وقۋشىلار سارايىندا «قوسىمشا ءبىلىم بەرۋ پەداگوگىنىڭ كاسىبي مادەنيەتى مەن جەكە شىعارماشىلىق كومپونەنتى» تاقىرىبىندا قالالىق عىلىمي-تاجىريبەلىك سەمينار ءوتتى. وعان قوسىمشا ءبىلىم بەرۋ ۇيىمدارىنىڭ مۇعالىمدەرى مەن ادىسكەرلەرى جينالدى.
سەميناردىڭ فورماتى وقۋشىلار سارايىنا ساياحات تۇرىندە ۇيىمداستىرىلدى. الدىمەن قوناقتار ءبىلىم ۇجىمىنداعى ۇيىرمە جۇمىسىمەن تانىسىپ, تەاتر, گالەرەيا, مۇز ايدىنى مەن مەكتەپارالىق دايارلىق توپتارىن ارالادى. سونداي-اق قازاق, اعىلشىن ءتىلى جانە ماتەماتيكا پاندەرى بويىنشا ساباق بارىسىن كورىپ, قوسىمشا ءبىلىم بەرۋ پەداگوگى بۋگيناس برونيسلاۆتىڭ شەبەرلىك ساباعىنا قاتىستى. بالامالى ەنەرگەتيكا ورتالىعى «رۋحاني جاڭعىرۋ» باعدارلاماسىن جۇزەگە اسىرۋ اياسىندا قاتىسۋشىلارعا «نە؟ قايدا؟ قاشان؟» دەگەن ينتەللەكتۋالدى ويىن وتكىزدى. سونىمەن قاتار ماماندار مەكەمەدەگى كوزدىڭ جاۋىن الار قىسقى باقتى تاماشالاپ, «حيميك- زەرتتەۋشى» ورتالىعىنىڭ عىلىمي جوبالارى مەن وقىتۋشىلاردىڭ ەلەكتروندىق پورتفوليوسىمەن تانىستى.
«ءبىز بۇگىن قوسىمشا ءبىلىم بەرۋ پەداگوگتارىنا ارناپ «ادىسكەرلىك كۇن» وتكىزىپ وتىرمىز. بۇل ءىس-شارا اياسىندا مۇعالىمدەر 10-نان اسا ساباققا قاتىسىپ, ءوزارا تاجىريبە الماسادى. وسىنداعى ۇيىرمەلەردى ارالاپ, بالالارمەن جۇمىس ىستەۋدىڭ ادىستەرىن كورەدى. قىسقاسى, مۇنداي شارانىڭ ۇستازدارعا بەرەرى كوپ» دەيدى وقۋشىلار سارايى ديرەكتورىنىڭ ورىنباسارى راۋشان احمەتوۆا.
سەمينار سوڭىندا قاتىسۋشىلار بيىل قابىلدانباق «مۇعالىمدەر مارتەبەسى» تۋرالى زاڭ جايىندا پىكىرلەستى.
