ەندى استانالىقتار مەن قالا قوناقتارى زەينەتاقىعا قاتىستى كەز كەلگەن سۇراق جونىندە «109» نومىرىنە حابارلاسا الادى. بۇل تۋرالى بىرىڭعاي جيناقتاۋشى زەينەتاقى قورى مەن iKomek قالالىق مونيتورينگ جانە جەدەل ارەكەت ەتۋ ورتالىعى اراسىندا كەلىسىم جاسالدى.
سونىمەن قاتار بىرىڭعاي جيناقتاۋشى زەينەتاقى قورىنىڭ call-ورتالىعى دا بۇرىنعىسىنشا جۇمىسىن جالعاستىرا بەرەدى. تەك 1418 نومىرىنە قازاقستاننىڭ بارلىق وڭىرىنەن حابارلاساتىندىقتان, iKomek ورتالىعىنىڭ «109» ءنومىرى استانالىقتار ءۇشىن قوسىمشا بايلانىس قۇرالى رەتىندە قولدانىلاتىنىن مالىمدەدى ءوزارا كەلىسىمگە قول قويعان «بجزق» اق استانا قالاسى فيليالىنىڭ باسقارۋشى ديرەكتورى مۇرات ءشارىپوۆ پەن iKomek قالالىق مونيتورينگ جانە جەدەل ارەكەت ەتۋ ورتالىعىنىڭ ديرەكتورى جاننات ءدۇبىروۆا. سپيكەرلەردىڭ ايتۋىنشا, الداعى ۋاقىتتا «109» نومىرىنە قوڭىراۋ شالعانداردى بجزق-نىڭ call-ورتالىعىنا تىكەلەي جالعاۋ مۇمكىندىگى دە قاراستىرىلادى.
– iKomek ورتالىعىنىڭ 60 وپەراتورى ەلوردالىقتارعا 770-تەن اسا قىزمەت ءتۇرى بويىنشا كۇندىز-ءتۇنى قىزمەت كورسەتەدى. كەز كەلگەن مەكەمەمەن كەلىسىم جاساسقاندا الدىمەن وپەراتورلارعا سول سالا كەڭىنەن وقىتىلادى. سوندىقتان ولار تۇرعىنداردى تولعاندىرعان كەز كەلگەن ساۋالعا جاۋاپ بەرە الادى. ال زەينەتاقى ءار ادام ءۇشىن ماڭىزدى بولعاندىقتان, استانا جۇرتىنا بۇل كەلىسىمنىڭ پايداسى مول بولادى دەپ ويلايمىن, – دەدى جاننات ءدۇبىروۆا.
ءوز كەزەگىندە Whatsapp جەلىسى مەن سايت ارقىلى دا سۇراق قويۋعا بولاتىنىن تىلگە تيەك ەتكەن مۇرات ءشارىپوۆ «بىرىڭعاي جيناقتاۋشى زەينەتاقى قورى» اق مەن استانا قالاسى اكىمدىگىنىڭ اراسىنداعى مەموراندۋم اياسىندا جەرگىلىكتى بيلىكپەن بىرلەسىپ ءتۇرلى شارالاردىڭ وتكىزىلىپ جاتقانىن ايتتى.
