بۇگىن Nur Otan پارتياسى نۇر-سۇلتان قالالىق فيليالى ساياسي كەڭەسىنىڭ كەڭەيتىلگەن وتىرىسى ءوتتى. Nur Otan پارتيا جۇمىسىن جۇيەلى جاڭعىرتۋعا قاتىستى قالالىق فيليالىنىڭ ءىس-قيمىلدارىن پىسىقتاعان باسقوسۋعا پارتيا اكتيۆتەرى, پارلامەنت جانە ءماسليحات دەپۋتاتتارىمەن بىرگە ەلوردانىڭ بەلسەندى جاستارى قاتىستى.
«ەلباسىنىڭ توراعالىعىمەن وتكەن Nur Otan پارتياسى ساياسي كەڭەسىنىڭ كەڭەيتىلگەن وتىرىسىندا «سەنىم. ديالوگ. بولاشاققا نىق قادام – Nur Otan پارتياسىنىڭ 7 سەرپىنى» اتتى پارتيا جۇمىسىن ءجۇيەلى جاڭعىرتۋ باعدارلاماسى ۇسىنىلدى. بۇگىنگى وزدەرىڭىزبەن باسقوسۋدا پارتيا توراعاسى العا قويعان ورتاق مىندەتىمىزدى ايقىنداپ الماقپىز» – دەدى ەلوردا اكىمى, قالالىق پارتيا فيليالىنىڭ توراعاسى التاي كولگىنوۆ.
ەستەرىڭىزگە سالا كەتسەك, نۇرسۇلتان نازارباەۆ حالىقپەن ناقتى جۇمىس ىستەۋ قاعيداتىن ەنگىزۋدى, قارقىندى اقپاراتتىق-يدەولوگيالىق جۇمىستى ۇيىمداستىرۋدى جانە پارتيا توڭىرەگىنە جاستاردى توپتاستىرۋ ءۇشىن شارالار قابىلداۋدى ۇسىنعان بولاتىن. وسى پارتيالىق تاپسىرمانىڭ ورىندالۋى بارىسى قالاي دەگەن ماسەلەنى تاراتىپ ايتۋ ءۇشىن ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ 24 مىڭعا تارتا ەلوردالىق ستۋدەنت جاستاردىڭ جايى تۋرالى باياندادى. رەكتور ابايدىڭ 175 جىلدىعى مەرەيتويى قارساڭىندا ستۋدەنت جاستاردىڭ رۋحاني ورتالىعىنا اينالاتىن اباي مەكتەبىن اشۋدى ۇسىندى. سونىمەن بىرگە كەلەسى جىلعى ۇلى جەڭىستىڭ 75 جىلدىعىنا وراي باس قالامىزدا تىل ارداگەرلەرى اللەياسىن اشۋدى ۇسىندى. بۇل دا تىل ەڭبەككەرلەرى ءۇشىن قۇرمەت ءارى تاريحتى ەسكە سالاتىن ەسكەرتكىش بولاتىنىن ايتتى. قالالىق ءماسليحات دەپۋتاتى گايدار قاسەنوۆ ءوزىن-ءوزى باسقارۋ جۇيەسىندەگى اتقارىلعان جۇمىستارعا توقتالىپ ءوتتى. سونىمەن بىرگە ءسوز العاندار شاعىن, ورتا بيزنەس وكىلدەرى مەن بەلسەندى جاستاردىڭ جەتىستىكتەرىنە باعا بەردى.
– پارتيانىڭ باقىلاۋىندا تۇرعان ماسەلەنىڭ ءبىرى – ءبىلىم بەرۋ سالاسى. قازىر بيزنەسكە قولايلى جاعداي جاسالعاننان كەيىن ولاردىڭ الەۋمەتتىك جاۋاپكەرشىلىگى ارتىپ كەلەدى. ولاردىڭ كومەگىمەن جەكە بالاباقشالار سالىنىپ جاتىر. مەكتەپكە قاتىستى ايتساق, قازىرگى كۇندە 17 مىڭ ورىن دەفيتسيت. جىل سايىن مەكتەپتەرگە سالماق كوبەيىپ جاتىر. ون جىل بۇرىن ەلوردادا 73 مەكتەپتە 75 مىڭ وقۋشى بولسا, قازىر 111 مەكتەپتە 183 مىڭ وقۋشى ءبىلىم الىپ ءجۇر. 8 مەكتەپتە شاكىرتتەر ءۇش اۋىسىممەن وقيدى. بۇل ماسەلەنى شەشۋ ءۇشىن جىلىنا 8-10 مەكتەپ سالۋىمىز كەرەك, – دەپ اكىم ءبىلىم بەرۋ سالاسىنداعى جايتتارعا شولۋ جاسادى. وسى باسقوسۋدا قازاقستان رەسپۋبليكاسى كونستيتۋتسيا كۇنىنە وراي پارتيانىڭ بەلسەندى مۇشەلەرىنە ماراپات كورسەتىلدى.
