كەشە س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ شاڭىراعىندا 1 جەلتوقسان تۇڭعىش پرەزيدەنت كۇنى مەرەكەسىنە وراي «جاس تۇلەك» شىعارماشىل جاستار كلۋبى مۇشەلەرىنىڭ «وتان دەپ سوعار جۇرەگىم» اتتى جيناعىنىڭ تۇساۋكەسەر ءراسىمى ءوتتى. شاراعا ۋنيۆەرسيتەت رەكتورى اقىلبەك كۇرىشباەۆ, پارلامەنت سەناتىنىڭ دەپۋتاتى نۇرلان ورازالين قاتىستى.
«نۇرسۇلتان نازارباەۆتىڭ ەرلىككە تولى ەڭبەگىن بۇگىندە تەك قانا قازاقستاندىقتار عانا ەمەس, بۇكىل ەۋرازيا كەڭىستىگىندە «نازارباەۆ فەنومەنى» دەپ ۇلگى ەتىپ ءجۇر. ويتكەنى, ن.نازارباەۆ – بۇكىلالەمدىك دەڭگەيدە كوتەرىلگەن, وزگە مەملەكەت باسشىلارى مويىنداعان, ساڭلاق ساياساتكەر, ءىرى قايراتكەر» دەدى ۋنيۆەرسيتەت باسشىسى ا.كۇرىشباەۆ قۇتتىقتاۋ سوزىندە.
«وتان دەپ سوعار جۇرەگىم» جيناعىنا باس-اياعى 35 جاس اقىن-جازۋشىلاردىڭ ءتول تۋىندىلارى ەنگىزىلگەن. شارادا وقۋ ورداسىنىڭ «جاس تۇلەك» شىعارماشىل جاستار كلۋبىنىڭ مۇشەلەرى وزدەرىنىڭ تىرناقالدى تۋىندىلارىن وقىدى. جاستاردىڭ سۇرانىسىنا سايكەس اتالمىش جىر جيناقتىڭ ەلەكتروندى نۇسقاسى جاسالىپ, كورمەگە قويىلدى. سونىمەن قاتار, ساۋلەت ونەرى فاكۋلتەتىنىڭ ستۋدەنتتەرى «وتانىم ساعان ارنالادى» اتتى سۋرەت كورمەسىن ۇيىمداستىردى.
كەش سوڭى «شابىت» ۇلت اسپاپتار وركەسترى مەن «شاتتىق» ۇلتتىق بي ءانسامبلىنىڭ مەرەكەلىك كونتسەرتىنە ۇلاستى.
