ورتالىق كوممۋنيكاتسيالار قىزمەتىندە وتكەن «حالىقتى الەۋمەتتىك قورعاۋ سالاسىنداعى قر زاڭنامالارى» تۋرالى بريفينگ بارىسىندا قر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا مەملەكەت باسشىسىنىڭ تاپسىرماسى بويىنشا حالىقارالىق تاجىريبەلەر نەگىزىندە ازاماتتىق قىزمەتكەرلەرگە ەڭبەكاقى تولەۋدىڭ جاڭا مودەلى جاسالىپ جاتقاندىعىن مالىمدەدى.
بۇل جوبا قىزمەتكەرلەر لاۋازىمىن ءبىلىم مەن بىلىكتىلىككە, اتقارىلاتىن جۇمىستىڭ كۇردەلىلىگى مەن جاۋاپكەرشىلىك دەڭگەيىنە بايلانىستى ءتورت ساناتقا جىكتەيدى: باسقارۋشى, نەگىزگى, اكىمشىلىك-شارۋاشىلىق جانە تەحنيكالىق قىزمەتكەرلەر. ولاردىڭ جالاقىسى كوەففيتسيەنتتەردىڭ ارنايى كەستەسى ارقىلى ەسەپتەلمەك. بۇل كەستە بارلىق سالاداعى لاۋازىمدارعا ورتاق بولۋى كوزدەلۋدە. «ەڭبەكاقى تولەۋدىڭ جاڭا مودەلى ءۇش كەزەڭ بويىنشا جۇزەگە اسادى. ءبىرىنشى كەزەڭدە ەڭبەكاقى ءبىلىم جانە بىلىك دەڭگەيىنە, لاۋازىم دارەجەسىنە قاراي تولەنسە, ەكىنشىسىندە ەڭبەكتىڭ سوڭعى ناتيجەسى ەسكەرىلىپ, ۇسىنىلعان قىزمەت ساپاسى بويىنشا تولەم جۇيەسىن ىنتالاندىراتىن كومپونەنتتەر ەنگىزىلەدى. ءۇشىنشى كەزەڭدە ازاماتتىق قىزمەتشىلەرگە سارالانعان قوسىمشا تولەم تولەۋدىڭ ماقساتتىلىعى, قاجەتتىلىگى, مۇمكىندىگى سول وڭىردەگى ناقتى قۇنىنا قاراي قاراستىرىلادى» دەيدى مينيستر تامارا قاسىمقىزى. ونىڭ ايتۋىنشا, بۇل جوبا ءبىلىم بەرۋ سالاسىنداعى جۇمىسشىلار جالاقىسىن – 29%-عا, دەنساۋلىق ساقتاۋ قىزمەتكەرلەرىنىكىن – 28%-عا, باسقا دا ازاماتتىق قىزمەتكەرلەر ەڭبەكاقىسىن – 40%-عا ارتتىرۋعا مۇمكىندىك بەرەدى.
ازاماتتىق قىزمەتكەرلەرگە ەڭبەكاقى تولەۋدىڭ جاڭا مودەلى 2015 جىلدىڭ 1 شىلدەسىنەن باستاپ جۇزەگە اسادى. ونى ەنگىزۋگە رەسپۋبليكا قازىناسىنان جارتى جىلعا – 139 ملرد تەڭگە, ال ءبىر جىلعا – 278 ملرد تەڭگە بولىنبەك.
ءمادينا جاقىپ
