استانادا كۇن مەن ءتۇن تەڭەلىپ, ۇلكەندەر «سامارقاننىڭ كوك تاسى جىبيدى» دەپ قاسيەت تۇتاتىن ۇلىستىڭ ۇلى كۇنى ەرەكشە كوڭىل-كۇيدە تويلاندى. اسىرەسە, «قازاق ەلى» مونۋمەنتى جانىندا ەرتەگىدەن كوشىپ كەلگەندەي اق بوز ۇيلەر سالتانات قۇرىپ, اسەم اندەر مەن شالقىما كۇيلەر توگىلىپ, حالايىق عاجايىپ مەرەكەنى تاماشالادى.
«ناۋرىز ايى تۋعاندا, توي بولۋشى ەدى بۇل ماڭدا» دەپ اقيىق اقىن مۇقاعالي جىرلاعانداي تاريحىمىزدىڭ تامىرى بەينەلەگەن باس الاڭدا وتكەن مەرەكەنىڭ كورىگىن ۇلتتىق ويىنداردى ۇلىق تۇتقانداردىڭ اتويلاعان رۋحى مەن نامىسى قىزدىردى.
اسىرەسە, بالا كەزىمىزدە ءتۇبىن ءتۇسىرىپ ويناعان اسىقتىڭ ماڭايىنا ۇيىرىلگەن جەتكىنشەكتەردىڭ قاراسى كوپ بولدى. بالالىقتىڭ بازارىنان الىستاعاننان بەرى اسىقتى دا ۇمىتقالى قاشان. ويىنعا سىرتتاي قاراپ تۇرىپ, ءبىزدىڭ دەلەبەمىز قوزدى. كەيىنگى كەزدەرى وسى ويىن ءتۇرى حالقىمىزدىڭ اسىل مۇراسى رەتىندە كەڭىرەك ناسيحاتتالىپ, جەر-جەردە سايىستار وتكىزىلىپ, جاسوسپىرىمدەر اراسىندا كادىمگىدەي قىزىعۋشىلىق تۋعىزعان ونەرگە اينالدى. ءبىر بايقاعانىم, بۇگىنگى كۇندە اۋىلدىڭ بالالارى دا وعان اسا ىنتا بىلدىرمەيدى. ءبىر جىلدارى اۋىلدا اسىق تا قات سانالعان كەزدەر بولعان. ەرتەرەكتە, ولاردى ادەمىلەپ بوياپ, دوربا-دوربامەن جينايتىن ەدىك. ونىڭ بارلىعى اسىقتى جاقسى كورگەندىكتەن تۋعان ويلار دەپ قابىلداڭىز. ويىنعا قاتىسۋشىلار كوپ بولعاندىقتان با, سايىس ءبىراز ۋاقىتقا سوزىلدى. اقىرى, جەتكىنشەكتەر اراسىندا ازامات قازى الىمدىلىق مەن شالىمدىلىق تانىتىپ, جەڭىمپاز اتانسا, ەرەسەكتەر اراسىنان اسحات ىزتاەۆتىڭ اسىعى الشىسىنان ءتۇستى.
بابالارىمىز ەجەلدەن ات قۇلاعىندا ويناپ, مەرگەندىك ونەردى دە بارىنشا مەڭگەرگەن. اسىرەسە, جامبى اتۋدا الدارىنا جان سالماعان. مەرەكەدە نىسانا كوزدەۋ سايىسىنا ناعىز سايىپقىراندار قاتىستى دەسە بولادى. بىرىنەن-ءبىرى وتەتىن مەرگەندەردىڭ ونەرىنە جۇرتشىلىق ءدان ريزا بولدى. وسى سپورتتىق جارىستا بالالار اراسىندا ستاس شترەمەل توپ جارسا, ەرەسەكتەر ىشىنەن يسلام بازارباەۆتىڭ تۋى جەلبىرەپ, كوزمەرگەن اتاندى.
كىر تاسىن كوتەرۋ سايىسىندا كىلەڭ سوم بىلەكتى جىگىتتەر كۇش سىناستى. ولار سايىن دالانى ەرەن كۇشتەرىمەن تاڭقالدىرا بىلگەن قاجىمۇقان مەن بالۋان شولاقتىڭ ۇرپاقتارى ەكەندىگىن تانىتا ءبىلدى. 16 كەلى كىر تاسىن قينالماي كوتەرگەن جۇماعالي زۇلعارين جاسوسپىرىمدەر اراسىنان ۇزدىك دەپ تانىلسا, 24 كەلىنى باسىنان اسىرىپ, جۇرتشىلىقتى ءتانتى ەتكەن ماعزام احمەتوۆ باۋىرىمىز بابىندا ەكەندىگىن كورسەتىپ, باس جۇلەگە يە بولدى.
– بۇگىن ءبىز استانا قالاسى اكىمدىگىنىڭ قولداۋىمەن باس الاڭدا ۇلتتىق ويىنداردىڭ ءۇش ءتۇرىن وتكىزدىك. ال, 22 ناۋرىز كۇنى قازاق كۇرەسى, توعىزقۇمالاق جانە ارقان تارتىس ويىندارى وتەدى. سپورتتىق شارالار ەكى كاتەگورياعا بولىنگەن. سوندىقتان, سايىسقا قاتىسىپ جاتقانداردىڭ قاراسى كوپ. مەرەكەنى قىزىقتاپ جۇرگەن جۇرشىلىقتا قىزىعا كورۋدە. بارلىق جەڭىمپازدار باعالى سىيلىقتارمەن ماراپاتتالادى, – دەيدى استانا قالالىق دەنە تاربيەسى جانە سپورت باسقارماسىنىڭ مامانى اقىلبەك ورازوۆ.
ازامات ەسەنجول
astana-akshamy.kz
