نۇر-سۇلتان قالاسى تىلدەردى دامىتۋ جانە ارحيۆ ءىسى باسقارماسى مەن «رۋحانيات» ورتالىعى «MENİŃ TİLİM – ULY DALA RÝHY» ءححى قالالىق ءتىل فەستيۆالى اياسىندا «OI-ZEREK» ينتەللەكتۋالدى ءتىل سايىسىن وتكىزدى.
بەس كەزەڭنەن تۇراتىن سايىسقا مەكەمەلەر مەن ۇيىمداردان قۇرالعان ءتورت توپ ءوزارا سىنعا ءتۇستى. «OI-ZEREK» ينتەللەكتۋالدى ءتىل سايىسىنا فيلولوگيا عىلىمدارىنىڭ دوكتورى, پروفەسسور شەرۋباي قۇرمانبايۇلى, «ءتىل-قازىنا» ۇلتتىق عىلىمي-پراكتيكالىق ورتالىعى ورفوگرافيا باسقارماسىنىڭ عىلىمي قىزمەتكەرى نازىم نۇرعازىقىزى, بەلگىلى بلوگەر ارشات وراز قازىلىق ەتتى.
سايىس ناتيجەسىندە 1-ورىندى م.جۇماباەۆ اتىنداعى «القا» ادەبي بىرلەستىگىنىڭ «القا» توبى قانجىعاسىنا بايلادى. «ينتەللەكتۋالدى توپ» اتالىمىندا «استانا كونۆەنشن بيۋرو» جشس-ءنىڭ «ساياحات» توبى, «ۇشقىر وي» اتالىمىندا «استانا جاستارى» كوممۋنالدىق مەملەكەتتىك مەكەمەسىنىڭ «بولاشاق» توبى, «ءبىلىمدى مىڭدى جىعار» اتالىمىندا «جاس وتان» جاستار قاناتى ەلوردالىق فيليالىنىڭ «جاستار ميكس» توبى جەڭىمپاز اتاندى.
«بۇل سايىستىڭ باستى ماقساتى جاستارعا قازاق ءتىلىنىڭ قۇندىلىقتارىن دارىپتەي وتىرىپ, قازاقشا ويلاۋعا, جازۋعا ىقپال ەتۋ بولدى. ءتىل تازالىعى مەن مادەنيەتىن ساقتاۋعا ۇندەدىك. سونىمەن قاتار لاتىن ءالىپبيىن تەز مەڭگەرۋگە سەپتىك تيگىزۋ بولدى. سايىس بارىسىندا مەكەمە قىزمەتكەرلەرىنىڭ جاڭا الىپبيگە قىزىعۋشىلىعىن بايقادىق» دەدى ءىس-شارانىڭ نەگىزگى ۇيىمداستىرۋشىلارىنىڭ ءبىرى «رۋحانيات» ورتالىعىنىڭ باسشىسى ەرجان ەڭسەباي.
جادىرا مۇراتبەكوۆا
