استانادا قوعامدىق كولىككە قاتىستى شەشىمىن كۇتەتىن ماسەلەلەر بار. قالا اكىمى اسەت يسەكەشەۆتىڭ توراعالىعىمەن وتكەن وتىرىستا شاھار باسشىسى وسى جۇمىسقا جاۋاپتى ءوزىنىڭ ورىنباسارىن, كولىك جانە جول-كولىك ينفراقۇرىلىمىن دامىتۋ باسقارماسىنىڭ باسشىسىن, «استانا LRT» جشس پەن استانالىق اۆتوبۋس پاركتەرىن قاتتى سىنعا الدى. الەۋمەتتىك جەلى مەن «iKomek» جەدەل ارەكەت ەتۋ ورتالىعى ارقىلى كەلىپ تۇسەتىن ەلوردا تۇرعىندارىنىڭ پىكىرلەرىن ۇنەمى قاراپ وتىراتىنىن ايتىپ ءوتتى.
«بارلىق داۋلى ماسەلەنى وقۋ جىلى باستالماي تۇرىپ شەشۋ كەرەك ەدى. جۇمىس ىستەمەي تۇرعان ۆاليداتورلارعا بولا ادامدارعا اۆتوبۋس كۇتتىرىپ قويۋ سىلتاۋ ەمەس» دەدى اسەت يسەكەشەۆ.
اكىمنىڭ ايتۋىنشا, قوعامدىق كولىكتىڭ جۇمىسىن سۋبسيديالاۋعا قارجىنى مەملەكەت قاجەتتى كولەمدە بولگەن. جەلىدەگى اۆتوبۋستاردىڭ شىعۋىن 90-95 پايىز قامتي المايتىن اۆتوپاركتەر مەن استانالىق جولاۋشىلاردىڭ جايلىلىعى مەن قاۋىپسىزدىك سەرۆيسىن قامتاماسىز ەتە الماعاندارمەن كەلىسىمشارت بۇزىلىپ, ولاردىڭ ورنىن باسقا اۆتوپاركتەر الماستىرادى.
قالا باسشىسى بارلىق ۆاليداتورلاردىڭ جۇمىسىن رەتكە كەلتىرۋگە تاپسىرما بەردى. ولاي بولماعان جاعدايدا, باعدارداعى كولىك سانىن قىسقارتپاستان بارلىق جولاۋشىلاردىڭ تەگىن ءجۇرۋىن قامتاماسىز ەتۋىن تاپسىردى.
«ۆاليداتورلاردىڭ تۇراقتى جۇمىس ىستەپ تۇرۋىن قامتاماسىز ەتە الماساڭىزدار, حالىقتى
تەگىن تاسىمالداڭىزدار» دەدى ءا.يسەكەشەۆ.
اكىم اۆتوبۋس قوزعالىسىن باقىلاپ وتىراتىن GPS-مونيتورينگتىڭ جۇمىس ىستەمەيتىنىن جانە ونىڭ جولاۋشىلارعا ايتارلىقتاي قولايسىزدىق تۋعىزاتىنىن ايتتى. ونىڭ سوزىنشە, ەلەكتروندى تابلونىڭ ايىرماشىلىعى 3-5 مينۋتتان اسپاۋى ءتيىس. جيىن بارىسىندا كارتانى تولتىرۋ ۇزاق ۋاقىت الاتىنى, وعان 36 ساعات كەتەتىنى دە ءسوز بولدى.
ءا.يسەكەشەۆ: «كارتانى تولتىرۋعا كەتەتىن ۋاقىت 3 ساعاتتان ارتىق بولماۋى ءتيىس. سول ءۇشىن ءىس جۇزىندە ونى بىرنەشە مينۋتتىڭ ىشىندە بولاتىنداي ەتۋى كەرەك. جۇرگىزۋشىلەر ۆاليداتوردى قايتادان جۇكتەپ, تولەمدى ەرتەرەك تۇسەتىن ەتۋى قاجەت» دەگەن تاپسىرما بەردى.
ول, سونداي-اق, «استانا LRT» جشس-كە تامىزدىڭ اياعىنا دەيىن جولاقىنى تولەۋدىڭ قوسىمشا مۇمكىندىكتەرىن قاراستىرۋدى, جولاۋشىلارعا QR-كود, سمارتفون جانە ينتەرنەت-بانكينگ ارقىلى تولەۋگە مۇمكىندىك تۋعىزۋدى تاپسىردى. جيىندا اكىم قازىرگى تۇيتكىلدەر جانە ونىڭ شەشۋ جولدارى تۋرالى ۇسىنىستاردى ايتقان استانالىق اۆتوپاركتەردىڭ باسشىلارىن دا تىڭداپ شىقتى.
اۆتوپارك وكىلدەرى ەلەكتروندى تولەم جۇيەسىن ەنگىزۋ اينالىمدى 30 پايىزعا دەيىن ۇلعايتقانىن جانە بۇل قارجىنىڭ قىزمەت كورسەتۋ ساپاسىن جاقسارتۋعا باعىتتالاتىنىن, سونىڭ ىشىندە جوعارى بىلىكتى جۇرگىزۋشىلەردىڭ سانىن كوبەيتەتىنىن ايتتى.
ەلەكتروندى تولەم جۇيەسى ەنگىزىلگەننەن كەيىن جۇرگىزۋشىلەردىڭ جەتىسپەۋشىلىگى ماسەلەسى قولعا تيەتىن جالاقىنى 300-400 مىڭ تەڭگەگە دەيىن كوتەرۋ ادىسىمەن شەشىلگەن.
اۆتوپارك باسشىلارى بيلەتسىز جۇرۋشىلەردىڭ كوبەيگەنىن بايقاپ, وسىعان بايلانىستى استانا اكىمدىگىمەن بىرلەسىپ ارەكەت ەتۋدى جانە وسى پروبلەمانى شەشۋ ءۇشىن ترانسپورت ينسپەكتسياسى مەن جول-پاترۋلدىك قىزمەتتى قوسۋدى ءوتىندى.
جيىن قورىتىندىسىندا اكىم بارلىق وكىلەتتى ورگاندارعا ايتىلعان ماسەلەلەردىڭ ءبارىن 1 قىركۇيەككە دەيىن شەشىپ, قالا باعدارلارىن قامتاماسىز ەتۋ دەڭگەيىن 90-95 پايىزعا دەيىن جەتكىزۋدى تاپسىردى. ولاي بولماعان جاعدايدا, اۆتوپاركتەرمەن كەلىسىمشارت بۇزىلاتىنىن ەسكەرتتى.
