قالاداعى جامبىل جاباەۆ اتىنداعى №4 مەكتەپ-گيمنازيادا بەلگىلى جازۋشى, قازاقستاننىڭ ەڭبەك سىڭىرگەن قايراتكەرى, حالىقارالىق «الاش» ادەبي سىيلىعىنىڭ لاۋرەاتى ءشاربانۋ بەيسەنوۆامەن كەزدەسۋ بولدى.
بۇل شارانى وتكىزۋگە «قىزعالداق» قىزدار كلۋبىنىڭ جەتەكشىسى دامەش ومىربەكقىزى ۇيىتقى بولدى. جىلىلىققا تولى جۇزدەسۋدە بەلگىلى اقىن, عالىم جانات اسكەربەكقىزى ءشاربانۋ قوناقبايقىزىنىڭ ءومىر جولى مەن شىعارماشىلىعى جايىندا بايانداما جاسادى. ودان كەيىن جازۋشىنىڭ ءوزى ءسوز الىپ, «ۇلى دالا ارۋلارى» سەرياسىمەن جارىق كورگەن سۇيىنبيكە حانىم تۋرالى كوپشىلىك بىلە بەرمەيتىن تىڭ دەرەكتەردى سويلەتتى.
«مەن ۇزاق جىلدار «قازاقستان ايەلدەرى» دەگەن جۋرنالدا جۇمىس ىستەدىم. سوندا جۇرگەندە «ازاتتىق جولىندا قۇربان بولعان ارۋلار» دەگەن ايدار اشىپ, الدىمەن سۇيىنبيكە حانىم جايىندا ماتەريالدار بەردىك. سودان بەرى ول تۋرالى زەرتتەپ كەلەمىن. جانات اسكەربەكقىزى ەكەۋمىز قازان قالاسىنا بارىپ, ونداعى ۇلت زيالىلارىمەن جۇزدەسىپ, كىتاپحانالارداعى كونە كىتاپتارمەن تانىسىپ, كوپتەگەن مالىمەتتەر الىپ قايتتىق. ءسۇيىنبيكە – XIV عاسىرداعى التىن وردانىڭ ىقپالدى تۇلعاسى بولعان ءباھادۇر باتىر ەدىگە ءبيدىڭ تىكەلەي ۇرپاعى. ءبىز مۇنى شەجىرەشىلەردىڭ جازعانىنا سۇيەنىپ ايتىپ وتىرمىز. قاھارلى يۆان گروزنىيدىڭ وتارشىلدىق ساياساتىنا قارسى كۇرەسكەن. حالىققا قايىرىمدىلىعىمەن, ادىلدىگىمەن قادىرلى بولعان» دەپ جينالعاندارعا ۇلاعاتتى ءسوز ءوربىتتى. سونداي-اق, سۋرەتكەر سۇزگە حانشايىم مەن باسقا دا شىعارمالارى جايىندا اڭگىمەلەدى. وقۋشىلار ءسوز زەرگەرىنىڭ ايتقاندارىن ۇيىپ تىڭداپ, اراسىندا سۇراقتار قويىپ وتىردى.
ءبىر قىزىعى, مەن ءشاربانۋ قوناقبايقىزىن وتكەن عاسىرداعى جەتپىسىنشى جىلداردىڭ ورتاسىنان بەرى بىلەمىن. دالىرەك ايتقاندا, 1976 جىلى قورعالجىنعا ىسساپارمەن كەلىپ, ءوز قولىممەن قۇرعان اۋداندىق ۇلت اسپاپتار وركەسترى جايىندا
«مادەنيەت جانە تۇرمىس» جۋرنالىنا ماقالا جازعان ەدى. سودان بەرى دە ءبىرتالاي جىلدار ءوتتى. ەندى, مىنە, جولىمىز تاعى باس قالادا ءتۇيىستى. قىسقاسى, جازۋشىمەن بولعان كەزدەسۋ جاس وقىرماندارعا رۋحاني ءلاززات سىيلادى.
وسپان سۇلەيمەنوۆ,
قر ءبىلىم بەرۋ ءىسىنىڭ ۇزدىگى
