كەشە Nur Otan پارتياسىنىڭ دەپۋتاتتىق فراكتسياسى مەن نۇر-سۇلتان قالالىق ءماسليحاتى تۇراقتى كوميسسياسىنىڭ بىرلەسكەن وتىرىسى ءوتتى. مۇندا قالانىڭ 2021-2023 جىلعا ارنالعان بيۋدجەتىنىڭ جوباسى جانە ءوڭىردىڭ 5 جىلعا ارنالعان الەۋمەتتىك-ەكونوميكالىق دامۋ ستراتەگياسى تالقىلاندى. باياندامانى «نۇر-سۇلتان قالاسىنىڭ ەكونوميكا جانە بيۋدجەتتىك جوسپارلاۋ باسقارماسى» مم باسشىسى قايسار ماڭقاراەۆ جاسادى.
– قالانىڭ 2021-2023 جىلدارعا ارنالعان بولجامدى ءۇش جىلدىق بيۋدجەتى مەملەكەت باسشىسىنىڭ جولداۋىندا ايتىلعان مىندەتتەر مەن ماقساتتاردى جۇزەگە اسىرۋ ماقساتىندا ازىرلەندى. سونداي-اق بۇل قۇجاتتا نۇر-سۇلتان قالاسىن 2050 جىلعا دەيىن دامىتۋ ستراتەگياسى مەن 2023 جىلعا دەيىنگى كەشەندى جوسپارى نەگىزگە الىنعان,– دەدى ق. ماڭقاراەۆ قارجىلىق قۇجاتتى ءماسليحات دەپۋتاتتارى نازارىنا ۇسىنا وتىرىپ.
قالانىڭ نەگىزگى الەۋمەتتىك-ەكونوميكالىق دامۋى كورسەتكىشتەرىنە قاراساق, ەلوردا ەكونوميكاسىنىڭ تۇراقتى ءوسىپ كەلە جاتقانىن بايقايمىز. ماسەلەن, 2020 جىلدىڭ العاشقى جارتى جىلدىعىندا ءجوو 3 ترلن 31,5 ملرد تەڭگەنى قۇراعان. ول بىلتىرعى سايكەس مەرزىمنەن 4 % كوپ. استانانىڭ وسى دامۋ قارقىنى باسەڭدەمەسە, ول 2025 جىلى 11,2 ترلن تەڭگەگە جەتۋى ءتيىس.
2021-2023 جىلدارعا ارنالعان بولجام بويىنشا قالا كىرىسى 1 ترلن 1ملرد 376 ملن تەڭگە بولادى دەپ كۇتىلىپ وتىر: 2021 جىلى – 319,7 ملرد تەڭگە, 2020 ج. – 332,3 ملرد جانە 2023 جىلى – 349,4 ملرد تەڭگە.
