مەملەكەت باسشىسى نۇرسۇلتان نازارباەۆتىڭ بەس ينستيتۋتسيونالدىق رەفورمانى جۇزەگە اسىرۋ جونىندەگى 100 ناقتى قادام – ۇلت جوسپارىن ءتۇسىندىرۋ جونىندەگى رەسپۋبليكالىق اقپاراتتىق-ناسيحات توبىنىڭ مۇشەلەرى قالالىق №1 اۋرۋحانادا ەلوردا تۇرعىندارىمەن كەزدەستى.
كەزدەسۋ بارىسىندا اتالمىش توپتىڭ مۇشەسى, قر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ مەديتسينالىق باقىلاۋ جانە فارماتسەۆتيكالىق قىزمەت كوميتەتى توراعاسىنىڭ ورىنباسارى رۋسلان نۇرمۇحانوۆ ءسوز سويلەدى.
– ەلباسى اتاپ كورسەتكەنىندەي, مەملەكەتتىڭ باستى ماقساتى – الەمدەگى باسەكەگە قابىلەتتى 30 ەلدىڭ قاتارىنا ەنۋ جانە ەكونوميكالىق ىنتىماقتاستىق پەن دامۋ ۇيىمىنا مۇشە ەلدەردىڭ ستاندارتتارىن قازاقستاندا دا ەنگىزۋ بولىپ تابىلادى, – دەدى ر.نۇرمۇحانوۆ.
بۇل رەفورما قوعام ءومىرىنىڭ شەشۋشى سالالارىن جاڭعىرتۋعا باعىتتالعانى تۋرالى ايتا كەلە, ول ۇلت جوسپارىنداعى العاشقى 15 قادام مەملەكەتتىك اپپاراتتىڭ كاسىبي دەڭگەيىن تۇبەگەيلى كوتەرۋگە ارنالسا, 19 قادام سوت جۇيەسى مەن قۇقىق قورعاۋ ورگاندارىن جاڭعىرتۋدىڭ ءتيىمدى شارالارى تۋرالى بولىپ وتىرعانىن العا تارتتى.
ۇلت جوسپارىنداعى قازاقستاندىقتاردىڭ ءومىر ساپاسىن ارتتىرۋعا باعىتتالعان نەگىزگى ءبولىم 50 قادامنان تۇرادى. «يندۋستريالاندىرۋ جانە ەكونوميكالىق ءوسىم» دەپ اتالاتىن بۇل ءبولىم جاڭا جوعارىتەحنولوگيالى ەكونوميكالىق ءوسىمدى ىنتالاندىرۋ مەن ادام كاپيتالىن دامىتۋعا باعىتتالعان. «بىرتەكتىلىك پەن بىرلىك» بولىمىندەگى التى قادام «ماڭگىلىك ەل» قۇندىلىقتار جۇيەسىن دامىتۋعا, جالپىقازاقستاندىق جانە قوعامدىق بىرلىكتى نىعايتۋى ىقتيمال جالپى شارالار جانە ون قادام قوعامدىق باقىلاۋ مەن ازاماتتىق قوعامنىڭ قاتىسۋىن كەڭەيتىپ, مەملەكەتتىك ورگانداردىڭ اشىقتىعى مەن ەسەپتىلىگىن, «اشىق ۇكىمەت» جۇمىسىنىڭ تەتىكتەرىن جەتىلدىرۋدى قامتاماسىز ەتەدى. وسى تۋرالى كەڭىنەن اڭگىمەلەي وتىرىپ, رەسپۋبليكالىق اقپاراتتىق-ناسيحات توبىنىڭ مۇشەسى ينستيتۋتسيونالدىق بەس رەفورمانى جۇزەگە اسىرۋ جونىندەگى جوبانىڭ الەۋمەتتىك باعىتتارىنا, اسىرەسە, مىندەتتى الەۋمەتتىك مەديتسينالىق ساقتاندىرۋدى ەنگىزۋمەن بىرگە باستاپقى مەديتسينالىق-سانيتارلىق كومەكتى قارجىلاندىرۋ ماسەلەلەرىنە ايرىقشا توقتالدى.
كەزدەسۋ بارىسىندا مەملەكەتتىك مەديتسينالىق ۇيىمداردى جەكەشەلەندىرۋدى ىنتالاندىرۋ جانە مەملەكەتتىك ەمەس ۇيىمدار ارقىلى تەگىن مەديتسينالىق كومەكتىڭ كەپىلدەندىرىلگەن كولەمىن بەرۋدى كەڭەيتۋ ماسەلەلەرى دە ءسوز بولدى.
گۇلبارشىن وكەشقىزى
