ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە داستۇرگە اينالعان ستۋدەنتتىك ۆەنا بالى ءوتتى. كەشتى تاماشالاۋعا 5000-عا جۋىق كورەرمەن جينالدى. ولاردىڭ ىشىندە وقىتۋشىلار, ستۋدەنتتەر جانە ارنايى شاقىرىلعان قوناقتار بولدى.ەۋرازيا ۇلتتىق ۋنيۆەرسيتەتى استاناداعى وقۋ ورىندارى ىشىندە ۆەنا بالىن ۇيىمداستىرعان العاشقى ۋنيۆەرسيتەت بولاتىن. «ءار حانشايىمنىڭ ءومىرى ەرتەگىدەي بولۋ كەرەك» دەگەن ۇرانمەن باستالعان بۇل كەش ۋنيۆەرسيتەت اكىمشىلىگىنىڭ ۇيىمداستىرۋىمەن وسىمەن ءۇشىنشى مارتە وتكىزىلىپ وتىر. ۇمىتكەرلەر ادەتتەگىدەي كاستينگ ارقىلى انىقتالدى. ەكى كۇنگە سوزىلعان ىرىكتەۋگە 700-دەن استام ستۋدەنت قاتىسىپ, ناتيجەسىندە ۆالس بيلەۋدەن ەرەكشە كوزگە تۇسكەن 38 جۇپ ىرىكتەلدى. ولاردىڭ باسىم كوپشىلىگى ءى كۋرس ستۋدەنتتەرى ەكەن. بال تالابى بويىنشا بويجەتكەندەر اق ءتۇستى سالتانات كويلەگىن كيىپ, قولدارىنا گۇل شوعىن ۇستادى, ال, جىگىتتەردىڭ ۇستىندە قارا ءتۇستى فراك.
كەش شىمىلدىعى ايگىلى پولونەز بيىمەن اشىلدى. اۋەن ىرعاعىمەن اسەم بيلەگەن قاتىسۋشىلاردىڭ قيمىل-قوزعالىسىنا قاراپ, كوز الدىڭا ەرىكسىز ايدىن كولدە قالىقتاپ جۇزگەن اققۋلار بەينەسى كەلەدى. پولونەزدەن سوڭ «اي- ارۋ» توبى, اسانباي اقمەڭتاەۆ, ايىم قاليبەكوۆا سىندى ونەرپاز ستۋدەنتتەر ءان شىرقاپ, مەرەكەلىك كوڭىلدى قىزدىرا ءتۇستى.
«ۆەنا بالىنا قاتىسۋ ارمانىم بولاتىن. باقىتىما وراي, تالعات ەكەۋمىزدىڭ ءبيىمىز قازىلار القاسىنا ۇناپ, ىرىكتەۋدەن وتتىك. ەرتەگى الەمىندە ءجۇرگەندەيمىن. بۇل بال ۋنيۆەرسيتەتتە ەمەس, ءبىر ءزاۋلىم ساراي ىشىندە بولىپ جاتقانداي» دەيدى ءىV كۋرس ستۋدەنتى توعجان ەسنيازوۆا. كەش سوڭىندا قاتىسۋشىلارمەن قوسا, بارلىق قوناقتار قازاق ءۆالسىنىڭ كورولى – ءشامشى قالداياقوۆتىڭ «كەشىكپەي كەلەم دەپ ەڭ» انىنە بيلەدى.
ءمادينا جاقىپ
