرىنىڭ وقۋ ورنىن بىتىرمەسە دە, وسى كۇننىڭ تولىققاندى سۋرەتشى دارەجەسىنە كوتەرىلۋىنە وسى ءبىر قاسيەتى دىڭگەك-تىرەك بولسا كەرەك.
* * *
قولىمىزعا تاياۋدا «استانا سۋرەتشى كوزىمەن» اتتى كىتاپ-البوم تۇسكەندە, ونداعى وتىزعا جۋىق قىلقالام يەلەرىنىڭ ەلوردا تۋرالى كارتينالارىن قاراپ وتىرىپ, مىناداي جازبالار نازارىمىزعا ءىلىندى: «سۋرەتشى سەيسەنحان ماحانبەتوۆ قالا پەيزاجىن بىردە ناتيۋرمورت ارقىلى, بىردە شاۋىپ كەلە جاتقان ءبىر ءۇيىر جىلقى وبرازىمەن قۇلپىرتادى. القىزىل راۋشان گۇل, ءبىر بۋدا ءجۇزىم, كوزدىڭ جاۋىن الىپ تۇرعان نارتتاي اپورت الما, قىزىل-سارى ماندارين بەينەسى, كۇمىس, حرۋستال ىدىستاردىڭ ۇيلەسىمىندەگى ناتيۋرمورتتان ارىدە, تەرەزەنىڭ سىرتىندا استانانىڭ الدەبىر ءۇيى, كوزگە تانىس بەينەسى باسىلادى. قابىرعاعا ات ۇستاپ تۇرعان قىز سۋرەتىن قوسا ىلەدى دە, «كارتينا ىشىندەگى كارتينا» ادىسىمەن الگى قالا پەيزاجىن تەپە-تەڭدىك جاعدايىنا كەلتىرەدى. ءسويتىپ كۇردەلى قۇرىلىمدى ساتىمەن بىتىرەدى. ونىڭ «سارىارقا جاڭبىرى» ەرەكشە كوڭىل كۇيمەن جازىلعان, جارقىن سۋرەت. الىستا, كوز ۇشىندا, ۇلان-بايتاق, بۇدىرسىز, جۋساندى, سەلەۋلى دالادا كەنەت پايدا بولعان ۇلكەن مەگاپوليسكە ءبىر ءسات وتكىنشى جاڭبىر سەبەلەي قالسا, بەرىدە, يەك ارتپادا ەسىل (بالكىم, نۇرا) وزەنىن كەسىپ ءوتىپ, ارقىراي شاۋىپ كەلە جاتقان التى-جەتى جىلقىعا كۇن نۇرى مولىنان تۇسەدى. كونتراست, ديناميكانىڭ ىم-يشاراسى كوپ ۇزاماي قالاعا اسپان اشىلىپ, ەسەسىنە, تاپ مۇندا نوسەر توگەرىن مەڭزەيدى. ال سول كەزدە قيالداي جۇيرىك جانۋارلار قاي قيىرعا سامعاپ كەتەر ەكەن؟»…
سەيسەنحان ورىنبەكۇلىن سۋرەت كەڭىستىگىنە كۇنى كەشە عانا الىپ كىرگەن اقبوز اتتار بولسا, مىنە, بۇگىنگى بەينەلەۋ الەمىنىڭ بەلەسىنە, ابىروي بيىگىنە دە الىپ شىققان سول, اقبوز جانۋارلار.
جەڭىس كاكەنۇلى,
قازاقستاننىڭ ەڭبەك
سىڭىرگەن قايراتكەرى,
سۋرەتشى, ونەرتانۋشى
