نۇر-سۇلتان قالاسىندا قر يدم ازاماتتىق اۆياتسيا كوميتەتىنىڭ جانە ليتۆانىڭ ازاماتتىق اۆياتسيا باسشىلىعىنىڭ كەزدەسۋى ءوتتى. وندا «نۇر-سۇلتان-ۆيلنيۋس» جانە «الماتى-ۆيلنيۋس» تۇراقتى اۋە باعىتتارىن اشۋ, وعان ۆەنگريانىڭ «Wizz Air» اۋە كومپانياسىن وپەراتور ەتىپ تاعايىنداۋ ماسەلەسى قارالدى. رەيستەردى 2022 جىلدىڭ ءى توقسانىندا اشۋ جوسپارلانىپ وتىر.
مينيسترلىكتىڭ مالىمەتى بويىنشا قر يدم ازاماتتىق اۆياتسيا كوميتەتى توراعاسىنىڭ ورىنباسارى سالتانات تومپيەۆا جانە ليتۆانىڭ كولىك جانە كوممۋنيكاتسيا مينيسترلىگى جول جانە اۆياتسيالىق كولىك ساياساتى توبىنىڭ جەتەكشىسى ۆلاديسلاۆ كوندراتوۆيچ اۋە تاسىمالدارى سالاسىنداعى ىنتىماقتاستىق ماسەلەلەرىن تالقىلاپ, تۇراقتى رەيستەردى اشۋ نيەتى كورسەتىلگەن حاتتامامەن الماستى.
«بۇل ماسەلە بويىنشا تۇپكىلىكتى شەشىم ەكى ەلدىڭ كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيالارى ۇشۋعا رۇقسات بەرگەننەن كەيىن قابىلدانادى» دەلىنگەن ءباسپاسوز حابارلاماسىندا.
