ەسىلدىڭ جاعاسىندا ەل جۇرەگى – ەلوردا بوي كوتەردى. مەملەكەت باسشىسى نۇرسۇلتان نازارباەۆتىڭ باستاماسىمەن استانانىڭ العاشقى ۋىعى قادالعانىنا بيىل 20 جىل تولدى. تاريحي ولشەممەن قاراعاندا, وسىناۋ از ۋاقىتتا استانا اتى الەمدە اسقاقتاپ شىقتى. بۇل – تۇتاس ەلدىڭ دە, ەلباسىنىڭ دا ابىرويى. قازىر ەلباسى مەن ەلوردا ءبىرىن-ەكىنشىسىنەن ءبولىپ قاراۋعا بولمايتىن ەگىز ۇعىمعا اينالدى.
ەلوردادا استانانىڭ 20 جىلدىق مەرەيتويىنا ارنالىپ, ساحناعا جول تارتقان «استانا» پۋبليتسيستيكالىق دراماسىنىڭ اۆتورلارى وسى جەلىنى نەگىزگە الدى. مادەنيەت جانە سپورت مينيسترلىگىنىڭ قولداۋىمەن ق.قوجامياروۆ اتىنداعى مەملەكەتتىك اكادەميالىق ۇيعىر مۋزىكالىق كومەديا تەاترى قويعان سپەكتاكل يدەياسىن ۇسىنىپ, رەجيسسەر رەتىندە جۇزەگە اسىرعان – قازاقستاننىڭ حالىق ءارتىسى مۇرات احماديەۆ. ال درامانى نۇرسۇلتان نازارباەۆتىڭ «قازاقستان جولى» كىتابىنىڭ نەگىزىندە جازۋشى احمەتجان اشيري جازىپ شىقتى.
ەلباسى ەلورداسىن الاتاۋدان ارقاعا كوشىرۋ تۋرالى ۇسىنىسىن 1994 جىلدىڭ 6 شىلدەسىندە جوعارعى كەڭەس وتىرىسىندا ايتقانى بەلگىلى. الايدا بۇل يدەيا ەل پرەزيدەنتىنىڭ باسىنا سودان ەكى جىل بۇرىن كەلگەن. «قازاقستان جولى» كىتابىنىڭ «جاڭا ءداۋىردىڭ جاڭا استاناسى» اتتى تاراۋىندا وسى جايلى مەملەكەت باسشىسى: «جاڭا استاناعا كوشۋ جانە ونى سالۋ تۋرالى وي مەندە ەرتەرەكتە, سوناۋ الىستاعى 1992 جىلى تۋعان ەدى. بىراق مەن ول كەزدە مۇنى اۋزىمنان شىعارمادىم, ويتكەنى قازاقستاننىڭ ەكونوميكاسى ويلاعاندى ىسكە اسىرۋعا مۇمكىندىك بەرمەدى» دەپ جازادى. ال سول تاريحي شەشىمگە العاشقىدا قارسىلىقتار بولا قويعان جوق. بۇل تۋرالى اتالمىش كىتاپتا: «اشىق ايتايىن, مەن استانانى اۋىستىرۋ يدەياسىنا بايلانىستى ءبىرتالاي قاتال سىنعا تاپ بولدىم. پارلامەنتشىلەر مەنىڭ يدەيامدى تىنىش قانا قابىلدادى دەسەم, جالعان ايتقان بولار ەدىم. داۋىستار ەكىگە ءبولىندى: ەگەر دە دەپۋتاتتاردىڭ ءبىرى مەنى ءسوزسىز قولدايىق دەپ ۇسىنسا, ەكىنشى بىرەۋلەرى ۇنەمى قيىنداي تۇسكەن الەۋمەتتىك-ەكونوميكالىق جاعدايدا استانانى اۋىستىرۋ ءۇشىن وراسان زور قارجىنى شاشۋ قيسىنسىزدىق دەپ, مۇلدە دەس بەرمەيتىن قورعانىستا تۇردى. ايتىس قىزۋ ءجۇرىپ جاتتى, بىراق دەپۋتاتتار نەگىزىنەن مەنى قولداماۋعا قاراي ويىسقان… كەيىننەن, جاڭا استانا تاياۋ ارادا بولا سالاتىن ءىس ەمەس, قالاي بولعاندا دا 20-30 جىلدى كەرەك قىلادى دەپ ويلاعان دەپۋتاتتار استانانى اۋىستىرۋدى قولداپ, داۋىس بەردى. قولداۋشىلاردىڭ داۋىسى ءسال عانا ارتىقشىلىقپەن باسىم ءتۇستى» دەپ جازىلعان.
درامالىق شىعارمانىڭ ولشەمدەرىنىڭ ءبىرىن تارتىس قۇرايتىنىن ەسكەرسەك, «استانا» قويىلىمى وسىعان ساي كەلدى. ياعني استانانى اۋىستىرۋعا قاتىستى تالاس-تارتىستار قامتىلدى. جارتى جىلعا جۋىق دايىندالىپ, 90 ءارتىس قاتىسقان قويىلىمدا ەلباسى بەينەسىن مادەنيەت قايراتكەرى ازيزجان يسكاندەروۆ سومدادى.
نۇرسۇلتان نازارباەۆتىڭ سول تاريحي شەشىمى دۇرىس بولعانىن ۋاقىت كورسەتتى. بۇگىندەرى استانا جەر-جاھاننان قانشاما ادامداردى تارتىپ, الەمدىك ايتۋلى شارالاردى وتكىزىپ كەلە جاتقان شاھار رەتىندە ەل نازارىنا ىلىكتى. ەلوردا كوركىنە تامساناتىن جۇرت تا كوپ. سونىڭ ءبارى ساحنا تىلىندە سويلەدى.
