نۇرسۇلتان قالاسىنىڭ اكىمى التاي كولگىنوۆ پەن ەلىمىزدىڭ سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆتىڭ قاتىسۋىمەن ەسىل اۋدانىنىڭ اكىمدىگىندە «Open اkimat» حالىققا قىزمەت كورسەتۋ الاڭى اشىلدى. «ءبىر تەرەزە» قاعيداتى بويىنشا قىزمەت كورسەتەتىن الاڭدا ازاماتتار ءارتۇرلى ۇيىمداردىڭ, سونىڭ ىشىندە تۇرعىن ءۇي قۇرىلىس جيناق بانكى, تۇرعىن ءۇي قورى, جۇمىسپەن قامتۋ ورتالىعى, «قازپوشتا» اق جانە اۋدان اكىمدىگى قىزمەتكەرلەرىنىڭ كومەگى مەن كەڭەسىنە جۇگىنە الادى.
– مەملەكەت باسشىسى ءوز سوزىندە اكىمدىكتىڭ اشىق تۇردە جۇمىس ىستەۋىن ايتىپ ءوتتى. بۇل الاڭنىڭ دا يدەياسى سول – اشىقتىق جانە قولجەتىمدىلىك. سونىمەن قاتار سىبايلاس جەمقورلىقتىڭ ورىن الۋىنا جول بەرمەۋ. ياعني حالىققا قىزمەت جابىق كابينەتتە ەمەس, اشىق الاڭدا كورسەتىلەدى. سونداي-اق بۇل جەردى ماۋسىمدىق سۇراقتاردى شەشۋ الاڭى دەپ ايتۋعا بولادى. مىسالى, جازدىگۇنى بالالاردى مەكتەپكە دايىندىق جۇمىستارى, قازىرگى ۋاقىتتا قىسقا دايىندىق ماسەلەلەرى, ال قىستىگۇنى قار تازالاۋ, پيك-ءتىڭ قىزمەتىنە قاتىستى سۇراقتار ءدال وسى جەردە شەشىلەتىن بولادى. اشىق اكىمدىكتەن بولەك, بىزدە بارلىق اۋداندىق اكىمدىكتەردە «ادالدىق الاڭى» جۇمىس ىستەيدى. ول جەردە دە حالىققا كورسەتىلەتىن قىزمەتتىڭ ادال ءارى اشىق تۇردە جۇزەگە اسىرىلۋى قامتاماسىز ەتىلەدى, – دەدى التاي كولگىنوۆ الاڭنىڭ اشىلۋ سالتاناتىندا.
اليك شپەكباەۆ ءوز سوزىندە قازىرگى كۇنى ەل بويىنشا 400-دەن استام وسى سەكىلدى فرونت-كەڭسەلەر حالىققا قىزمەت كورسەتىپ جاتقانىن اتاپ ءوتتى. الدىندا وسىنداي الاڭ سارىارقا اۋدانىندا اشىلعان. ەندى الماتى جانە بايقوڭىر اۋداندارىندا وسى سەكىلدى ورتالىق اشىلۋى كەرەك.
ال جاڭا ورتالىقتا قابىلداۋ جانە قىزمەت كورسەتۋ بولمەلەرىمەن قاتار بالالار بۇرىشى, كىتاپحانا جانە وزىنە-ءوزى قىزمەت كورسەتۋ ايماعى دا بار. ا.كولگىنوۆ پەن ا.شپەكباەۆ «Open akimat» بازاسىندا ازاماتتاردى قابىلداپ, ولاردىڭ ماسەلەلەرىن جەكە باقىلاۋعا الدى.
وسى كۇنى نۇر-سۇلتان قالاسىنىڭ اكىمدىگىندە قالا باسشىسى التاي كولگىنوۆتىڭ توراعالىعىمەن سىبايلاس جەمقورلىققا قارسى ارەكەت ەتۋ بويىنشا كەڭەيتىلگەن كەڭەس ءوتتى.
كەڭەس بارىسىندا سىبايلاس جەمقورلىققا قارسى ءىس-قيمىل اگەنتتىگىنىڭ قالالىق دەپارتامەنت باسشىلىعى سىبايلاس جەمقورلىققا قاتىستى قۇقىق بۇزۋشىلىقتار ستاتيستيكاسىن جاريا ەتىپ, جۇرگىزىلىپ جاتقان جۇمىستىڭ ناتيجەسىن جەتكىزدى.
كەڭەس قورىتىندىسىندا قالا اكىمى ءوز ورىنباسارلارى مەن باسقارما باسشىلارىنا اي سايىن سىبايلاس جەمقورلىققا قارسى ءىس-قيمىل اگەنتتىگى مەن پروكۋراتۋرا وكىلدەرىمەن «ادالدىق الاڭى» الاڭىندا كەزدەسىپ, تاۋەكەلدەردى زەردەلەپ, سىبايلاس جەمقورلىقتىڭ الدىن الۋ شارالارىن قولدانۋدى تاپسىردى. كەڭەس اكىمنىڭ قاتىسۋىمەن توقسان سايىن وتكىزىلەتىن بولادى.
