جاقىندا ارداگەر ۇستاز, بيولوگيا عىلىمدارىنىڭ كانديداتى روزا ماۋسىمباەۆا مەرەيلى 70 جاسقا تولدى. روزا ماحمەتقىزى زەينەت جاسىندا بولسا دا, سالاۋاتتى ءومىر سالتىن ۇستانىپ, بەلسەندى ۇزاق ءومىر ءسۇرۋ ورتالىعىندا ءبولىم باسشىسىنىڭ قىزمەتىن اتقارادى.
زەينەتكەرلىككە شىققان سوڭ الەۋمەتتىك سالاداعى قىزمەتىن ۆولونتەرلىكتەن باستاعان. استانا قالاسىنىڭ سارىارقا اۋداندىق ارداگەرلەر كەڭەسى جانىنداعى بوس ۋاقىتتى ۇيىمداستىرۋ ورتالىعىندا قالا زەينەتكەرلەرىنە ساۋىقتىرۋ گيمناستيكاسىنان ساباق بەردى. 2021 جىلى بەلسەندى ۇزاق ءومىر ءسۇرۋ ورتالىعىنىڭ ديرەكتورى مۇحتار ەركەتاەۆتىڭ شاقىرتۋىمەن ورتالىقتىڭ
سارىارقا اۋدانىنداعى بولىمىنە پسيحولوگ بولىپ جۇمىسقا ورنالاستى. سودان بەرى بەلسەندى ۇزاق ءومىر ءسۇرۋ ورتالىعىنىڭ ۇجىمىندا تاپجىلماي ەڭبەك ەتىپ, ۇجىمداعى جاستارعا ۇلگى-ونەگە كورسەتۋدە.
بۇگىندە روزا ماۋسىمباەۆا جەتەكشىلىك ەتەتىن ءبولىم استانا قالاسىنداعى 5 اۋدان بويىنشا قىزمەت الۋشىلارعا ساپالى الەۋمەتتىك قىزمەت كورسەتۋدى ۇيلەستىرۋدە.
«بەلسەندى ۇزاق ءومىر ءسۇرۋ ورتالىقتارىنىڭ باستى ماقساتتارىنىڭ ءبىرى – زەينەت جاستاعى ادامداردى الەۋمەتتەندىرۋ ءۇشىن قولجەتىمدى جاعدايلار جاساۋ. بۇگىندە ەگدە جاستاعى ادامداردىڭ بەلسەندى ءومىر سالتىن ۇزارتۋ موتيۆاتسياسىن قالىپتاستىرۋ ءۇشىن 6 ءتۇرلى الەۋمەتتىك كومەك كورسەتەمىز. بۇل – الەۋمەتتىك ساۋىقتاندىرۋ, الەۋمەتتىك-مەديتسينالىق, الەۋمەتتىك-ەكونوميكالىق, الەۋمەتتىك ەڭبەك, الەۋمەتتىك بوس ۋاقىت جانە ت.ب. قىزمەتتەر. ورتالىقتاعى دارىگەر, پسيحولوگ ماماندارىمىز قىزمەت الۋشىلاردى العاشقى مەديتسينالىق تەكسەرۋدەن وتكىزىپ, پسيحولوگيالىق باقىلاۋدا ۇستايدى. بۇل زەينەتكەرلەرىمىزدىڭ فيزيكالىق جانە ەموتسيونالدىق جاعدايىن ساقتاۋعا مۇمكىندىك بەرەدى» دەيدى روزا ماحمەتقىزى.
روزا ماۋسىمباەۆا – الەۋمەتتىك سالانىڭ بىلىكتى مامانى عانا ەمەس, پەداگوگيكالىق جانە عىلىم جولىندا 30 جىل قىزمەت ەتكەن بىلىكتى ۇستاز, عالىم. مەديتسينا سالاسىندا وقىتۋشىلىق قىزمەت اتقاردى. ماماندىعى بويىنشا – پسيحوفيزيولوگ. 50-دەن استام عىلىمي جاريالانىمداردىڭ اۆتورى. ءوزىنىڭ مەديتسينا سالاسىندا جيناقتاعان ءبىلىمى مەن تاجىريبەسىن الەۋمەتتىك سالادا ۇتىمدى پايدالانۋدا.
«پسيحوفيزيولوگ مامان رەتىندە جيناقتاعان تاجىريبەمدى بۇگىندە ەگدە جاستاعى ادامداردىڭ فيزيكالىق دەنساۋلىعىن نىعايتۋعا جۇمساپ ءجۇرمىن. مەنىڭ جۇمىس تاجىريبەم جاتتىعۋلار مەن ادىستەردى تاڭداۋدىڭ ادىستەمەلىك نەگىزدەرىن ازىرلەۋدە, سونداي-اق قىزمەت الۋشىلارعا ەموتسيونالدىق تۇرعىدان كومەك كورسەتۋگە مۇمكىندىك بەردى. ءوزىم زەينەتكەر بولعاسىن, زەينەت جاستاعى ادامداردىڭ جاعدايىن جاقسى تۇسىنەمىن» دەپ ءسوزىن تۇيىندەدى روزا ماۋسىمباەۆا.
مەرۋەرت قايىرتاسقىزى
