ەل تاۋەلسىزدىگى كۇنى قارساڭىندا «جاس تۇلپار» قوزعالىسىنىڭ 50 جىلدىعىنا ارنالعان ءىس-شارالار اياسىندا ۇرپاقتار ساباقتاستىعىن ساقتاۋ ماقساتىندا «نۇر وتان» پارتياسى «جاس تۇلپار» سىيلىعىن تاعايىندادى.
كەشە جاڭا قازاقستاندىق ءپاتريوتيزمنىڭ نەگىزىن قۇرايتىن قۇندىلىقتارعا وسكەلەڭ ۇرپاقتى تاربيەلەۋدە ونەگەسىمەن كوپكە ۇلگى ەتەتىن, ەل دامۋىنا ەرەكشە ۇلەس قوسقان ءبىر توپ جاس ورەن «جاس تۇلپار» سىيلىعىمەن ماراپاتتالدى.
ولاردىڭ قاتارىندا تانىمال اكتەر, «ەلباسى جولى» كينوەپوپەياسىنىڭ باستى كەيىپكەرىن سومداعان نۇرلان ءالىمجان, «شاحمات حانشاسى» اتانعان ازيا چەمپيونى, ەكى مارتە الەم چەمپيونى, وتكەن جىلعى ماۋسىمدا قىزدار اراسىندا ەڭ جاس گروسسمەيستەر اتانعان جانسايا ابدىمالىك, الماتىدا وتكەن الەم چەمپيوناتىندا 69 كگ دەيىنگى سالماقتا توپ جارعان دانيار ەلەۋسىنوۆ بار. لوندون وليمپياداسى كەزىندە حيتقا اينالىپ, سىندارلى ساتتە پاتريوتتىق رۋح بەرىپ, سەنىم وتىن جالىنداتقان «كوك تۋدىڭ جەلبىرەگەنى» اتتى انىمەن ەلدى سۇيسىندىرگەن يبراگيم ەسكەندىر دە «جاس تۇلپار» سىيلىعىنىڭ يەگەرى اتاندى. «جاس تۇلپارلاردىڭ» بۇگىنگى وكىلىنىڭ سيپاتى دا سان قىرلى. ارتۋر سۇلەيمەنوۆتىڭ (لاقاپ اتى – Emir France) بەينەكليپتەرى عالامتوردا كەڭ تارالىپتى. ونىڭ «قازاقستان» اتتى تۋىندىسى 230 384 رەت, ال «كيەلى مەكەن» اتتى كليپى 78 359 مارتە قارالعان ەكەن.
بەلگىلى مەملەكەت جانە قوعام قايراتكەرلەرى مۇرات اۋەزوۆ, ماۋلەن اشىمباەۆ, مىرزاتاي جولداسبەكوۆ, قۋانىش سۇلتانوۆ, بەكبولات تىلەۋحان, ساياسات نۇربەك «جاس تۇلپار» سىيلىعىن تابىس ەتىپ تۇرىپ, قاراپايىم ومىردە ەرلىگىمەن ەل اۋزىندا جۇرگەن جاستارعا العىسىن ءبىلدىردى. ولاردىڭ ءبىرى – تۇرار ارتىقباەۆ پوليتسيا كاپيتانى شىمكەنت قالاسىندا ۋچاسكەلىك ينسپەكتور بولىپ ىستەيدى. ول – «ەرلىگى ءۇشىن» مەدالىنىڭ يەگەرى. ءوزىنىڭ قىزمەتتىك مىندەتىن ورىنداۋ ۇستىندە قىلمىسكەردىڭ جولىن بوگەپ, اتىلعان وققا كەۋدەسىن توسقان ەرجۇرەك ورەن.
ەركىن بەيسەكەنوۆ اقتوبەدە ءورت ءسوندىرۋ جانە اپاتتىق-قۇتقارۋ جۇمىستارى قىزمەتىندە جۇمىس ىستەيدى. «ەرلىگى ءۇشىن» جانە ءىىى دارەجەلى «ءىىم ادال قىزمەتى ءۇشىن» مەدالدارىمەن ماراپاتتالعان. ۇستىمىزدەگى جىلدىڭ شىلدەسىندە ءتۇن ىشىندە تۇرعىن ۇيلەردىڭ بىرىندە بولعان ءورت كەزىندە ءتورت بىردەي بالانى اجال قۇرساۋىنان قۇتقارىپ قالعان باتىر ازامات.
– ءبىز ۇرپاقتار ساباقتاستىعىن ساقتاي وتىرىپ, مادەني جانە رۋحاني قۇندىلىقتارىمىزدى نىعايتىپ, مولايتۋدى ماقسات ەتەمىز. سىيلىقتىڭ «جاس تۇلپار» دەپ اتالۋىنىڭ تەرەڭ ءمانى بار, ول – 60-شى جىلدارداعى جاستاردىڭ تاۋەلسىزدىككە, جاڭا قوعام قۇرۋعا دەگەن ۇمتىلىسىنىڭ ايعاعى, – دەدى «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك.
جىلىنا ءبىر رەت تاعايىندالاتىن «جاس تۇلپار» سىيلىعى ەلىمىزدە, سونداي-اق شەت ەلدە كاسىپتىك جوعارى جەتىستىككە جەتكەن قازاقستاندىقتارعا تابىستالادى.
