كەشە نۇر-سۇلتان قالاسىندا «جاسىل ەل» جاستار ەڭبەك جاساقتارى كەڭەسىنىڭ باسشىسى ءاليا نازارباەۆانىڭ توراعالىعىمەن كەڭەستىڭ ءىى وتىرىسى ءوتتى. شارا ۇيىمنىڭ XVII جۇمىس ماۋسىمىنىڭ جابىلۋى مەن قر تاۋەلسىزدىگىنىڭ 30 جىلدىعى اياسىندا ۇيىمداستىرىلدى.
جيىندا «جاسىل ەل» ۇيىمىنىڭ اعىمداعى جىلعى جۇمىس قورىتىندىلارى مەن الداعى جىلدىڭ ماقساتتارى تالقىلانىپ, شەشىمىن كۇتكەن تۇيتكىلدى ماسەلەلەر قارالدى.
كەڭەس توراعاسى ءاليا نازارباەۆا بيىلعى جەتىستىكتەردى اتاپ ءوتتى. ونىڭ ايتۋىنشا, 2021 جىلدىڭ 5 ساۋىرىندە وتكەن كەڭەستىڭ ءى وتىرىسىنان كەيىن ۇيىمنىڭ الدىندا شىمكەنتتەگى «جاسىل ەل» قىزمەتىن قارجىلاندىرۋ جانە «جاسىل ەلدىڭ» مەديا بويىنشا جۇمىسىن كۇشەيتۋ مىندەتى تۇردى.
«بىرىنشىدەن, اتقارىلعان جۇمىستار ءۇشىن ايماقتىق شتابتارعا العىس ايتقىم كەلەدى. كەڭەستىڭ ءبىرىنشى وتىرىسىنىڭ قورىتىندىسى بويىنشا شىمكەنت قالاسىنداعى «جاسىل ەل» شتابىنىڭ جۇمىسىنا بيۋدجەتتىك قاراجات ءبولۋ جانە ۇيىمنىڭ قىزمەتىن مەدياسالادا ناسيحاتتاۋ مىندەتتەرى العا قويىلعان بولاتىن. وسىلايشا قازىر «بالاپان» تەلەارناسىندا تابيعاتتى قورعاۋعا ارنالعان Jasyl el انيماتسيالىق فيلمدەرى كورسەتىلۋدە. بۇل ارقىلى ءبىز بالالارمەن قاتار اتا-انالارىن دا قامتيمىز. ەكىنشىدەن, جوبا بالالاردىڭ ساناسىندا ەكولوگيالىق ادەتتەردىڭ قالىپتاسۋىنا اسەر ەتەدى. بالا كەيىپكەرلەردىڭ وقيعالارىن بىرگە باستان كەشىرەدى, شەشىم تابۋدى ۇيرەنىپ, ەموتسيونالدىق ينتەللەكتەرى داميدى» دەدى ءاليا نازارباەۆا.
ءتورايىم سونداي-اق Jasyl el اتتى جاڭا اعاشتاردى ونلاين وتىرعىزۋ جوباسىنىڭ باستالعانىن اتاپ ءوتتى جانە اتالمىش جوباعا اكىمدىكتەر تاراپىنان اقپاراتتىق-ۇيىمداستىرۋشىلىق قولداۋ قاجەت ەكەنىن ايتتى. سونىمەن قاتار ءاليا نازارباەۆا كەڭەس مۇشەلەرىن, كاسىپكەرلەردى, قوعام قايراتكەرلەرىن جانە قازاقستاننىڭ ەكولوگيالىق ۇيىمدارى قاۋىمداستىعىنىڭ سەرىكتەستەرىن جوباعا قاتىسۋعا شاقىردى.
«جاسىل ەل» رەسپۋبليكالىق شتابىنىڭ جەتەكشىسى ازامات دانيار قازاقستاننىڭ تابيعاتتى قورعاۋ ۇيىمدارى قاۋىمداستىعىمەن بىرىگىپ ۇيىمداستىرعان Stopmusor الەۋمەتتىك جوباسى تۋرالى ايتىپ, وتكەن جىلى اتقارىلعان جۇمىستاردى قىسقاشا اتاپ ءوتتى.
«جاسىل ەل» جاستار ەڭبەك جاساقتارى – ەكولوگيالىق جوبالار مەن مەملەكەتتىك باعدارلامالاردى جۇزەگە اسىرۋ ارقىلى جاستاردى ماۋسىمدىق جۇمىسپەن قامتۋ, قالالار مەن ەلدى مەكەندەردى كوگالداندىرۋ جانە اباتتاندىرۋ, جاستاردى پاتريوتتىققا تاربيەلەۋمەن اينالىساتىن قوزعالىس. قوزعالىس 2005 جىلى قر تۇڭعىش پرەزيدەنتى – ەلباسى نۇرسۇلتان نازارباەۆتىڭ باستاماسىمەن قۇرىلعان.
2021 جىلى 16 جىل ىشىندە العاش رەت تابيعاتتى قورعاۋ ۇيىمدارى قاۋىمداستىعى پرەزيديۋمىنىڭ ءتورايىمى ءاليا نازارباەۆا باسقاراتىن «جاسىل ەل» جاستار ەڭبەك جاساقتارىنىڭ كەڭەسى قۇرىلدى. كەڭەس قۇرامىنا سونداي-اق قر پارلامەنتى سەناتى مەن ءماجىلىسىنىڭ دەپۋتاتتارى, قوعام قايراتكەرلەرى, ەكولوگيالىق جانە رەسپۋبليكالىق جاستار ۇيىمدارىنىڭ وكىلدەرى كىردى.
