ايشا ءومىرالى – №59 مەكتەپ-ليتسەيدىڭ 8-سىنىپ وقۋشىسى. 4 جاسىنان باستاپ كوركەم گيمناستيكامەن اينالىسادى. ودان بولەك, قىلقالام شەبەرى.
كىشكەنتاي كەزىندە كوركەم گيمناستيكاعا العاش رەت قاتىسقان ايشاعا بۇل ۇناماعان. كەيىن ءبىر جىلدان سوڭ قىزىعۋشىلىعى ويانىپتى.
– باستاپقىدا ادام كوپ بولعان سوڭ قاتىسقىم كەلمەدى. بىراق اناما ويلانىپ, ءوزىم قايتا قاتىسقىم كەلەتىنىن ايتتىم. مەن دۇنيەگە كەلمەي تۇرىپ, وليمپيادا ويىندارى بولعان ەكەن. سول كەزدە انام «قىزىمدى وسى كوركەم گيمناستيكاعا قاتىستىرامىن» دەپ ارمانداپتى. كوركەم گيمناستيكاعا 12 جاسىما دەيىن قاتىستىم. وندا ءتارتىپ وتە قاتال. ناقتى ۋاقىتپەن جۇرەمىز. بىراق جاڭا دوستار تاپتىم, ۋاقىتىم كوڭىلدى وتەتىن. 8 جىلدا ترەنەرىم 6 رەت اۋىستى. سەبەبى ءار دەڭگەيگە وسكەن سايىن ترەنەر اۋىستىرىپ وتىرۋ ماڭىزدى. شەتەلگە بايقاۋلارعا ءجيى باراتىنبىز. بارلىق شىعىندى اتا-انام تولەدى.
ايشا ەكى جىل بۇرىن اۋىرىپ, ۇزاق ۋاقىت قاتىسا الماي قالعان. كەيىن بۇل قىزىعۋشىلىعىن بيگە الماستىرعان.
– ۇزاق ۋاقىت اۋىرىپ قالدىم دا, ءبىراز ءۇزىلىس بولدى. قايتا باستاعىم كەلگەنمەن, ماعان قىزىق بولمادى. قازىر 1,5 جىلدان بەرى بيگە قاتىسىپ ءجۇرمىن. كوركەم گيمناستيكاعا قاتىسقان سوڭ مەنى بىردەن كاسىبي توپقا الدى. العاشقىدا حيپ-حوپقا بارعان ەدىم. كەيىن زاماناۋي بي تۇرىنە اۋىستىم. جاقىندا ماسكەۋگە بايقاۋعا بارامىز. سوعان دايىندالۋدامىز.
بوس ۋاقىتىندا روك جانرىنداعى مۋزىكا تىڭداعاندى ۇناتادى. ودان بولەك, سۋرەت سالۋمەن اينالىسادى.
– سۋرەت سالعاندى جاقسى كورەمىن. ۇيىرمەگە بارماي, ۇيدەن ءوزىم ۇيرەنىپ الدىم. سۋرەت سالعاننان العان اسەر باسقاشا. كەيدە ۋاقىتىم بولسا, كينو كورەمىن. اسىرەسە, فانتاستيكالىق جانرداعى كينولاردى ۇناتامىن. سوڭعى رەت «كراسنىە براسلەتى» دەگەن سەريال كوردىم. وندا قاتەرلى ىسىككە شالدىققان بالالار تۋرالى كورسەتىلگەن. سەريالداعى بالالار ءارتۇرلى بولسا دا, ولاردىڭ دوستىعى ەرەكشە. ءبارىن ومىرگە دەگەن قۇشتارلىق بىرىكتىرەدى. اۋىر بولسا دا, ماعىناسى ۇنادى.
ايشا ءۇشىن ومىردەگى باستى قۇندىلىق – وتباسى. اناسى جەكە كومپانيادا زاڭگەر بولىپ قىزمەت ەتەدى.
– وتباسى ءبىزدى كەز كەلگەن قيىندىقتا قورعاپ, بارلىق شەشىمىمىزدى قولدايدى. تاڭداۋىمىزعا قارسى كەلمەيدى. بولاشاقتا قاي ماماندىقتى تاڭدايتىنىمدى ءالى شەشپەدىم. بىراق شىعارماشىلىق باعىتتى تاڭدايتىن شىعارمىن.
– ەگەر باسشىلىققا كەلسەم, ەلىمىزدەگى زاڭ جۇيەسىن وزگەرتەر ەدىم. بىزدە ادامدى ولتىرگەن قىلمىسكەرگە جەڭىل جازا بەرىلەدى. بۇل دۇرىس ەمەس. ءومىر باقي باس بوستاندىعىنان ايىرۋ كەرەك. سول كەزدە ادامدار بۇل قىلمىستى قايتالامايتىن ەدى دەپ ويلايمىن.
سىنىپ جەتەكشىسى اقبوتا جاندارقىزىنىڭ ايتۋىنشا, ايشا – سىنىپتا وتە ۇياڭ قىز.
– بەرگەن تاپسىرمانى جاۋاپكەرشىلىكپەن ورىندايدى. ساباققا ىنتاسى ەرەكشە. ايشا وتە سالماقتى, بيازى بولعانمەن, بولمىسى شىعارماشىلىققا جاقىن. سۋرەتتى وتە كەرەمەت سالادى. الدىڭعى وقۋ جىلىندا دەنساۋلىعىنا بايلانىستى ساباققا كەلمەگەن بولاتىن. سول كەزدە ونى سۋرەتشىلىك قىرىنان تانىدىق. ماعان 8 ناۋرىزعا سىيلىق رەتىندە ءوزى سالعان سۋرەتتى سىيلادى. وتە ادەمى ەدى. قازىر ايشانىڭ قولىنان شىققان تۋىندىلاردى جيناپ, ارنايى كورمە جاساعالى جاتىرمىز.
اناسى گۇلنازدىڭ ايتۋىنشا, ايشانىڭ مىنەزى قۇبىلمالى. بىردەن اشىلا قويمايدى.
– قىزىم كوبىنەسە كوڭىلدى جۇرەدى. كەز كەلگەن جاعدايعا تەز بەيىمدەلەدى. مەيىرىمدى, ەلگەزەك. ارقاشان ۋاقىتىن ءوزىن-ءوزى تابۋعا ارنايدى. جاڭا نارسەلەرمەن اينالىسقاندى ۇناتادى. وزىندىك پىكىرى بار. وعان ءوزى قالاماعان نارسەنى جاساتا المايمىز. بوس ۋاقىتىندا ۇيدە مىسىعىنا قارايدى, ءۇي تىرلىگىمەن اينالىسادى. كوپ كىتاپ وقيدى. سوڭعى جارتى جىلدا كىتاپ قورى كوبەيدى. ءار اي سايىن 6-7 كىتاپ الامىز. سۋرەت سالعاندى قاتتى ۇناتادى. مەنىمەن بولعان وقيعالاردى, كەيبىر ماسەلەلەردى اشىپ تالقىلايدى. پىكىرىمىز كەلىسپەي قالاتىن تۇستار دا بولادى. ونداي كەزدە «قانداي پىكىردە بولساڭ دا, ءوز كوزقاراسىڭنان تايما, بۇل – مەنىڭ جەكە پىكىرىم» دەپ ايتىپ تۇسىندىرۋگە تىرىسامىن. سەبەبى ەكەۋارا سەنىم ماڭىزدى. مەن ءۇشىن قىزىمنىڭ دەنى ساۋ, سۇيگەن كاسىبىمەن اينالىسىپ, باقىتتى بولۋى ماڭىزدى. اتا-انانىڭ باقىتى دا وسى دەپ بىلەمىن.
ايزادا جايىققىزى
