جاھاننىڭ جاس فيزيكتەرى جينالدى

كەشە بەيبىتشىلىك جانە كەلىسىم سارايىندا وقۋشىلار اراسىندا فيزيكا ءپانى بويىنشا 45-ءىنشى حالىقارالىق وليمپيادانىڭ اشىلۋ ءراسىمى ءوتتى.

سالتاناتتى جيىندا ءسوز سويلەگەن قر ءبىلىم جانە عىلىم ءمينيسترى اسلان ءسارىنجىپوۆ ۇيىمداستىرىلىپ وتىرعان اتالمىش شارانىڭ عىلىم مەن ءبىلىمدى تانۋداعى ماڭىزدىلىعىن ايتىپ, ءوز ەلىنىڭ ينتەللەكتۋالدىق الەۋەتىن كورسەتەتىن دارىندى بالالارعا جەڭىس جولىندا ساتتىلىك تىلەدى. ونىڭ ايتۋىنشا, ەلوردادا ءوتىپ جاتقان IPHO وليمپياداسىنا قاتىسۋشى مەملەكەتتەردىڭ سانى رەكوردتىق كورسەتكىشكە يە بولىپ وتىر. ياعني, الەمنىڭ 85 ەلىنەن كەلگەن 700-گە جۋىق قاتىسۋشى 21 شىلدەگە دەيىن نازارباەۆ ۋنيۆەرسيتەتى بازاسىندا بىلىمدەرىن سىناماق. قازاقستان قۇراماسى اتىنان ءامىر ءبىرالين, يسا دانات, نۇربەك دىنمۇحاممەد, نۇريسلام تۇرسىنبەك جانە داۋلەت قۇرمانتاەۆ عىلىم بايگەسىندە ەل نامىسىن قورعايدى.

«عىلىمدى قىزىعۋشىلىق دامىتادى. بىراق, وكىنىشكە قاراي, وعان اۋەستەنۋشىلەر ءار سىنىپتا بەس-التاۋ عانا. بۇل وليمپيادا – وقۋشىلاردىڭ عىلىمي ىرگەتاسى. ماڭىزدىسى قاي جەردەن كەلگەنىڭ, نەشىنشى ورىن العانىڭ ەمەس, ويى جۇيرىك, ەڭ ۇزدىك وقۋشىلاردىڭ كەزدەسىپ, پىكىر الماسىپ, تاجىريبەلەرىمەن ءبولىسىپ, عىلىمي بايلانىس ورناتۋلارى. ويتكەنى, وزگە وقىمىستىلارمەن بولعان جاقسى قارىم-قاتىناس ەين­شتەيننىڭ وزىنە جاڭالىق اشۋعا ءبىر سەپتىگىن تيگىزگەن ەدى» دەيدى حا­لىقارالىق وليمپيادا پرەزيدەنتى حانس يوردانس.

تاۋەلسىزدىك العالى قازاقستان بۇل وليمپياداعا 17 رەت قاتىسىپ, جەڭىس قورجىنىن 8 التىن, 20 كۇمىس جانە 17 قولامەن تولتىرعان ەكەن. «ءوزىمىزدىڭ ەل – گوللانديامەن سالىستىراتىن بولسام, قازاقستان وقۋشىلارىنىڭ دەڭگەيى جوعارى. بۇل – ۇستاز بەرگەن ساپالى ءبىلىمنىڭ ايقىن ايعاعى. التىندى سوڭعى رەت 80-جىلدارى العانبىز. ودان كەيىن قولانىڭ وزىنە اجەپتاۋىر ءماز بولامىز. سونداي-اق, ءبىر بايقاعانىم, باتىس ەلدەرىنە جەتىستىككە جەتەلەيتىن درايۆ جەتىس­­پەيدى. ال, ونداي قۇلشىنىس قا­زاقستان قاتىسۋشىلارىنان ەرەكشە بايقالادى» دەپ حانس يوردانس ءبىز­دىڭ وقۋشىلارعا ءوز باعاسىن بەردى.

اتاپ ايتار بولساق, وليمپيادا تەوريالىق جانە تاجىريبەلىك كەزەڭنەن تۇرادى. العاشقى كەزەڭدە 3 ەسەپتى شەشۋگە 5 ساعات ۋاقىت بەرىلەدى. ال, تاجىريبە سانى ارنايى قۇرىلعىلارعا بايلانىستى ءالى دە ناقتىلانا تۇسپەك.

ءمادينا جاقىپ