قالالىق ءماسليحاتتىڭ كەزەكتى جيىرما ءۇشىنشى سەسسياسىندا كۇن تارتىبىندەگى العاشقى ماسەلە بويىنشا استانا قالاسى اكىمىنىڭ ورىنباسارى ايدا بالاەۆا بايانداما جاسادىەلورداداعى دەنساۋلىق ساقتاۋ جۇيەسىن «سالاماتتى قازاقستان» باعدارلاماسىنا سايكەس دامىتۋ تۋرالى اڭگىمەلەي كەلە, قالا اكىمىنىڭ ورىنباسارى سالادا اتقارىلىپ جاتقان جۇمىستارعا توقتالدى.
«ءبىزدىڭ جۇمىسىمىزدىڭ نەگىزگى باعىتتارى بەس نەگىزگى بلوكتان تۇرادى, جيىنتىقتا ولار تۇتاستاي دەنساۋلىق ساقتاۋ جۇيەسىنىڭ شىنايى جاعدايىن كورسەتەدى. ءبىزدىڭ ويىمىزشا, ءبىرىنشى ءارى باستى باعىت – ەلوردادا اتالعان باعدارلامانىڭ ماقساتتى ينديكاتورلارىن ورىنداۋ دەڭگەيى بولىپ قالادى» دەگەن ا.بالاەۆا جۇمىستىڭ ەكىنشى باعىتى قوعامدىق دەنساۋلىقتى قورعاۋ ماسەلەلەرى بويىنشا ۆەدومستۆوارالىق ءوزارا ءتيىمدى ارەكەت ەتۋدى ارتتىرۋ ەكەنىن ايتتى. بۇل رەتتە بيىلعى جارتىجىلدىقتا استانادا ءسابي ءولىمى كورسەتكىشى ەداۋىر تومەندەگەن. ال, ورتاشا عۇمىر جاسى ادەتتەگى 69,5 جاستان 73,3 جاسقا جوعارىلاعان. قان اينالىمى اۋرۋلارىنان ءولىم-ءجىتىم ءبىرىنشى ورىندا تۇر. بيىلعى جارتىجىلدىقتىڭ قورىتىندىسى بويىنشا اتالمىش اۋرۋدىڭ كورسەتكىشى 7,5 پايىزعا تومەندەگەن. ەكىنشى ورىندا ونكولوگيالىق اۋرۋلار تۇر. ەسەپتى كەزەڭدە قاتەرلى ىسىكتەن كوز جۇمۋ وقيعالارى وتكەن جىلدىڭ سايكەس كەزەڭىمەن سالىستىرعاندا 12 پايىزعا ازايعانمەن, انا ءولىمى 1,9 ەسە كوبەيگەن. سوڭعى بەس جىل كولەمىندە تۋبەركۋلەزگە شالدىققاندار قاتارى رەسپۋبليكا بويىنشا استانادا كوبەيىپ كەتىپ تۇر. دەگەنمەن, كەشەندى الدىن الۋ شارالارىنىڭ ناتيجەسىندە بۇگىنگى تاڭدا ادامداردىڭ تۋبەركۋلەزدەن ءولۋ كورسەتكىشى 33,4 پايىزعا ازايعان.
ءۇشىنشى باعىت – بىرىڭعاي ۇلتتىق دەنساۋلىق ساقتاۋ جۇيەسىندە العاشقى مەديتسينالىق-سانيتارلىق كومەك ۇيىمدارىن جەتىلدىرۋ. وسىعان وراي, اكىم ورىنباسارى بىرىڭعاي ۇلتتىق دەنساۋلىق ساقتاۋ جۇيەسىن جۇزەگە اسىرۋ اياسىندا كۇندىزگى ستاتسيونارلاردا ەمدەۋگە بولاتىن اۋرۋلار ءتىزىمىن ۇلعايتۋ مەن ستاتسيوناردى الماستىرۋ, تەحنولوگيالارىن دامىتۋ جانە جەتىلدىرۋ جۇمىستارى جالعاسىپ جاتقانىن جەتكىزدى. ماسەلەن, سوڭعى بەس ايدا قالالىق مەديتسينا مەكەمەلەرىنىڭ كۇندىزگى ستاتسيونارلارىندا كەرەۋەتتەر سانى 18-گە كوبەيتىلىپ, وسى ۋاقىت ارالىعىندا 17959 ناۋقاس ەمدەلگەن. ءتورتىنشى باعىت – مەديتسينا قىزمەتكەرلەرىنىڭ بىلىكتىلىگىن ارتتىرۋ, سونداي-اق يننوۆاتسيالىق تەحنولوگيالاردى ەنگىزۋ بولسا, سوڭعى بەسىنشى باعىت – ءدارى-دارمەكتىڭ حالىققا قولجەتىمدىلىگى جانە ونىڭ ساپاسىن ارتتىرۋ, سونىمەن قاتار دەنساۋلىق ساقتاۋ ۇيىمىن مەديتسينالىق تەحنيكامەن جابدىقتاۋدى جاقسارتۋ. بۇل رەتتە ەلوردالىق ەمدەۋ مەكەمەلەرى دارىلىك زاتتارمەن 100 پايىز قامتاماسىز ەتىلدى, ال, مەديتسينا ۇيىمدارى جاڭا قوندىرعىلارمەن 83 پايىز جابدىقتالعان.
سالادا شەشىمىن كۇتكەن كۇردەلى ماسەلەلەر از ەمەس. سونىڭ ىشىندە كۇن تارتىبىندە كۇيىپ تۇرعانى – مامانداردىڭ جەتىسپەۋشىلىگى, كوپتەگەن بىلىكتى دارىگەرلەردىڭ جالاقىسى كوپ جۇمىستارعا, اتاپ ايتساق, جەكەمەنشىك جانە رەسپۋبليكالىق كلينيكالارعا اۋىسۋىمەن بايلانىستى بولىپ وتىر. سونىمەن بىرگە, جاس مامانداردىڭ جۇمىستا تۇراقتاۋىنا ەشقانداي جاعداي قاراستىرىلماعان. وسىعان وراي, ا.بالاەۆا حالىق قالاۋلىلارىن ۇلتتى ساۋىقتىرۋ سالاسىنداعى وزەكتى ماسەلەلەردى بىرلەسە شەشۋگە شاقىردى.
ودان ءارى دەپۋتاتتار قالالىق ءماسليحاتتىڭ بيۋدجەت, ەكونوميكا, ونەركاسىپ جانە كاسىپكەرلىك ماسەلەلەرى جونىندەگى تۇراقتى كوميسسيانىڭ ەسەبىن تىڭدادى. سونداي-اق, استانا قالاسىندا بەيبىت جينالىستار, ميتينگىلەر مەن شەرۋلەر وتكىزۋ ءتارتىبى جانە ولاردى وتكىزۋدىڭ ورنىن بەكىتۋ ماسەلەسى تالقىلاندى.
گۇلبارشىن وكەشقىزى
