نۇر-سۇلتاندا ەلىمىزدىڭ بارلىق وڭىرلەرىنەن اۋىل شارۋاشىلىعى تاۋارلارىن وندىرۋشىلەردىڭ جارمەڭكەسى جالعاسۋدا. وسى دەمالىس كۇندەرى ءوز ءونىمىن ۇسىنۋ كەزەگى سولتۇستىك قازاقستان وبلىسىنا جەتتى.
ەلورداعا سولتۇستىك قازاقستان وبلىسىنىڭ بارلىق 13 وڭىرىنەن جانە پەتروپاۆل قالاسىنان مىڭ توننادان استام ءونىم اكەلىندى.
«جارمەڭكەنى سولتۇستىك قازاقستان وبلىسى وتكىزۋدە. وعان ۇزدىك اۋىل شارۋاشىلىعى تاۋارىن ءوندىرۋشى, 110-نان استام كاسىپورىن قاتىسىپ, 100-دەن استام تاۋار ءتۇرىن ۇسىندى. ءبىز نۇر-سۇلتانعا مىڭ توننادان استام ءونىم اكەلدىك. باعاسى نارىقتىق باعادان 15-20 پايىزعا تومەن» دەدى سولتۇستىك قازاقستان وبلىسى اكىمدىگى اۋىل شارۋاشىلىعى باسقارماسىنىڭ باسشىسى مەيرام جاقسىلىقۇلى.
باعالار شىنىمەن قولجەتىمدى. سيىر ەتى – 2000 تەڭگەگە, جىلقى ەتى – 2200 تەڭگەگە, قوي ەتى – 1800 تەڭگەگە, ال قۇس ەتى 850 تەڭگەگە ساتىلادى. سونداي-اق شۇجىق ونىمدەرى, باكالەيا, ءسۇت جانە كوكونىس ونىمدەرى كەڭ اسسورتيمەنتتە ۇسىنىلعان.
جاڭبىر مەن جەلگە قاراماستان, ونداعان ەلوردالىقتار تاڭەرتەڭنەن باستاپ سولتۇستىك قازاقستان وبلىسىنىڭ شارۋالارىنىڭ ونىمدەرىن الىپ جاتتى.
«ءبىز كارتوپتى 120 تەڭگەگە ساتىپ الدىق, جۇمىرتقا مەن ەت تاڭداپ الدىق. جارمەڭكە قازان ايىنىڭ سوڭىنا دەيىن جالعاساتىنىن بىلدىك جانە مۇندا ساۋدا جاساۋعا اسىقتىق» دەپ ءبولىستى ەلوردا تۇرعىنى سۆەتلانا.
مۇندا بارلىق سانيتارلىق تالاپتار ساقتالدى. كەلۋشىلەرگە ىڭعايلى بولۋ ءۇشىن اۋماقتا قوزعالىس باعىتى كورسەتىلگەن, الەۋمەتتىك قاشىقتىقتى ساقتاۋعا ارنالعان بەلگىلەر بار, تۋرنيكەتتەردە قول گيگيەناسىنا ارنالعان سانيتايزەرلەر ورناتىلعان. سونداي-اق كەلۋشىلەرگە كارانتيندىك شارالاردى, سونىڭ ىشىندە بەتپەردە رەجيمىن ساقتاۋدى ەسكە سالاتىن باننەرلەر بار.
ەلوردادا بيىل الەۋمەتتىك ماڭىزى بار ازىق-تۇلىك ونىمدەرىنىڭ باعاسىن تۇراقتاندىرۋ ماقساتىندا كوكونىستەر مەن جەمىستەردىڭ ءپىسۋ مەرزىمىن ەسكەرە وتىرىپ, 14 جارمەڭكە وتكىزۋ جوسپارلانعان. اۋىل شارۋاشىلىعى وڭىرلىك جارمەڭكەلەرىنىڭ ماۋسىمى نۇر-سۇلتاندا 31 قازانعا دەيىن جالعاسادى. 21 تامىزدان باستاپ ەلورداداعى جارمەڭكەلەردە تۇركىستان, باتىس قازاقستان, شىعىس قازاقستان, قىزىلوردا, الماتى, اتىراۋ, جامبىل, اقتوبە جانە قاراعاندى, پاۆلودار, ماڭعىستاۋ جانە قوستاناي وبلىستارىنىڭ اۋىلشارۋاشىلىق تاۋار وندىرۋشىلەرى ءوز ونىمدەرىن ۇسىندى.
https://youtu.be/YIAuaaXZVY0
