«قازاقستان – الەمدەگى ەڭ جاس مەملەكەتتىڭ ءبىرى. ازاماتتارىمىزدىڭ ورتاشا جاسى – 32 جاس. تۇرعىنداردىڭ ۇشتەن ءبىرى – جاستار» ەكەنىن مەملەكەت باسشىسى قاسىم-جومارت توقاەۆ بيىلعى جولداۋىندا اتاپ وتكەن ەدى. جاستار ساياساتىن جاڭعىرتۋ – ەلىمىزدە جۇزەگە اسىپ جاتقان ساياسي رەفورمانىڭ نەگىزگى باعىتىنىڭ ءبىرى. بۇل باستاما كوپشىلىك قولداۋىنا يە بولىپ وتىر. ويتكەنى بولاشاققا الاڭدايتىن ءاربىر سانالى ادام جاستار ساياساتىنا بەيجاي قاراماۋى كەرەك. وسى ورايدا 14 پەن 35 جاس ارالىعىنداعى ازاماتتاردىڭ الەۋمەتتەنۋى جانە رۋحاني, مادەني, ءبىلىم بەرۋ, كاسىبي جانە فيزيكالىق تۇرعىدان تولىققاندى دامۋى ءۇشىن بارلىق قاجەتتى جاعدايدى جاساۋ ماڭىزدى ءرول اتقارادى.
مەملەكەت باسشىسى قاسىم-جومارت توقاەۆ VIII سايلانعان پارلامەنتتىڭ ءبىرىنشى سەسسياسىنىڭ اشىلۋىندا سويلەگەن سوزىندە بەلسەندى جاستاردىڭ مەملەكەتتىك قىزمەتكە كەلۋىن ەرەكشە اتاعان ەدى.
«ەلىمىزدىڭ جاستارى ءاردايىم مەنىڭ ايرىقشا نازارىمدا ەكەنى بارشاعا ءمالىم. مەن بيلىككە ويى وزىق, ءبىلىمدى جاستار كەلۋى كەرەك دەپ ۇنەمى ايتامىن. وسكەلەڭ ۇرپاقتى ەل ىسىنە باۋلۋ – وتە ماڭىزدى ماسەلە. ولار قوعامعا جاڭا قۇندىلىقتار اكەلۋگە ءتيىس. سايلاۋ كەزىندە جاس كانديداتتار بىرىگىپ, ءوز توبىن قۇرعانى بەلگىلى. وسى وداقتىڭ بەلسەندى مۇشەلەرى پارلامەنتكە جانە ماسليحاتتارعا ءوتتى. وسىلايشا, وكىلدى بيلىك تارماعىنا ساياساتكەرلەردىڭ جاڭا بۋىنى كەلىپ جاتىر. جاستار مۇنى ەلىمىزدى دامىتۋعا بەرىلگەن بىرەگەي مۇمكىندىك دەپ باعالاۋى قاجەت» دەدى پرەزيدەنت.
جۇمىسسىز جاستار ازايىپ كەلەدى
رەسپۋبليكا بويىنشا جاستار قالاسىنا اينالعان قالانىڭ ءبىرى – استانا. بۇگىندە ەلوردادا 440 مىڭنان استام جاس تۇرادى. قولعا الىنعان ءار باستامادا ولاردىڭ تابىس دەڭگەيىن كوتەرۋ, نەسيە بەرۋدىڭ كەزەڭدىك جۇيەسىن ەنگىزۋ, ىسكەرلىك بەلسەندىلىگىن ارتتىرۋ, تۇرعىن جايى مەن ءبىلىم الۋ مۇمكىندىگىن كەڭەيتۋ – ماڭىزدى مىندەتتىڭ ءبىرى. باس قالا جاستارى ءۇشىن بۇل مىندەتتەردى قالالىق جاستار ساياساتى ماسەلەلەرى باسقارماسى «استانا جاستارى» جاستار رەسۋرستىق ورتالىعىمەن بىرلەسىپ ورىنداپ, مەملەكەتتىك جاستار ساياساتىن تىكەلەي جۇزەگە اسىرادى. باسقارما 14 پەن 35 جاس ارالىعىنداعى ازاماتتاردىڭ جۇمىسقا تۇرۋىنا, تسيفرلىق ساۋاتىن ارتتىرۋعا, يننوۆاتسيالىق جانە كاسىپكەرلىك قىزمەتىن جانداندىرۋعا جاردەمدەسەدى. بۇعان قوسا, جاستاردىڭ مۇددەلەرى مەن قاجەتتىلىكتەرى نەگىزىندە ءتۇرلى جوبا مەن باعدارلاما قولعا الىندى. قوعامنىڭ كوكەيكەستى ماسەلەسىنە اينالعان جاستاردىڭ جۇمىسسىزدىعى ءارتۇرلى جوبا اياسىندا جۇيەلەنىپ كەلەدى.
استانا قالاسى ستاتيستيكا دەپارتامەنتىنىڭ دەرەگىنشە, ەڭبەككە قابىلەتتى جاستار سانى – 298 مىڭ, ونىڭ ىشىندە جۇمىس ىستەيتىندەر – 286 مىڭ, جۇمىسسىزدار – 12 مىڭ. بۇل تۋرالى قالالىق كوممۋنيكاتسيالار قىزمەتىندە وتكەن بريفينگتە جاستار ساياساتى ماسەلەلەرى باسقارماسىنىڭ باسشىسى قايرات قامباروۆ ءمالىم ەتتى. باسقارما باسشىسىنىڭ ايتۋىنشا, جاستاردىڭ جۇمىسسىزدىق دەڭگەيى بىلتىرعى كەزەڭمەن سالىستىرعاندا 0,6 پايىزعا تومەندەگەن. جاستاردى جۇمىسپەن قامتۋ بويىنشا اكىمدىكپەن بىرنەشە باعدارلاما جۇزەگە اسىپ جاتىر. ونىڭ ىشىندە «جاستار پراكتيكاسى», «العاشقى جۇمىس ورنى», «ۇرپاقتار كەلىسىمشارتى» جانە ت. ب. بار.
استانا قالاسى ستاتيستيكا دەپارتامەنتىنىڭ دەرەگىنشە, ەڭبەككە قابىلەتتى جاستار سانى – 298 مىڭ, ونىڭ ىشىندە جۇمىس ىستەيتىندەر – 286 مىڭ, جۇمىسسىزدار – 12 مىڭ
ۋنيۆەرسيتەت نە كوللەدج بىتىرگەننەن كەيىن جۇمىس ورنى قانداي دا ءبىر تاجىريبە سۇرايدى. ماسەلەن, «جاستار تاجىريبەسى» باعدارلاماسى ارقىلى جۇمىسقا ورنالاسىپ, قولعا 100 مىڭ تەڭگە كولەمىندە جالاقى الۋعا بولادى. تاجىريبەڭىز جۇرەدى, سونداي-اق, بەلسەندى بولىپ, ءوزىڭىزدى كورسەتسەڭىز, سول جەردە قالۋ مۇمكىندىگى دە بار. «جاستار پراكتيكاسى» 6 ايدان 12 ايعا دەيىن جانە «العاشقى جۇمىس ورنى» 12-دەن 18 ايعا دەيىن ۇزارتىلدى. كاسىپ اشىپ, ءىسىن ورگە دومالاتامىن دەيتىندەر ءۇشىن ەڭبەك موبيلدىلىگى ورتالىعىمەن بىرلەسىپ باسقارما تاراپىنان جاس كاسىپكەرلەردى قولداۋ جانە وقىتۋ جۇمىسى جۇرگىزىلەدى. مىسالى, قازىرگى تاڭدا جاڭا بيزنەس-يدەيالاردى جۇزەگە اسىرۋعا گرانت ءبولىنىپ, شاعىن نەسيە بەرىلەدى.
جاستارعا ارنالعان بوس ورىندار جارمەڭكەسى توقسان سايىن ءوتىپ كەلەدى. وسى ۋاقىتقا دەيىن ولار جاستار سارايىندا ل.گۋميلەۆ اتىنداعى ەۇۋ-دا جانە ەسىل ۋنيۆەرسيتەتىندە ءوتتى. كەزەكتى جارمەڭكە قازاننىڭ 24-ىنە جوسپارلانعان. جاستاردىڭ جۇمىسسىزدىعىن تومەندەتۋدە اسىرەسە ەڭبەك ەتۋگە نە وقۋعا قۇلقى جوق NEET ساناتىنداعى جاستارمەن جۇيەلى جۇمىس قاجەت. ولاردىڭ سانىن مەيلىنشە ازايتۋ ماقساتىندا بىرقاتار ءىس-شارا قابىلداندى. NEET جاستارىنىڭ ۇلەسى ءىى توقسان قورىتىندىسى بويىنشا 6,1 پايىز نەمەسە 25 مىڭ ادامدى قۇرادى. بۇل ساناتتاعى جاستاردى الەۋمەتتەندىرۋ ماقساتىندا «جاس جىگەر» جوباسى ۇيىمداستىرىلادى.
تەگىن كومەك بەرەدى
استانانىڭ 4 اۋدانىندا جاستارعا قىزمەت كورسەتۋ ورتالىقتارى قىزمەت كورسەتەدى. ورتالىققا ەلوردالىق جاستار ءوزىن تولعاندىرعان ءتۇرلى ماسەلە, سۇراق بويىنشا جۇگىنە الادى. مۇندا مەملەكەتتىك تۇرعىن ءۇي باعدارلامالارى, جۇمىسقا ورنالاستىرۋ, جاستار باستامالارىن قولداۋ, ۆولونتەرلىك قىزمەت ماسەلەلەرى بويىنشا تەگىن زاڭگەرلىك جانە پسيحولوگيالىق كەڭەس بەرىلەدى. جاستارعا قىزمەت كورسەتۋ ورتالىقتارى 2021 جىلدان باستاپ جۇمىس ىستەيدى. ءىس-شارالاردىڭ نەگىزگى بولىگى مەملەكەتتىك جاستار ساياساتىنىڭ 2023-2029 جىلدارعا ارنالعان تۇجىرىمداماسىن ىسكە اسىرۋ جونىندەگى جوسپار شەڭبەرىندە وتەدى. ورتالىققا كەلىپ تۇسكەن وتىنىشتەردىڭ 90 پايىزى تۇرعىن ءۇي جانە جۇمىسقا ورنالاسۋ ماسەلەلەرىمەن بايلانىستى بولدى. 2022 جىلى مۇندا 10 مىڭعا جۋىق جاس كەڭەس العان.
ورتالىقتاردا ەلوردا اكىمدىگىنىڭ «استانا جاستارى» كمم-ءنىڭ قىزمەتكەرلەرى جاستاردىڭ بوس ۋاقىتىن ءتيىمدى وتكىزۋ بويىنشا, حالىقتى جۇمىسپەن قامتۋ ورتالىعى جۇمىسقا ورنالاستىرۋ بويىنشا جانە «وتباسى بانك» اق تۇرعىن ۇيگە قاتىستى كونسۋلتاتسيا بەرەدى. ورتالىقتاعى قىزمەتكەرلەر كاسىپتىك باعدار بەرۋ قىزمەتىن كورسەتۋمەن شەكتەلمەيدى, كەلۋشىلەر تىگىن تىگۋ, اعىلشىن ءتىلىن ۇيرەنۋ, مۋزىكالىق اسپاپتاردا ويناۋ سەكىلدى كۋرستاردان وتە الادى.
استاناداعى جاستارعا قىزمەت كورسەتۋ ورتالىقتارىنىڭ مەكەنجايى:
– ەسىل اۋدانى: قابانباي باتىر داڭعىلى, 58ب, 1-قابات;
– بايقوڭىر اۋدانى: الاش تاسجولى, 34/5, 1-قابات;
– سارىارقا اۋدانى: بەيبىتشىلىك كوشەسى, 9, 2-قابات;
– الماتى اۋدانى: ابىلاي حان داڭعىلى, 31, 2-قابات.
ودان باسقا, استانادا «جەتىم بالالار مەن اتا-اناسىنىڭ قامقورلىعىنسىز قالعان بالالارعا ارنالعان مەكەمە تۇلەكتەرىن ينتەرناتتان كەيىنگى سۇيەمەلدەۋ جانە بەيىمدەۋ» جوباسى اياسىندا كونسۋلتاتيۆتىك ورتالىق جۇمىس ىستەيدى. ورتالىق اباي داڭعىلى, 92/3 مەكەنجايىندا ورنالاسقان.
جاستار ءتۇرلى باستاما ارقىلى جۇمىسقا ورنالاسىپ قانا قويماي, زامان تالابىنا ساي سۇرانىسى بار مامان يەسى اتانا الادى. بۇل باعىتتا ەلوردادا «Joltap» جوباسى بيىلدان باستاپ قولعا الىندى. جوبا اياسىندا «بارشاعا مۇمكىندىك» اتتى 10 مودۋلدىك پۋنكت اشىلىپ, مۇندا ەلوردا تۇرعىندارى مەملەكەتتىك قولداۋ ءىس-شارالارى جانە جۇمىسقا ورنالاسۋ ماسەلەلەرى بويىنشا كەڭەس الادى. وقىتۋ تەگىن. قاتىسۋشىلارعا وقۋ اياقتالعاننان كەيىن سەرتيفيكات بەرىلەدى. تۇلەكتەردىڭ تۇيىندەمەسى «Jumys tap» Telegram بوتىندا جاريالانادى.
بۇگىندە جوبا ارقىلى 177 قاتىسۋشى «جول تاۋىپ», تارگەتولوگ, SMM, ۆيدەوگراف, ماركەتپلەيس, موبيلوگراف, گرافيكا ديزاينەرى, ۆەب-ديزاينەر (سايتتاردى ازىرلەۋ) ماماندىقتارى بويىنشا ءبىلىمىن جەتىلدىردى. سان ءتۇرلى سالانىڭ ىشىنەن جاڭا مۇمكىندىكتەر الەمىنە جول اشاتىن جانە ەڭبەك نارىعىندا ارتىقشىلىققا يە 7 تسيفرلىق داعدىنى جاستارعا ۇيرەتۋ – نەگىزگى ماقسات.
كاسىپ باستاۋعا – 1 ميلليون تەڭگە
الەۋمەتتىك جوبالار مەن بيزنەس-يدەيالاردى قارجىلاندىرۋ ارقىلى حالىقتىڭ وسال توپتارىن, NEET ساناتىنداعى جاس قازاقستاندىقتاردى قولداۋعا باعىتتالعان «Zhas Project» جوباسى رەسپۋبليكا بويىنشا باستالدى. جوبا جاستاردى قوعامداستىقتىڭ الەۋمەتتىك-ەكونوميكالىق ومىرىنە تارتۋعا جانە ناتيجەلى جۇمىسپەن قامتاماسىز ەتۋگە كومەكتەسەدى.
«Zhas Project» مادەنيەت جانە اقپارات مينيسترلىگىنىڭ جانە «ازاماتتىق باستامالاردى قولداۋ ورتالىعى» كە اق تاپسىرىسى بويىنشا ىسكە اسۋدا. 2022 جىلى بۇل جوبا الماتى, جەتىسۋ, قاراعاندى, ۇلىتاۋ, ماڭعىستاۋ, تۇركىستان وبلىستارىندا قاناتقاقتى رەجيمدە ىسكە استى. بيىل جوبا رەسپۋبليكالىق ماڭىزى بار بارلىق ءوڭىر مەن قالادا ىسكە اسۋدا. استانا قالاسىنداعى جوبانىڭ ورىنداۋشىسى – «قازاقستاندىق دامۋ قاۋىمداستىعى» زتب ۇيىمىنىڭ ءارتۇرلى باعىتتاعى 30-دان استام جوبانى ىسكە اسىرۋدا تاجىريبەسى بار. بۇل تۋرالى ەلوردانىڭ كوممۋنيكاتسيالار قىزمەتى الاڭىندا اتالمىش قوعامدىق ۇيىمنىڭ اتقارۋشى ديرەكتورى انار بيتەباەۆا مالىمدەدى.
– ەلىمىز بويىنشا «Zhas Project» جوباسى اياسىندا جاستاردان ءوتىنىم 9 قازاننان باستاپ 22 قازان ساعات 23:59-عا دەيىن قابىلدانادى. كونكۋرس شەڭبەرىندە استانا قالاسىنا 20 شاعىن گرانت بولىنەدى. ءوتىنىش بەرۋشى كونكۋرسقا قاتىسۋ ءۇشىن تەك ءبىر الەۋمەتتىك جوبانى ۇسىنا الادى, – دەيدى ا.بيتەباەۆا.
جوبا ارقىلى بيىل 280 جاس كاسىپكەر مەملەكەتتەن گرانت الۋ مۇمكىندىگىنە يە بولدى. باسىمدىق الەۋمەتتىك وسال توپتاعى جانە 18-35 جاس ارالىعىنداعى ازاماتتارعا بەرىلەدى. 1 ميلليون تەڭگە قارجى ءبىرىنشى كەزەكتە بيزنەس-جوسپار قۇرۋعا جانە كاسىپتى ساپالى تانىستىرۋعا جۇمسالادى.
