تۇڭعىش پرەزيدەنت-ەلباسى نۇرسۇلتان نازارباەۆ وزبەكستان رەسپۋبليكاسىنىڭ پرەزيدەنتى شاۆكات ميرزيوەۆپەن كەزدەستى. ەلباسى شاۆكات ميرزيوەۆتى وتكەن پرەزيدەنت سايلاۋىنداعى ايقىن جەڭىسىمەن قۇتتىقتاپ, باۋىرلاس وزبەكستان حالقىنىڭ يگىلىگى جولىنداعى جاسامپاز قىزمەتىنە جاڭا تابىستار تىلەدى.
«سايلاۋالدى ناۋقان بارىسىندا ءسىز ۇسىنعان «جاڭا وزبەكستان» ستراتەگيالىق باعدارلاماسىندا ناقتى ماقساتتار مەن مىندەتتەر ايقىندالعان. حالىق مەملەكەتتىڭ قاي باعىتتا دامىپ كەلە جاتقانىن ءبىلىپ وتىرۋعا ءتيىس. كەزىندە مەن دە «قازاقستان – 2030» ستراتەگياسىن, كەيىن ەلىمىزدىڭ 2050 جىلعا دەيىنگى دامۋ باعدارلاماسىن ۇسىنعان ەدىم. مەن مەملەكەت باسشىسى لاۋازىمىندا بولعان جىلدارى ءاردايىم ءبىزدىڭ ەلدەرىمىز اراسىنداعى ەكىجاقتى بايلانىستاردى دامىتۋعا باسا ءمان بەردىم. ءسىز مۇنى جاقسى بىلەسىز» دەدى تۇڭعىش پرەزيدەنت.
ەلباسى بۇگىن ەكى ەل باسشىلارى قول قويعان وداقتاستىق بايلانىستار تۋرالى دەكلاراتسيانىڭ ماڭىزىنا توقتالىپ, قازاقستان مەن وزبەكستان قاتىناستارىنىڭ جاڭا پاراعى اشىلعانىن اتاپ ءوتتى. «ءبىزدى ورتاق تاريحىمىز, مادەنيەتىمىز بەن سالت-ءداستۇرىمىز بايلانىستىرادى. ەلدەرىمىزدىڭ اراسىنداعى دوستىق قارىم-قاتىناستىڭ ماڭىزى زور. ول تۋىنداعان ماسەلەلەردى شەشۋگە سەپتىگىن تيگىزەدى. وزىڭىزگە ءمالىم, مەن وڭىرىمىزدەگى بەس مەملەكەتتى ەكونوميكالىق كەڭەسكە بىرىكتىرۋگە تىرىستىم. سول ءۇشىن ورتالىق ازيا ەلدەرى باسشىلارىنىڭ كونسۋلتاتيۆتىك كەڭەسىن قۇرۋدى ۇسىندىم. وسى باستامانى قولداعانىڭىز ءۇشىن سىزگە ريزاشىلىعىمدى بىلدىرەمىن» دەدى نۇرسۇلتان نازارباەۆ.
ءوز كەزەگىندە ش.ميرزيوەۆ قازاقستاننىڭ بارلىق جەتىستىكتەرىنە تۇڭعىش پرەزيدەنتتىڭ ساليقالى ساياساتىنىڭ ارقاسىندا قول جەتكىزىلگەنىن ايتتى. سونىمەن قاتار ەلباسىنىڭ قازاقستان – وزبەكستان ستراتەگيالىق ىنتىماقتاستىق قاتىناستارىنىڭ قالىپتاسۋى مەن دامۋىنا قوسقان سۇبەلى ۇلەسىنە باسا ءمان بەردى. «تاۋەلسىزدىكتىڭ 30 جىلى ىشىندە ءسىز قازىرگى قارىم-قاتىناسىمىزدىڭ نەگىزىن قالادىڭىز. ەلدەرىمىز اراسىندا ءاردايىم اشىق ءارى سەنىمدى بايلانىس بولسىن دەدىڭىز. سوڭعى بەس جىلدا وسى باعىتتا سەرپىلىس بار ەكەنىن بايقاپ وتىرمىز. سىزبەن بىرگە جۇمىس ىستەي باستاعان كەزدە وزبەكستان مەن قازاقستان اراسىنداعى ساۋدا اينالىمى 317 ميلليون دوللار بولاتىن, قازىر ول 4,5 ميلليارد دوللاردان اسادى. بۇگىن قاسىم-جومارت كەمەلۇلى توقاەۆپەن الدىمىزعا بۇل كورسەتكىشتى ءۇش-ءتورت جىلدا 10 ميلليارد دوللارعا جەتكىزۋ تۋرالى ماڭىزدى ماقسات قويدىق» دەدى وزبەكستان پرەزيدەنتى.
