ق.قۋانىشباەۆ اتىنداعى قازاق مەملەكەتتىك اكادەميالىق مۋزىكالىق دراما تەاترىندا ي. شتراۋستىڭ «جۇبايلار جۇمباعى» (جارقانات») مۋزىكالىق كومەدياسىنىڭ پرەمەراسى ءوتتى. كلاسسيكالىق شىعارمانى قازاق تىلىنە ەسىم سەگىزباەۆ اۋدارعان. قويۋشى رەجيسسەرى – قازاقستاننىڭ ەڭبەك سىڭىرگەن قايراتكەرى نۇرلان جۇمانيازوۆ.
اتالمىش قويىلىم قاللەكي تەاترىنىڭ ەسكى ساحناسىندا العاش رەت 2010 جىلى قويىلدى. ارادا ۋاقىت وتكەندە رەپەرتۋاردان ءتۇسىپ قالدى. جاڭا تەاترعا كوشكەندە كورەرمەندەردىڭ سۇراۋىمەن كەڭ ساحنادا قايتادان جاڭعىردى.
سپەكتاكلدە ادەتتەگىدەي قوس قۇرام وينايدى. ونىڭ العاشقىسىنا قازاقستاننىڭ ەڭبەك سىڭىرگەن قايراتكەرلەرى نۇركەن وتەۋىل, اينۇر بەرمۇحامبەتوۆا, قۋاندىق قىستىقباي, ەرجان نۇرىمبەت, جانىبەك مۇساەۆ سىندى ەلگە تانىمال, تاجىريبەلى اكتەرلەر تارتىلسا, ەكىنشىسىندە «دارىن» مەملەكەتتىك جاستار سىيلىعىنىڭ لاۋرەاتى جاسۇلان ەربولات, جاس اكتريسا اقجان قۇرماشەۆا, قازاقستان جاستار وداعى «سەرپەر» سىيلىعىنىڭ لاۋرەاتى شاح-مۇرات ورداباەۆ, ساعىنىش نۇرقايداروۆا, ءانۋار بەكتاس, ۇلان قابىل, ءبىرجان ءجۇنىسوۆ, بەكارىس شالقار سىندى جاس اكتەرلەر ونەر كورسەتەدى.
قويىلىمنىڭ جارقىراپ كورىنۋىنە قويۋشى-سۋرەتشى قانات ماقسۇتوۆ, كيىم سۋرەتشىسى شىنار ەلەمباەۆا, حورمەيستەر ەرجان سانسىزباەۆ, حورەوگراف سالتانات جولىمباەۆا, سيمفونيالىق وركەستردىڭ باس ديريجەرى, مادەنيەت سالاسىنىڭ ۇزدىگى ەرلان بەيسەمباەۆ, ۆوكال شەبەرى – قازاقستاننىڭ حالىق ءارتىسى حورلان قاليلامبەكوۆا, كونتسەرتمەيستەر تاتيانا رازۆينا اتسالىستى. ولاردىڭ ەڭبەكتەرىن دە اتاپ ءوتۋ كەرەك. ويناقى كومەديادا ءان دە, بي دە مول. دەكوراتسيا دا كوزدىڭ جاۋىن الادى.
