ۇلت ۇلىلارى – يۋنەسكو تىزىمىندە

يۋنەسكو ۇيىمى قازاقستاندىق تانىمال رەجيسسەر شاكەن ايمانوۆتىڭ 100 جىلدىعىن رەسمي اتاۋلى شارالار كۇنتىزبەسىنە قوستى.

ءبىر قۋانارلىعى, ون توعىز جىلدا بۇل ءتىزىم قازاقستان ءۇشىن ون ءتورت مەرەيلى كۇنمەن تولىققان. ولاردىڭ قاتارىندا, اباي قۇنانباەۆ, مۇحتار اۋەزوۆ, ءسابيت مۇقانوۆ, عابيت مۇسىرەپوۆ, ماحامبەت وتەمىسۇلى قاتارلى ۇلت ۇلىلارى مەن مۇحامماد حايدار دۋلاتي, قانىش ساتپاەۆ, الكەي مارعۇلان, اقجان ماشاني سىندى دارىندى عالىم-زەرتتەۋشىلەردىڭ مەرەيتويلارى بار. بۇدان بولەك, يۋنەسكو-نىڭ اتاۋلى كۇندەر قاتارىنا تۇركىستاننىڭ 1500 جىلدىعى, تاراز قالاسىنىڭ 1500 جىلدىعى, سونىمەن بىرگە «قىز جىبەك» ەپوسىنىڭ 500 جىلدىعى, كومپوزيتور احمەت جۇبانوۆ پەن سۋرەتشى ءابىلحان قاستەەۆتىڭ 100 جىلدىعى دا تويلانعان بولاتىن.

كەلەسى جىلى يۋنەسكو-نىڭ تاريحي كۇنتىزبەسىنە بەلگىلى جازۋشى ءىلياس ەسەنبەرليننىڭ 100 جىلدىعىن قوسۋ جوسپارلانىپ وتىر.

جۇما قازيەۆ