بارشا ۇلت وكىلىن باۋىرىنا باسقان تۇعىرى بيىك ەلىمىز تاتۋلىق پەن كەلىسىمنىڭ ارقاسىندا تالاي بەلەستەردى باعىندىرارى ءسوزسىز. تەك سول ماقساتقا جەتۋ – تىلەگى مەن نيەتى ءبىر بەرەكەلى حالىقتىڭ ەنشىسىندە. مەملەكەتتىك ءتىلدى قۇرمەتتەۋ سول ءتىلدى جان قۇشتارلىعىمەن ۇيرەنۋدەن باستالادى.
ەلىمىزدەگى بارلىق مەملەكەتتىك مەكەمەلەردەگى قۇجات اينالىمىن قازاق ءتىلىندە جۇرگىزۋ ءىسى الدەقايدا ىلگەرىلەگەنى بالاباقشاداعى بۇلدىرشىننەن باستاپ مەملەكەتتىك قىزمەتكە جۇگىنگەن كەز كەلگەن ادامعا تانىس. بۇل باعىتتاعى جۇمىستار استانا قالاسىنىڭ ىشكى ىستەر دەپارتامەنتى مەن ونىڭ اۋماقتىق بولىمدەرىندە دە ناتيجەلى ورىندالۋدا.
وسى ورايدا نيكولاي جگۋننىڭ قاراپايىم شاڭىراعى وزگەلەرگە ۇلگى بولارلىقتاي. ول جۇبايىمەن بىرگە ىشكى ىستەر ورگاندارىندا قىزمەت ەتىپ كەلەدى.
نيكولاي جگۋن 1981 جىلى اقمولا وبلىسى قورعالجىن اۋىلىندا دۇنيەگە كەلگەن. ۇلتى بەلورۋس بولعانىمەن, جان-دۇنيەسى, مىنەز-قۇلقى قازاققا جاقىن. ىشكى ىستەر ورگاندارىنىڭ قاتارىنا 2006 جىلى كەلگەن نيكولاي ومىردە زياتكەرلىك پەن ءپاتريوتيزمدى بيىك قويادى. بۇگىندە جول-پاترۋلدىك پوليتسيا پولكىنىڭ قىزمەتكەرى, پوليتسيا ستارشيناسى.
– قازاق ءتىلىنىڭ پايداسىن كوپ كوردىم. مەملەكەتتىك ءتىلدى ەركىن مەڭگەرگەنىم ومىرىمە دە, قىزمەتىمە دە وزگەرىستەر اكەلدى. قازاق قىزىنا ۇيلەندىم. قىزمەتتە تابىسقا جەتۋىمە ىقپال ەتتى. كەلىنشەگىم ەكەۋمىزگە ءىىد تاراپىنان ءۇش بولمەلى پاتەر بەرىلدى. جۋىردا تاعى دا ءسابيلى بولاتىنىمىزعا بايلانىستى باسشىلىق ءۇيىمىزدى ءتورت بولمەلى پاتەرگە كەڭەيتىپ بەردى. يسلام جانە يلانا ەسىمدى التىنداي بالالارىمىز «اق كوگەرشىن» قازاق بالاباقشاسىنا بارادى. قازاق ءتىلىن مەڭگەرۋدى ءاربىر قازاقستاندىقتىڭ قاسيەتتى پارىزى دەپ ەسەپتەيمىن. وسى ەلدە تۇرىپ, بەيبىت ءومىر ءسۇرىپ جاتقاندىقتان كەز كەلگەن ۇلتتىڭ قازاق ءتىلىن ەركىن ۇيرەنگەنىن قالايمىن. بىرىنشىدەن, ول وتانعا دەگەن قۇرمەت. ەكىنشىدەن, ءتىلدى بىلگەننىڭ زيانى بولمايدى. كەرىسىنشە, قىزمەت بابىندا بولسىن, قوعامدىق ورتادا بولسىن, مارتەبەڭ وسەدى دەپ نىق سەنىممەن ايتا الامىن. مەنىڭ دوستارىمنىڭ ءبارى قازاقتار. قازاق مەكتەبىن بىتىرگەنمىن. اكە-شەشەم دە قازاق ءتىلىن بىلەدى, تۇسىنەدى, – دەيدى نيكولاي جگۋن.
گۇلميرا شارحانقىزى
