4 قىركۇيەكتە نۇر-سۇلتان قالاسى ءماسليحاتىندا قورشاعان ورتانى قورعاۋعا جانە تابيعاتتى پايدالانۋدى رەتتەۋگە قاتىستى قوعامدىق تىڭداۋلار وتەدى. سونىڭ قارساڭىندا دەپۋتاتتار وسى سالالاردا قالادا اتقارىلىپ وتىرعان جۇمىستارمەن تانىسۋ ماقساتىندا «استانا-كوگالداندىرۋ قۇرىلىسى» اق پەن «استانا ورمانى» جشس نىساندارىنا باردى.
العاشقى كاسىپورىن يەلىگىندە قاراعاندى تاس جولى بويىنداعى №1 تالىمباق, جىلىجايلار جانە دەندروساياباق جۇمىس ىستەپ جاتىر. دەپۋتاتتار وسىنداعى جىلىجايلاردى ارالادى. مۇندا بولمە وسىمدىكتەرى مەن قالانى كوگالداندىرۋعا تاراتىلاتىن گۇلدەر وسىرىلەدى. كۇن سۋىتقاندا بۇل وسىمدىكتەر جىلىجايعا قايتارىلادى. جالپى العاندا وسىمدىكتەردىڭ 50 ءتۇرى وتىرعىزىلىپ, باپتالادى.
«استانا-كوگالداندىرۋ قۇرىلىسى» اق باسقارما توراعاسى رۋسلان ورالوۆتىڭ ايتۋىنشا, شاھاردا كاسىپورىنعا تيەسىلى ءارتۇرلى 390 مىڭ اعاش بار. شتاتتا 750 ادام جۇمىس ىستەيدى. وسى جازدا ۇيىم پرەزيدەنتتىك ساياباقتى كۇتىپ ۇستاۋ جۇمىستارىن قولعا الدى. الايدا كۇتىمى ماسەلە تۋىنداتىپ جاتقان «اتاتۇرىك» ساياباعىنا قاتىسى جوق ەكەن. ونىڭ سەبەبى ساياباق قارايتىن بايقوڭىر اۋدانى اكىمدىگىمەن كەلىسىمشارت جاسالماعان.
جالپى, كاسىپورىن جۇمىسىنا قاتىستى بىرقاتار تۇيتكىلدەر بار ەكەن. وتكەن جىلى شاھاردى كوگالداندىرۋ جۇمىسى ۇساق لوتتارعا ءبولىندى. سوعان سايكەس تەندەردى شاعىن كومپانيالار ۇتىپ العان. ال وسى ۇيىمنىڭ ەنشىسىنە بۇل جۇمىستاردىڭ 30 پايىزى عانا قالعان. سول سەبەپتەن جۇمىسشىلار دا قىسقارىپ, كوپتەگەن تەحنيكا قازىر قاڭتارۋلى تۇر. وسىدان دا شىعار, دەپۋتاتتار بۇگىنگى كۇندەرى قالاداعى جاسىل جەلەكتى كۇتىپ ۇستاۋ ءتيىستى دەڭگەيدە ەمەس ەكەنىن ايتتى. ماسەلەن, ءماجيت شايداروۆ جاز بويى اعاشتار مەن گۇلدەر ەكى رەت قانا سۋارىلعانىن كورگەنىن جەتكىزدى. رامزيا ومىرباەۆا ساياباقتاردىڭ سۇرىقسىز جاعدايىنا نازار اۋداردى.
كاسىپورىندى قازىر باسقارىپ وتىرعان «استانا» الەۋمەتتىك-كاسىپكەرلىك كورپوراتسيا ۇيىمنىڭ باستاپقى جۇمىستارىنا 150 ملن تەڭگە بولگەن. كەلەسى جىلى تەحنيكانى جاڭارتۋعا دا قارجى بولىنبەك. «استانا-كوگالداندىرۋ قۇرىلىسىن» اكتسيونەرلىك قوعامنان جاۋاپكەرشىلىگى شەكتەۋلى سەرىكتەستىككە اۋدارۋ ءىسى دە باستالعان. كورپوراتسيا باسشىلىعىنىڭ سوزىنشە, وسىدان كەيىن ۇيىمدى باسقارۋ مەن ونىڭ جۇمىسىن ۇيلەستىرۋ جەڭىلدەيدى. الداعى ءبىر اي كولەمىندە سوعان سايكەس شتاتتىق كەستە بەكىتىلەدى.
«استانا-كوگالداندىرۋ قۇرىلىسى», «استانا ورمانى», «استانا-تازالىق» جانە «استانا-ارنايى قىزمەت كورسەتۋ بيۋروسى» سىندى ءتورت كاسىپورىن جەكەشەلەندىرۋدىڭ كەشەندى جوسپارىنا ەنگىزىلگەن بولاتىن. قالا اكىمدىگى تاراپىنان بۇل كاسىپورىنداردىڭ كوممۋنالدىق مەنشىككە قاجەتتىلىگى جايلى جوعارى جاققا بىرنەشە مارتە حات جازىلعاننان كەيىن بۇل توقتاتىلدى. ءتيىستى شەشىم ەكونوميكانى جاڭعىرتۋ جونىندەگى مەملەكەتتىك كوميسسيا وتىرىسىندا قابىلدانىپ, اتالمىش كاسىپورىندار جەكەشەلەندىرۋگە جاتاتىن ۇيىمدار تىزىمىنەن شىعارىلدى. بىراق ءبىر شارت قويىلدى. بۇل ءۇش كاسىپورىن بىرىگۋ كەرەك ەدى. بىراق ءبىز ءوز تاراپىمىزدان بۇل كۇندەرى ولاردى جەكە-جەكە قالدىرۋ جايلى ماسەلەنى قاراپ جاتىرمىز. سەبەبى بىرىكتىرۋ ءتيىمسىز بولا ما دەپ ويلايمىز» دەدى نۇر-سۇلتان قالاسى اكتيۆتەر جانە مەملەكەتتىك ساتىپ الۋ باسقارماسىنىڭ باسشىسى ەرسىن وتەباەۆ.
ەلوردانىڭ جاسىل بەلدەۋىن قالىپتاستىرۋ جۇمىستارىمەن «استانا ورمانى» جشس اينالىسىپ وتىر. ءماسليحات دەپۋتاتتارى وسى ۇيىمنىڭ قاراۋىنداعى قالا سىرتىنداعى جاسىل جەلەككە ورانعان اۋماققا باردى. كاسىپورىن تەك قانا اعاشتاردى ەگىپ, ولاردى وسىرۋمەن اينالىسپاي, بۇل جۇمىستاردى عىلىممەن ۇشتاستىرىپ وتىر. كەيىنگى كەزدە قىلقانجاپىراقتى اعاشتار وتىرعىزىلىپ جاتىر. جەر بەدەرىنە قاراي جاپىراقتى تالداردى دا ەگەدى.
«قازاقستان ورماندى وسىرۋمەن اينالىساتىن الەمدەگى جالعىز ەل دەپ ايتۋعا بولادى. ەۋروپاداعى رەسەي, تۇركيا, باسقا دا ەلدەر ورماندى قالپىنا كەلتىرۋ جۇمىستارىمەن اينالىسادى. ال ءبىز جوق جەردەن ورمان وسىرەمىز. بۇل جۇمىستا عىلىمسىز بولمايدى. سەبەبى الدىمەن جەر بەدەرىن زەرتتەۋ كەرەك. ماسەلەن, العاشقى جىلدارى ەلوردانىڭ كوپ جەرىندە ەگىلگەن اعاشتار جەرسىنبەدى. زەرتتەۋ جۇمىستارىنان كەيىن بۇل ءىس العا باستى» دەدى ءماسليحات دەپۋتاتى اقىلبەك كۇرىشباەۆ مامان رەتىندە.
«استانا ورمانى» جشس باسقارما توراعاسى ماۋلەن سامامبەتوۆتىڭ ايتۋىنشا, جاسىل بەلدەۋدى قالىپتاستىرۋ جۇمىسىنىڭ العاشقى كەزەڭى 1998 جىلى باستالىپ, 2004 جىلى اياقتالدى. وسىلايشا ءتيىستى جۇمىستار كەزەڭ-كەزەڭىمەن جۇزەگە اسىرىلىپ جاتىر. جالپى العاندا التى كەزەڭ جوسپارلانعان. قازىرگى كەزدە ءتورتىنشى كەزەڭ جۇمىستارى اتقارىلىپ وتىر. بىلتىرعا دەيىن كاسىپورىن قىرعاۋىل وسىرۋمەن دە اينالىسقان. ەندى بۇل ءىستى قايتا قولعا الماق. ۆەلوجولدار بويىنشا دا ءبىراز جوسپار بار ەكەن. كاسىپورىندى ارالاۋ كەزىندە دەپۋتاتتارعا وسىنداي جۇمىستار تانىستىرىلدى.
