بۇگىندە ۇلتتىق ۇلان ساربازدارى ەلىمىزدەگى 11 ستراتەگيالىق جانە 3 ماڭىزدى مەملەكەتتىك نىساندى كۇزەتەدى. ەل تىنىشتىعىن ساقتاۋعا كۇن سايىن 5 مىڭعا جۋىق اسكەري قىزمەتشى تارتىلاتىن بولسا, سونىڭ 1000-نان استامى باس قالامىزدىڭ تىنىشتىعىن قامتاماسىز ەتۋگە جۇمىلدىرىلادى. وسى رەتتە ەلوردالىق جاساقتىڭ كومانديرى ساكەنتاي امانتايۇلىمەن ءاڭگىمەلەسكەن ەدىك.
– ساكەنتاي امانتايۇلى, ءوزىڭىز باسشىلىق ەتىپ وتىرعان 5573 اسكەري بولىمىنە قانداي مىندەت جۇكتەلگەن؟
– وسىدان ون جىل بۇرىن ەلوردامىزدىڭ قاۋىپسىزدىگىن كۇشەيتۋ ماقساتىندا اسكەردىڭ جەدەل ماقساتتاعى قۇراماسىن قۇرۋ تۋرالى شەشىم قابىلدانىپ, 2007 جىلى 5573 اسكەري ءبولىمى قۇرىلدى. اۋماعى 20 گەكتاردى الىپ جاتقان زاماناۋي اسكەري قالاشىقتىڭ قۇرىلىسى جەتى جىلعا سوزىلدى. 2014 جىلى ەلباسى نۇرسۇلتان نازارباەۆ قالاشىقتىڭ اشىلۋ سالتاناتىنا قاتىسىپ, اسكەري بولىمىمىزگە ءوز قولىمەن جاۋىنگەرلىك تۋ تابىستادى. استانالىق قۇراما – ەلىمىزدىڭ باس قالاسىنداعى قوعامدىق ءتارتىپتى قاداعالايدى. ەلوردامىزداعى ءاربىر اۋقىمدى شارادا قوناقتار مەن قالا جۇرتشىلىعىنىڭ قاۋىپسىزدىگىن قامتاماسىز ەتەدى. ۇلتتىق ۇلان باس قولباسشىلىعىنا ءىس-ساپارمەن كەلگەن شەتەلدىك دەلەگاتتارعا اسكەرىمىزدىڭ الەۋەتىن, قارۋ-جاراق, كيىم ۇلگىلەرى مەن اسكەري تەحنيكاسىن پاش ەتەدى. قايسىبىر باتالونىن الىپ قاراساڭىز دا, كۇنى-ءتۇنى دامىل تاپپاي, قۇراما جانە قالا تىرشىلىگىمەن بىتە قايناسىپ جاتادى. جەكە قۇرامى جاۋىنگەرلىك دايىندىعىن كۇندەلىكتى ءىس جۇزىندە شىڭداپ وتىرادى.
– جالپى استانا ىرگەسىندەگى ۇركەر شاعىن اۋدانىندا ورنالاسقان وسى اسكەري قالاشىقتىڭ بۇگىنگى الەۋەتىنە كەلسەك, قارۋ-جاراقپەن جابدىقتالۋى, ماتەريالدىق تەحنيكالىق قامتاماسىز ەتىلۋى ءتيىستى دەڭگەيدە مە؟
– ارينە. توتەنشە جاعدايلاردا, تابيعي اپاتتار كەزىندە, كۇندەلىكتى قوعام تىنىشتىعىن قامتاماسىز ەتۋ قىزمەتىندە جاۋىنگەرلىك مىندەتتەردى ساپالى ورىنداۋ ءۇشىن قۇرامامىز ءتيىستى تەحنيكامەن تولىققاندى قامتاماسىز ەتىلگەن. ەستەرىڭىزدە بولسا, بىلتىر وسى كەزدە تالاپكەر, قاراوتكەل ەلدى مەكەندەرىن, استانا اۋماعىنداعى تۇرعىن ۇيلەردى سۋ الۋ قاۋپى تونگەن بولاتىن. اقمولا وبلىسىنا قاراستى الۆا دامباسىنداعى, نۇرا جانە ەسىل وزەندەرىندەگى سۋ دەڭگەيى مولشەرىنەن تاسىعاندا قۇرامانىڭ جەكە قۇرامى دابىلمەن كوتەرىلگەن ەدى. تۇرعىنداردى دەر كەزىندە ەۆاكۋاتسيالاۋعا, سونداي-اق, اۋىلداردان ارنايى اپاتتىق-قۇتقارۋ توپتارىن قۇرىپ, جۇرتشىلىقتى اقپاراتتاندىرۋ مەن قاۋىپسىزدەندىرۋ شارالارىن اتقاردىق. ساربازدارىمىز جەدەل ارادا دامبالاردىڭ جيەگىنە قۇم سالىنعان قاپشىقتاردان بەكىنىستەر جاسادى.
بۇگىندە استانا تورىندە وتەتىن الەمدىك دەڭگەيدەگى باسقوسۋلار, مادەني-سپورتتىق اۋقىمدى ءىس-شارالاردا, مەرەكەلىك-كوپشىلىك جيىنداردا قۇراما جاۋىنگەرلەرى قوعامدىق ءتارتىپتى قاداعالاۋعا مىندەتتى تۇردە جۇمىلدىرىلادى.
– اسكەريلەردى باسپانامەن قامتۋعا بايلانىستى زاڭ جوباسى پارلامەنت ماجىلىسىندە ماقۇلدانعان ەدى, وسى باعىتتا قانداي وزگەرىستەر بولىپ جاتىر؟
– ءيا, ءوزىڭىز بىلەسىز, 2017 جىلعى 30 قاراشا كۇنى سەنات اسكەريلەردى باسپانامەن قامتاماسىز ەتەتىن زاڭ جوباسىن قابىلدادى. دەرەكتەرگە سۇيەنسەك, ءۇش جىلدا اسكەريلەردىڭ باسپاناسىن جالعا الۋ ءۇشىن مەملەكەت بيۋدجەتىنەن 50 ملرد تەڭگە جۇمسالعان. بۇل قاراجات ۇيلەرىن جالعا بەرگەن جەكە كاسىپكەرلەردىڭ قولىندا كەتتى. دەمەك, اسكەريلەر ءۇشىن دە, مەملەكەت ءۇشىن دە ءتيىمسىز بوپ كەلگەن. ەندى تۇرعىن ءۇي تولەمدەرiنiڭ 100 پايىزى ەكiنشi دەڭگەيلi بانكتەردiڭ ارنايى شوتتارىنا اۋدارىلادى. تولەم ۇيدەگى ادام سانىنا بايلانىستى بەرىلەدى. اتالعان باعدارلاما بويىنشا ۇسىنىلاتىن تۇرعىن ءۇي زاەمى 5% جىلدىق مولشەرلەمەمەن بەرىلەدى. «تۇرعىن ءۇي جيناق بانكى» ارنايى جوبا ۇسىنىپ وتىر. وعان سايكەس, باستاپقى جارنا ءتىپتى تالاپ ەتىلمەۋى دە مۇمكىن. ءبىز بۇل جوبانىڭ بولاشاقتا ۇلكەن سۇرانىسقا يە بولاتىنىن كورىپ وتىرمىز.
سۇحباتتاسقان
گۇلميرا ايماعانبەت
