جۋىردا №2 ونەر مەكتەبىنىڭ ۇيىمداستىرۋىمەن «رۋحاني جاڭعىرۋ» باعدارلاماسى اياسىندا استاناداعى جالپى ءبىلىم بەرۋ مەكتەپتەرى اراسىندا IX قالالىق «اسىل مۇرا» ۇلتتىق ونەر بايقاۋى ءوتتى.
قازاق ۇلتتىق ونەر ۋنيۆەرسيتەتىنىڭ «دومبىرا» كافەدراسىنىڭ وقىتۋشىسى, پروفەسسور, قازاقستاننىڭ ەڭبەك سىڭىرگەن قايراتكەرى ورىنباي دۇيسەن قازىلار القاسى جاس تالانتتاردىڭ ونەرىنە باعا بەردى. بايقاۋعا 80 وقۋشى ءوتىنىش بەرىپ, الدىن الا ىرىكتەۋدەن ءوتتى. ال نەگىزگى بايقاۋعا 42 وقۋشى قاتىستى.
جەڭىمپازدار «ۇلتتىق اسپاپتا ورىنداۋشىلار», «ءداستۇرلى ءان» اتالىمدارى بويىنشا انىقتالىپ, ءار اتالىم كىشى, ورتا, جوعارعى توپتارعا ءبولىندى.
بايقاۋدىڭ قورىتىندىسى بويىنشا قازىلار القاسى تىلەك-ۇسىنىستارىن ءبىلدىردى. سولاردىڭ ءبىرى – ءانشى تەلمان نۇركەنوۆ: «ءان ۇيرەتۋ كەزىندە بارلىق مەكتەپتەردە قالىپتاسقان ءبىر جاتتاندى رەپەرتۋار قايتالانا بەردى. ول تىڭداعان ادامدى جالىقتىرىپ جىبەرەدى. ءبىزدىڭ ءان مۇرامىزدا عاجايىپ اندەر بار. سيرەك ورىندالاتىن, ءتىپتى مۇلدە ورىندالماي جۇرگەن اندەر قانشاما؟! جەتەكشىلەر ىزدەنىپ, بالالاردىڭ دياپازونىنا ارناپ رەپەرتۋار جاساسا, بايقاۋدىڭ باعاسى ودان سايىن ارتار ەدى» دەگەن جاقسى ۇسىنىس ايتتى. سونىمەن قاتار قازىلار القاسى بايقاۋعا قوبىز, شەرتەر, سازسىرناي, ت.ب. ۇلتتىق اسپاپتاردا وينايتىن وقۋشىلار كوبىرەك قاتىسسا, نۇر ۇستىنە نۇر بولار ەدى دەگەن تىلەكتەرىن جەتكىزدى.
