كەشە قر پرەزيدەنتى جانىنداعى ورتالىق كوممۋنيكاتسيالار قىزمەتىنىڭ بريفينگىنە قاتىسقان قورشاعان ورتانى قورعاۋ ءمينيسترى نۇرلان قاپپاروۆ «جاسىل كوپىر» سەرىكتەستىك باعدارلاماسى مەن «ەكسپو-2017» حالىقارالىق كورمەسىنە مينيسترلىكتىڭ دايىندىعى جايلى بايانداپ بەردى.
30 قىركۇيەك كۇنى اتالمىش مينيسترلىك ازيا جانە تىنىق مۇحيتى ەلدەرىنىڭ ەكونوميكالىق جانە الەۋمەتتىك كوميسسياسى مەن ەۋروپالىق ەكونوميكالىق كوميسسياسىمەن بىرلەسىپ, «جاسىل كوپىر» سەرىكتەستىك باعدارلاماسى مەن «ەكسپو-2017» بويىنشا حالىقارالىق كونفەرەنتسيانى وتكىزدى. ونىڭ قورىتىندىسىندا قازاقستان, بەلورۋسسيا, گەرمانيا, گرۋزيا, قىرعىزستان, رەسەي, موڭعوليا جانە چەرنوگوريا ەلدەرى باعدارلاما بويىنشا حارتياعا قول قويىپ, باعدارلامانى رەسمي تۇردە ىسكە قوستى. «بولاشاقتا بۇل باعدارلاماعا باسقا ەلدەردىڭ قوسىلۋى ءۇشىن جۇمىس ىستەيمىز» دەدى مينيستر.
باعدارلامانىڭ نەگىزگى باعىتى – وزىق جاسىل تەحنولوگيالاردى ترانسفەرتتەۋ مەن جاسىل ەكونوميكانى دامىتۋ سالاسىندا تاجىريبە الماسۋ. 2017 جىلى اتالمىش باعدارلاما ءوزىنىڭ شارىقتاۋ شەگىنە جەتۋى ءتيىس. ياعني, «ەكسپو» كورمەسىنىڭ ۋاقىتى كەلگەندە الەمدەگى ەڭ ۇزدىك جاسىل تەحنولوگيالار استانادا كورسەتىلەدى دەگەن بولجام بار.
«ەكسپو» كورمەسىنىڭ وزىنە كەلسەك, ەڭ الدىمەن كورمەنىڭ لوگوتيپى انىقتالدى. ول «جەل ەنەرگياسى» دەپ اتالادى. ودان كەيىن اعىمداعى جىلى ەلباسىنىڭ جارلىعىمەن بەكىتىلگەن «جاسىل ەكونوميكاعا كوشۋ» تۇجىرىمداماسىنا سايكەس جۇمىستار قولعا الىندى. كورمەنى وتكىزۋدىڭ كونستيتۋتسياسى دەۋگە تۇرارلىق «تىركەۋ قۇجاتتاماسىنىڭ» تولتىرىلۋى باستالدى. مۇندا «ەكسپوعا» ەلىمىزدىڭ دايىندىق بارىسى جازىلادى. بىرنەشە مەملەكەتتىڭ ماقۇلداۋىنان وتكەننەن كەيىن ەڭ سوڭىندا مۇنى پاريجدەگى حالىقارالىق كورمەلەر بيۋروسى ماقۇلداۋى ءتيىس. ودان بولەك «ەكسپو» جونىندە ارناۋلى زاڭ دايىندالىپ, پارلامەنت قاراۋىنا بەرىلدى.
امانعالي قالجانوۆ
