ەلوردادا ۇلىستىڭ ۇلى كۇنى – ءاز ناۋرىز مەرەكەسى كەڭ كولەمدە تويلاندى. ميچۋرينو جانە ينتەرناتسيونالنىي تۇرعىن الاپتارىنان باستالعان مەيرام جەلەزنودوروجنىي جانە پرومىشلەننىيدا جالعاستى. پريگورودنىي, ۇركەر, ءوندىرىس, كوكتال-1 جانە كوكتال-2 تۇرعىندارىنا دا كوكتەم مەرەكەسى ارنايى ۇيىمداستىرىلدى.
تۇرعىن الاپتار حالقى توعىزقۇمالاق پەن اسىق اتۋ ويىندارىندا شەبەرلىك بايقاسىپ, ۇلتتىق تاعامداردان ءدام تاتتى, ۇلتتىق كيىمدەر كورمەسىن, مەرەكەلىك كونتسەرتتى تاماشالادى.
كلارا تولەنباەۆا, دوس سەكىلدى بەلگىلى انشىلەر, «ارت-دومبىرا» جانە «الامان» ۇشتىكتەرى, «سارىارقا» جانە «ديارت» توپتارى, «ىنكارىم» بي ءانسامبلى, جاقسىكەلدى ماياساروۆ, ت.ب. ونەر يەلەرى تۇرعىندارعا كوتەرىڭكى كوڭىل-كۇي سىيلايدى. «زامانداستار» ارداگەرلەر حورى ارنايى كونتسەرتتىك باعدارلاما ۇسىندى.
ەكسپو قالاشىعىنداعى ەتنواۋىلدا روزا رىمباەۆا, دوسىمجان تاڭاتاروۆ, جازگۇل دانىلباەۆا, مارجان اراپباەۆا, ايزات قارابەكوۆا, اسەم وماروۆا, «قورقىت» ءانسامبلى اندەردى اۋەلەتىپ, مەرەكەگە جينالعان قاۋىم «قارا جورعا» ءبيىن بيلەدى.
«قازاق ەلى» الاڭىندا دا ناۋرىز مەرەكەسىنە ارنالعان بۇقارالىق شارالار ۇيىمداستىرىلدى. كيىز ۇيلەر تىگىلىپ, التىباقاندار ورناتىلدى. حالىق اسىق اتۋ, گىر كوتەرۋ, ارقان تارتۋ جانە باسقا دا ۇلتتىق سپورت تۇرلەرىنەن كۇش سىناسىپ, ناۋرىز-كوجەدەن, پالاۋ مەن ىستىق باۋىرساقتان ءدام تاتتى.
ساحنادان رۇستەم مەن ميراس جۇگىنىسوۆتەر, كۇلايىم قايىرباەۆا, «ميكس», «دابىل» دۋەتتەرى, «Gentlemen», «Jigibanda» توپتارى, «شالقىما», «شاتتىق», «اق كەربەز» بي ۇجىمدارى مەن باسقا دا ەلوردالىق شىعارماشىلىق ۇجىمدار ءوز ونەرلەرىن ورتاعا سالدى.
ەرتەگى كەيىپكەرلەرىنىڭ كوستيۋمدەرىن كيگەن انيماتورلار مەرەكەنىڭ كىشكەنتاي قوناقتارىنىڭ كوڭىلىن كوتەردى. بۇعان قوسا, ۇلتتىق ناقىشتاعى قولدانبالى ونەر تۋىندىلارىنىڭ جارمەڭكەسى ۇيىمداستىرىلدى
جالپى, ناۋرىز مەرەكەسى جەتىسۋ ساياباعىندا, جاستار تەاترى جانىندا دا تويلاندى. مەرەكەلىك شارالار ەلوردانىڭ بارلىق مادەني وشاقتارىندا ءوتىپ, مۇندا تاقىرىپتىق كورمەلەر, كونتسەرتتەر, ۆيكتورينالار مەن كەزدەسۋلەر ۇيىمداستىرىلدى.
