پرەمەر-مينيستر ءاليحان سمايىلوۆ وتاندىق كاسىپكەرلەر كەڭەسىنىڭ بەسىنشى وتىرىسىن وتكىزدى, وندا تاۋ-كەن مەتاللۋرگيا كەشەنىن (تمك) دامىتۋدىڭ وزەكتى ماسەلەلەرى قارالدى.
يندۋستريا جانە ينفراقۇرىلىمدىق دامۋ ءمينيسترى مارات قاراباەۆتىڭ حابارلاۋىنشا, بۇگىنگى تاڭدا تمك-نىڭ ءجىو-دەگى ۇلەسى 8,5%-دى قۇرايدى. 2022 جىلى سالادا جالپى قۇنى 232 ملرد تەڭگە بولاتىن 19 جاڭا ينۆەستيتسيالىق جوبا ىسكە اسىرىلىپ, 3,5 مىڭ تۇراقتى جۇمىس ورنى اشىلدى. جالپى, 11 ايدا ءونىم شىعارۋ كولەمى 11,4 ترلن تەڭگەگە جەتتى ء(وسىم 17%). نەگىزگى كاپيتالعا سالىنعان ينۆەستيتسيالار 1 ترلن تەڭگەدەن استى ء(وسىم 14,8%).
يندۋستريا جانە ينفراقۇرىلىمدىق دامۋ ءمينيسترىنىڭ ايتۋىنشا, قازاقستان – پايدالى قازبالار قورى بويىنشا الەمدە جەتەكشى ورىنداردىڭ قاتارىندا. وسىعان بايلانىستى تمك-نىڭ باسەكەگە قابىلەتتىلىگىن ارتتىرۋ ءۇشىن الداعى جىلدارى مينەرالدى-شيكىزات بازاسىن تولىقتىرۋ, جەر قويناۋىن پايدالانۋشىلاردىڭ بىرىڭعاي پلاتفورماسىندا بيزنەس-پروتسەستەردى وڭايلاتۋ جانە اۆتوماتتاندىرۋ, بازالىق مەتالداردى دايىن ءونىم تۇرىنە دەيىن وڭدەۋدى تەرەڭدەتۋ جانە ت.ب. بويىنشا شارالار قابىلداناتىن بولادى.
پرەمەر-مينيستر سالانى دامىتۋ جونىندە مەملەكەت جوسپارلاپ وتىرعان شارالار مەن بيزنەستىڭ سىندارلى ۇسىنىستارى الداعى بەس جىلدىق كەزەڭگە ارنالعان سالالىق تۇجىرىمدامالاردا كورىنىس تاباتىنىن اتاپ ءوتتى. بۇل رەتتە ول نىسانالى كورسەتكىشتەر مەن ينديكاتورلاردى ناقتى ىسكە اسىرۋ ۋاقىتىن كورسەتە وتىرىپ, بەلگىلەۋ قاجەتتىگىن اتاپ ءوتتى.
وتىرىس بارىسىندا بيزنەس پەن ساراپشىلار قاۋىمداستىعىنىڭ وكىلدەرى گەولوگيالىق سالانى جانە جەر قويناۋىن پايدالانۋدى ودان ءارى دامىتۋ, تمك ينۆەستيتسيالىق تارتىمدىلىعىن ارتتىرۋ, سالىق سالۋ, تسيفرلاندىرۋ, كولىكتىك قامتاماسىز ەتۋ جانە جاڭا ەكولوگيالىق تالاپتاردى ەنگىزۋ ماسەلەلەرىن كوتەردى.
ءاليحان سمايىلوۆ ۇكىمەت تمك-نىڭ ينۆەستيتسيالىق تارتىمدىلىعىن ارتتىرۋ ءۇشىن ونەركاسىپتىك ءوندىرۋدى 2022 جىلعى 31 جەلتوقساننان كەيىن باستايتىن جوبالاردى بەس جىلعا دەيىنگى مەرزىمگە پايدالى قازبالاردى ءوندىرۋ سالىعىنان بوساتۋ تۋرالى شەشىم قابىلداعانىن ەسكە سالدى.
«ءبىز ەكونوميكا سالالارىن, ونىڭ ىشىندە تاۋ-كەن مەتاللۋرگيا كەشەنىن قولداۋ جانە دامىتۋ ءۇشىن تاعى قانداي شارالاردى قابىلداۋعا بولاتىنىن بيزنەسپەن بىرگە قارايمىز. ۇكىمەت ديالوگقا قاشاندا دايىن جانە بارلىق ۇسىنىستاردى تىڭداۋعا ءازىر. بۇل رەتتە مەملەكەت پەن بيزنەس مۇددەلەرىنىڭ تەڭگەرىمىن ءارى قاراي ساقتاۋعا تىرىسامىز» دەپ ءسوزىن تۇيىندەدى ءاليحان سمايىلوۆ.
