ۇلتتىق مۋزەي ناۋرىز مەيرامىنا وراي ۇيىمداستىرىلاتىن مەرەكەلىك ءىس-شارالار تىزبەگىن ۇسىندى.
19 ناۋرىزدا «ناۋرىز – جاڭارۋ نىشانى» مەرەكەلىك دۋماندى باعدارلامادا اتا-انا قامقورلىعىنان ايىرىلعان سابيلەر ءۇشىن «تۇساۋكەسەر» ءراسىمى وتەدى. «تۇساۋكەسەر» قايىرىمدىلىق جوباسى بيىل ءتورتىنشى رەت ۇيىمداستىرىلادى. سودان سوڭ, كونتسەرتتىك باعدارلاما جالعاسىن تاۋىپ, تەاترلاندىرىلعان قويىلىم, ايتىس ونەرى, ءان, بي, ارقان تارتىس, كيىز باسۋ جانە قولونەر بويىنشا شەبەرلىك ساباقتارى وتەدى. وسى كۇندەرى بالالارعا ارنالعان ناۋرىز ەرتەڭگىلىگى, «قازاقتىڭ ۇلتتىق ويىندارى: اسىق اتۋ» ەكسكۋرسيا-ساباعى جۇرگىزىلەدى.
ال 21 ناۋرىز كۇنى ۇلتتىق كيىم كيگەندەر مۋزەيگە تەگىن كىرەدى. ول ءۇشىن الەۋمەتتىك جەلىدەگى (فەيسبۋك – قر ۇلتتىق مۋزەيى, ينستاگرام – Nationalmuseumkz, تەلەگرامم – قر ۇلتتىق مۋزەيى) ۇلتتىق مۋزەي پاراقشالارىنا تىركەلىپ, #ۇلتتىقمۋزەي حەشتەگىن بەلگىلەۋلەرى قاجەت.
