استانا قالالىق ارداگەرلەر كەڭەسىنىڭ توراعاسى سانسىزباي ەسىلوۆتىڭ جەتەكشىلىگىمەن اعا بۋىن ازاماتتاردىڭ جاعدايىن جاقسارتۋ جونىندەگى 2025 جىلعا دەيىنگى «بەلسەندى ۇزاق ءومىر» ۇلتتىق جوسپارىنىڭ ورىندالۋى تۋرالى دوڭگەلەك ۇستەل ۇيىمداستىرىلدى. جيىنعا الماتى اۋداندىق ارداگەرلەر كەڭەسى تۇراقتى كوميسسيالارىنىڭ توراعالارى, باستاۋىش ۇيىمداردىڭ توراعالارى, الماتى اۋدانى اكىمدىگىنىڭ ءبولىم باسشىلارى قاتىستى.
سانسىزباي سەيىتجانۇلى كىرىسپە سوزىندە 2021 جىلى قابىلدانعان بۇل باعدارلامانىڭ ماقساتى اعا بۋىن ارداگەرلەرىمىزدىڭ دەنساۋلىق-سالاۋاتتى ءومىر ءسۇرۋ ۇزاقتىعىن ارتتىرۋ جانە قامقورلىققا, كۇتىمگە مۇقتاج ادامدارعا مەديتسينالىق, الەۋمەتتىك قىزمەتتەرگە قولجەتىمدى ەتۋ ەكەنىن سوزگە تيەك ەتىپ, وسى باعىتتا اتقارىلعان جۇمىستار جونىندە ايتتى. بۇل دوڭگەلەك ۇستەلگە ارنايى شاقىرىلعان استانا قالاسى ءماسليحاتىنىڭ توراعاسى ەرلان كاناليموۆ, استانا قالاسى جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى يليا سكۋب, قالالىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ, قالالىق ارداگەرلەر كەڭەسى تۇراقتى كوميسسياسىنىڭ توراعاسى قالياسكەر جانتەمىروۆ جانە استانا قالاسى ىشكى ساياسات باسقارماسىنىڭ باسشىسى داۋرەن بابامۇراتوۆ ۇلتتىق جوسپاردىڭ ورىندالۋ بارىسى جايلى تۇشىمدى باياندامالار جاسادى.
ءسوز سويلەگەندەر تاراپىنان 2021 جىلى ىسكە قوسىلعان بۇل باعدارلامانىڭ نەگىزگى ماقساتى ارداگەرلەر مەن زەينەتكەرلەرگە قامقورلىق جاساۋ, قارت ادامداردىڭ ءومىر ءسۇرۋ ساپاسىن جاقسارتۋ باعىتىندا اۋقىمدى ءىس-شارالار اتقارىلعانى ايتىلدى. اتاپ ايتقاندا, استانا قالاسىنىڭ 4 اۋدانىندا بەلسەندى ۇزاق ءومىر ءسۇرۋ ورتالىقتارى اشىلىپ, قارتتاردىڭ بوس ۋاقىتىن ۇيىمداستىرۋعا جاعداي جاسالعان. بۇل عيماراتتاردا جوسپارلانعان الەۋمەتتىك قىزمەتتەر تىزىمىندە الەۋمەتتىك ساۋىقتاندىرۋ, جاتتىعۋ تەراپياسى, تىنىس الۋ جاتتىعۋى, الەۋمەتتىك-مەديتسينالىق كومەك, دارىگەردىڭ, پسيحولوگتىڭ كەڭەسى, سالاۋاتتى ءومىر سالتى بويىنشا لەكتسيا, قۇقىقتىق جانە قارجىلىق ساۋاتتىلىق, ينتەرنەت-الاياقتىقتىڭ الدىن الۋ بويىنشا ماماندار كەڭەسى, ارت-تەراپيا, ەڭبەك تەراپياسى (توقۋ, تىگۋ, بەزەندىرۋ, قولدان جاسالعان سىيلىقتار), تىلدەردى ۇيرەنۋ, كومپيۋتەر كۋرسى, شاحمات, توعىزقۇمالاق, ۆوكال, تاقىرىپتىق كەشتەر, كونكۋرستار مەن ۆيكتورينالار كورسەتىلگەن جانە بۇل جۇمىستار تىڭعىلىقتى ورىندالۋدا. وسىنداي ورتالىق نۇرا اۋدانىندا دا اشىلادى.
بۇگىنگى تاڭدا استانا قالاسى بويىنشا ەمحانالار جانىنان گەرياتريالىق كابينەتتەر دە اشىلىپ, ءوز جۇمىسىن باستاۋدا, ناتيجەسىندە ەگدە جاستاعى ادامدار بالا-شاعامەن كەزەكتە تۇرماي, وزدەرىنە عانا ارنالعان تەراپەۆت دارىگەرمەن جۇزدەسەتىن بولادى. سونىمەن قاتار «قاتاركول» دەمالىس كەشەنىندە جىل سايىن 4 مىڭ زەينەتكەردىڭ دەمالۋىنا جاعداي جاسالعانى, 190 مىڭ زەينەتكەر مەن مۇگەدەكتەردىڭ تەگىن ءدارى-دارمەكپەن قامتاماسىز ەتىلگەنى جانە قالا بويىنشا اۆتوبۋستاردا زەينەتكەرلەردىڭ تەگىن ءجۇرۋى دە ايتىلدى. اسىرەسە ءتىس پروتەزىنە دەگەن سۇرانىس 3 مىڭ ادامنان اسادى ەكەن. وعان بولىنەتىن قارجى ءار ادامعا شاققاندا 90 مىڭ ەسەبىندە. بىراق الداعى جىلى ءتىس پروتەزىنە بولىنەتىن قارجى ءار ادامعا شاققاندا 250 مىڭ تەڭگەنى قۇراپ, 4 مىڭ ادامدى ەمدەۋ جوسپارلانىپ وتىر.
جينالىسقا قاتىسقان زەينەتكەرلەر مەن ارداگەرلەر بايانداماشىلاردىڭ ءسوزىن قولداي وتىرىپ, ءالى دە ەگدە ادامدارعا كورسەتىلەتىن كومەكتىڭ ساپاسى جايلى سۇراعىن بەردى. دوڭگەلەك ۇستەلگە استانا قالاسى ءماسليحاتىنىڭ دەپۋتاتى اسقار سماعۇلوۆ تا قاتىسىپ, بۇل ماڭىزدى ماسەلەلەر قالا ءماسليحاتىنىڭ وتىرىسىندا قارالاتىنىن ايتتى.
«بەلسەندى ۇزاق ءومىر ءسۇرۋ ورتالىقتارى» مەكەمەسىنىڭ باسشىسى مۇحتار ەركەتاەۆ تالقىلانعان ماسەلەلەرگە ءوز پىكىرىن ايتىپ, ارداگەرلەر مەن زەينەتكەرلەردىڭ جاعدايىن جاقسارتۋ بويىنشا جۇمىس ءوز ناتيجەسىن بەرەتىنىنە سەنىم ءبىلدىردى.
ماناپ ادىرەشەۆ,
استانا قالالىق ارداگەرلەر كەڭەسى جانىنداعى مەدياتوپ مۇشەسى
