قازاقستاندا العاش رەت ەلوردادا 4 قىركۇيەكتەن باستاپ Bolt كومپانياسى تاكسي قىزمەتىن ىسكە قوستى.
كومپانيا 2013 جىلى تالليندە قۇرىلعان. بۇگىندە ول الەمنىڭ 30 ەلىندە جولاۋشىلاردى تاسىمالداۋ قىزمەتىن كورسەتەدى. ونىڭ قىزمەت كورسەتۋ جۇيەسىنە 25 ملن كليەنت قوسىلعان, سونداي-اق 500 مىڭنان استام جۇرگىزۋشى تىركەلگەن.
«Bolt كومپانياسى ەۋروپاداعى ءىرى كولىك پلاتفورمالارىنىڭ ءبىرى بولىپ سانالادى. ءبىزدىڭ ماقساتىمىز – قالادا نەعۇرىلىم سەنىمدى, پايدالانۋى قاراپايىم ءارى قولايلى قوزعالىس قۇرالىن قۇرۋ. نۇر-سۇلتان قالاسى – Bolt سەرۆيستىك قىزمەتىن كورسەتۋدى باستاعان قازاقستانداعى العاشقى شاھار. ءبىزدىڭ بولاشاق جوسپارلارىمىز ۇلكەن» دەدى Bolt كومپانياسىنىڭ دامۋ جونىندەگى ديرەكتورى ەۆگەني بەلوۋسوۆ.
قازىرگى كۇنى كومپانيانىڭ قىزمەت كورسەتۋ سەرۆيسىنە باس قالادا 10 مىڭنان استام جۇرگىزۋشى تىركەلىپ ۇلگەرگەن. كومپانيانىڭ نەگىزگى ەرەكشەلىگى رەتىندە جۇرگىزۋشىلەرگە 12% كوميسسيامەن بەرىلەتىن جەڭىلدىك شارتتارىن ايتۋعا بولادى. ال باسقا تاسىمالداۋشىلاردا ول
18%-دان كەم ەمەس.
ە. بەلوۋسوۆتىڭ ايتۋىنشا, كومپانيا ەۋروپالىق ۇلگىدە قىزمەت كورسەتەدى. ياعني كليەنتتەرگە وتە قۇرمەتپەن قارايدى. سونداي-اق ساپا, قاۋىپسىزدىك ماسەلەلەرى تۇرعىسىندا اۆتوپاركتەرمەن تىعىز جۇمىس ىستەيدى.
پلاتفورماعا قوسىلۋ ءۇشىن جۇرگىزۋشىلەر سايتتا انكەتا تولتىرۋى جانە ءاۆتوموبيلدىڭ دەرەكتەرىن كورسەتۋى ءتيىس. كومپانيا 2000 جىلدان, كەيبىر ماركالار ءۇشىن 2010 جىلدان ەرتە شىعارىلعان كولىكتەردى قابىلدامايدى.
«Bolt – عالامدىق كومپانيا, بىراق ءبىز ءار ءوڭىردىڭ جەرگىلىكتى ەرەكشەلىكتەرىنە نازار اۋدارامىز. سوندىقتان قاي ەلدە بولسا دا جەرگىلىكتى كوماندا قىزمەت ەتەدى. ءبىز قازاقستاندا وپەراتسيالارمەن, قولداۋ كورسەتۋ قىزمەتىمەن اينالىساتىن 13 ادامنان قۇرالعان كوماندا قۇردىق» دەدى ەۆگەني بەلوۋسوۆ.
Bolt قوسىمشاسى Google Play جانە App Store الاڭدارىندا بەرىلگەن. تۇتىنۋشى قوسىمشانى وزىنە جۇكتەپ الىپ, تەلەفونى ارقىلى تىركەلسە جەتكىلىكتى. تىركەلگەن جولاۋشىلارعا ءبىرىنشى كۇننەن باستاپ 50% جەڭىلدىك بار. بونۋستىق جۇيە جۇرگىزۋشىلەر ءۇشىن دە قاراستىرىلعان. بەلسەندى جۇرگىزۋشىلەردىڭ كوميسسيا جۇكتەمەسى اناعۇرلىم جەڭىلدەيدى.
