نۇر-سۇلتان قالاسىندا «داۋلەت» سپورت كەشەنىندە ناۋرىز مەرەكەسىنە وراي قازاق كۇرەسىنەن تۇڭعىش رەت «ونەر بارىسى» رەسپۋبليكالىق ءتۋرنيرى ءوتتى. جارىستىڭ باستى ماقساتى – قازاق كۇرەسىن دارىپتەۋ جانە جاستار اراسىندا سالاۋاتتى ءومىر سالتىن ناسيحاتتاۋ بولدى. وعان 16-36 جاس ارالىعىنداعى ونەر يەلەرى – ارتىستەر, مۋزىكانتتار, ايتىسكەر اقىندار قاتىستى.
اتاپ ايتقاندا, «نىسانا» تەاترىنىڭ ءارتىسى اباي ايازباەۆ, ءانشى سەرىك يبراگيموۆ, بەلگىلى ۆاينەر, اكتەر مەيىرجان تورەباەۆ, ۆوكاليست امانگەلدى وتەشوۆ, ءانشى, اكتەرلەر ارتۋر تولەپوۆ, نۇربولات ابدۋللين, ايان وتەپبەرگەن, ايتىسكەر اقىندار نۇرلان مۋساەۆ, الىبەك سەرعاليەۆ, تەاتر جانە كينو اكتەرلەرى ەركەبۇلان دايىروۆ پەن ازامات شارعىن, ايتىسكەر اقىن ءانشى, اقىن, تەلەجۇرگىزۋشى ارداق بايعابىل, كتا قاتىسۋشىلارى عالىم ماحامبەتوۆ, اقبولات وتەباي, حاميت ەردەحان كۇش سىناستى.
ءدۇبىرلى دوداعا قاتىسۋشىلار ەكى اي بويى باپكەرلەردىڭ نۇسقاۋىمەن جاتتىعىپ, كۇرەس تەحنيكاسىن مەڭگەردى. جارىس قازاق كۇرەسىنەن بەكىتىلگەن ەرەجەلەرگە سايكەس وتكىزىلدى. ەلىمىزدىڭ جوعارى دەڭگەيلى تورەشىلەرى پالۋاندارعا ءوز باعالارىن بەردى.
قالىڭ كورەرمەن تاماشالاعان شارانىڭ قورىتىندىسىندا جەڭىمپازدار ەكى سالماق دارەجەسى بويىنشا انىقتالدى. اۋىر سالماق دارەجەسىندە اكتەر سىرىمبەت بيبوسىنوۆ چەمپيون اتانسا, ورتا سالماقتا «جاۋجۇرەك مىڭ بالا» تاريحي كارتيناسىندا سارتاي باتىردىڭ ءرولىن سومداعان اسىلحان تولەپوۆ توپ جاردى.
