كەشە استانا قالاسىنىڭ اكىمى يمانعالي تاسماعامبەتوۆ №10 امبۋلاتورلىق-ەمحانالىق كەشەننىڭ اشىلۋ سالتاناتىنا قاتىستى.
«ەلىمىزدىڭ ەڭ باستى مەرەكەسى – تاۋەلسىزدىك كۇنى قارساڭىندا استانا قالاسىندا تاعى ءبىر ەمدەۋ مەكەمەسى اشىلىپ, حالىقتىڭ يگىلىگىنە بەرىلمەكشى. بۇل – «100 مەكتەپ, 100 اۋرۋحانا» مەملەكەتتىك باعدارلاماسى اياسىندا قولعا الىنعان جوبا. جالپى, دەنساۋلىق ساقتاۋ سالاسىن نىعايتۋ – كۇن تارتىبىندەگى باستى مىندەتتەردىڭ ءبىرى. بۇگىنگى ەمحانانىڭ قۇرىلىسىنا 4 ملرد تەڭگەگە جۋىق قاراجات جۇمسالدى. اتالمىش نىسان 65 مىڭعا جۋىق حالىققا قىزمەت كورسەتەدى دەپ بولجانۋدا» دەدى يمانعالي تاسماعامبەتوۆ.
زاماناۋي مەكەمەدە الدىن الا ەمدەۋ, كونسۋلتاتسيالىق-دياگنوستيكالىق ءبولىمدەر, جاستار جانە وتباسى دەنساۋلىعى ورتالىعى جۇمىس ىستەيدى. مۇندا ناۋقاستاردىڭ كەزەك سانىن وڭتايلاندىرۋ ماقساتىندا ەلەكتروندى تىركەۋ جۇيەسى ەنگىزىلگەن. سونىمەن قاتار, «Smart Astana» جوباسى بويىنشا قالا تۇرعىندارىنا بىرىڭعاي مەديتسينالىق اقپارات بەرەتىن Call-ورتالىق اشۋ جوسپارلانۋدا.
– كەشەن كوپبەيىندى ەمحانا رەتىندە جۇمىس ىستەيدى. №4 جانە №5 ەمحانالارداعى شامادان تىس جۇكتەمەنى ازايتۋعا سەپتىگىن تيگىزبەك. مەكەمەدە 22 دارىگەر-مامان جۇمىس ىستەيتىن بولادى, – دەيدى جاڭا ەمحانانىڭ باس دارىگەرى مىندەتىن اتقارۋشى اسحات يبرالوۆ.
گۇلميرا شارحانقىزى
