كەشە اقوردادا پرەزيدەنت نۇرسۇلتان نازارباەۆ ەل دامۋىنا ەڭبەگى سىڭگەن ءبىر توپ ازاماتقا قر مەملەكەتتىك سىيلىعى مەن «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعىن تاپسىردى.
مەملەكەتتىك سىيلىق الۋعا كەلگەن ازاماتتاردى ەلىمىزدىڭ ۇلى مەرەكەسى – تاۋەلسىزدىك كۇنىمەن قۇتتىقتاعان پرەزيدەنت:
– قازاقتا «ەڭبەگىنە قاراي قۇرمەتى» دەگەن قاناتتى ءسوز بار. بۇگىن, مىنە, ەلدىڭ دامۋىنا ۇلەس قوسىپ جۇرگەن ايتۋلى ازاماتتارعا ءتيىستى قۇرمەت كورسەتكەلى وتىرمىز. مۇنداي سىيلىقتاردىڭ تابىستالۋى – تاۋەلسىزدىگىمىزدىڭ ارقاسى. بۇل ءداستۇر دەربەس ەل بولۋىمىزدىڭ قادىرىن تەرەڭ سەزىندىرە تۇسەرى ءسوزسىز. قازىرگى العالى وتىرعان سىيلىقتارىڭىز – سىزدەردىڭ عانا ەمەس, تۇتاس ەلىمىزدىڭ تابىسى, – دەپ اتاپ ءوتتى.
ەڭ الدىمەن, عىلىم مەن تەحنيكا سالاسىندا ۇزدىك ناتيجەلەرگە قول جەتكىزگەن جەكەلەگەن ازاماتتار مەن ۇجىمعا مەملەكەتتىك سىيلىق تاپسىرعان ەلباسى «بۇل عالىمدارىمىزدىڭ تاۋەلسiزدiكتi تۇعىرلى ەتۋگە قوسقان ۇلەسi» دەگەن باعا بەردى.
مەملەكەتتىك سىيلىق العانداردىڭ قاتارىندا حالىقارالىق دەڭگەيدەگi ماتەماتيكالىق پروبلەمالاردى شەشۋ جولىن ۇسىنعان عالىم تىنىسبەك كالمەنوۆ, قازiرگi مەديتسينا سالاسىندا وزىق تەحنولوگيالاردى ەنگiزۋ جولىندا تەر توگىپ جۇرگەن پروفەسسور سەرiك اقشولاقوۆ باسقاراتىن رەسپۋبليكالىق نەيروحيرۋرگيا عىلىمي ورتالىعىنىڭ ۇجىمى, جالپى ۇزىن-سانى 15 ادام بار.
ال «قازاقستاننىڭ ەڭبەك سىڭىرگەن قايراتكەرى» اتاعىن ءانشى قاراقات ءابىلدينا, «ميۋزيكولا» دۋەتىنىڭ ءسوليسى كارينا ابدۋللينا, ءارتىس نۇرلان ءالىمجانوۆ, قازاقستان ديزاينەرلەرى وداعىنىڭ پرەزيدەنتى تيمۋر سۇلەيمەنوۆ, «استانا بالەت» حورەوگرافيالىق ۇجىمىنىڭ باس بالەتمەيستەرى اليلا الىشەۆا, «قازاقستان رەسپۋبليكاسى پرەزيدەنتىنىڭ تەلەراديوكەشەنى» ۇاق باس ديرەكتورى ەرلان بەكقوجين, ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ پروفەسسورى سماعۇل ەلۋباەۆ, تاعى باسقالار ەنشىلەدى.
ەلباسىنىڭ مەملەكەتتىك بەيبىتشىلىك جانە پروگرەسس سىيلىعى كورنەكتى اقىن, قوعام قايراتكەرى ولجاس سۇلەيمەنوۆكە بەرىلدى. مەملەكەت باسشىسى بەلگىلى تۇلعانىڭ ەل دامۋىنا سىڭىرگەن ەڭبەگىن ەرەكشە اتاپ ءوتتى.
قىمبات نۇرعالي
