پرەزيدەنتتىككە ۇمىتكەر سالتانات تۇرسىنبەكوۆا تۇركىستان وبلىسىنداعى 1100 ادام ەڭبەك ەتەتىن كەنتاۋ ترانسفورماتور زاۋىتىنا باردى. بۇل – تمد-داعى ترانسفورماتورلىق جابدىقتار شىعاراتىن ءىرى كاسىپورىننىڭ ءبىرى.
جەتەكشى قازاقستاندىق ءوندىرۋشى ەكونوميكانىڭ بارلىق سالالارىنا, سونىڭ ىشىندە ەلەكتر ەنەرگەتيكاسى, مەتاللۋرگيا, ماشينا جاساۋ, كولىك, مۇناي-گاز كەشەنى, تۇرعىن ءۇي-كوممۋنالدىق سەكتورعا ءونىم جەتكىزەدى. ۇمىتكەر جۇمىسشىلاردىڭ قۇقىعى دەپۋتات, شەنەۋنىكتەردەن كەم ەمەس دارەجەدە قورعالۋى قاجەتتىگىن قاداپ ايتتى.
زاۋىتتاعى بارلىق جۇمىسشىلاردىڭ 30 پايىزىن ايەلدەر قۇرايدى. كەزدەسۋدە جۇمىسشىلاردىڭ ءبىرى ءسوز الىپ, كۇن سايىن ازىق-تۇلىك, تۇرمىس زاتتارىنىڭ كۇرت قىمباتتاپ, ال جالاقىنىڭ ازدىعىن تىلگە تيەك ەتتى.
تاعى ءبىر قىزمەتكەر سالتانات تۇرسىنبەكوۆاعا ءوزىنىڭ سايلاۋالدى باعدارلاماسىندا جۇمىس ىستەيتىن ايەلدەردىڭ زەينەت جاسىن 58 جاسقا دەيىن تومەندەتۋدى ۇسىنعانى ءۇشىن العىس ايتتى.
«وسىعان دەيىن جالپى ايەلدەر قاۋىمى زەينەت جاسىن 58-گە دەيىن شەگەرۋدى سۇراپ, كوپ ءوتىنىش جاسادىق. بىراق 61 جاسقا عانا قىسقارتتى. تىم بولماعاندا, 60 جاس دەپ بەلگىلەگەنى ءجون ەدى» دەدى ول.
سالتانات تۇرسىنبەكوۆا ەڭبەك ەتىپ جۇرگەن ازاماتتاردىڭ ءومىرىن جاقسى جاققا وزگەرتكىسى كەلەتىنىن اتاپ ايتتى. ۇمىتكەر ءوزىنىڭ سايلاۋالدى باعدارلاماسىنان ۇزىندىلەرمەن ءبولىستى, وندا ەڭ تومەنگى جالاقى مەن ەڭ تومەنگى كۇنكورىس دەڭگەيىن ارتتىرۋ (زەينەتاقى جيناقتارى, جاردەماقىلار جانە شاكىرتاقىلار), كوپبالالى جانە قيىن ومىرلىك جاعدايداعى وتباسىلاردىڭ قارىزدارىن ەسەپتەن شىعارۋ, جالعىزباستىلاردىڭ مارتەبەسىن زاڭنامالىق تۇرعىدان بەكىتۋ تۋرالى ۇسىنىستار ايتىلدى. تولىق ەمەس وتباسى مەن جاس وتباسىلارعا يپوتەكا الۋ كەزىندە جەڭىلدىكتەر مەن سۋبسيديالار ەنگىزۋ جانە ت. ب. ۇسىنىسىن جەتكىزدى.
