«جاسىل ەل» جوباسى بويىنشا بيىلعى ەڭبەك ماۋسىمىندا ەلوردادا 1200 جاس جۇمىسقا ورنالاستى. ولار 11502,2 گەكتار اۋماقتى الىپ جاتقان ەلوردانىڭ جاسىل بەلدەۋىنە كۇتىم جاساۋعا قاتىستى. سونىمەن قاتار قالا ماڭىنداعى 275 350 تال مەن كوشەتتەرگە كۇتىم كورسەتۋمەن اينالىستى.
«استانا ورمانى» جشس مەكەمەسىندە جاستار 90 مىڭ تەنگە جالاقى جانە «جاسىل ەل» جوباسىنان ارنايى بولىنگەن 35 394 تەنگە سىياقى الادى. «جاسىل ەل» جوباسى اياسىندا جاستار 3 سانات بويىنشا جۇمىس ىستەيدى. اتاپ ايتقاندا, 14-17 جاس ارالىعىنداعى كوپبالالى جانە از قامتىلعان وتباسىعا جاتاتىن بالالار, 17-22 جاس ارالىعىنداعى كوللەدج, جوو ستۋدەنتتەر جانە ءۇشىنشى ەرەسەك توپ – جۇمىسسىز جاستار ساناتىنداعى 18-29 جاستاعى ازاماتتار.
كامەلەتكە تولماعاندار ساياباقتار مەن الاڭداردى تازارتۋ جۇمىستارىن جۇرگىزەدى. ولاردىڭ جۇمىس كۇنى ءتورت ساعاتتان اسپايدى. ەكىنشى ساناتتاعىلار «استانا-زەلەنستروي» جۇمىسشىلارىنا كومەكتەسسە, ءۇشىنشى ساناتتاعى ستۋدەنتتەر مەن قاتىسۋشىلار قۇرىلىس الاڭدارىندا, سونداي-اق «استانا ورمانى» كاسىپورنىندا جۇمىس ىستەدى.
سانيتارلىق قاۋىپسىزدىك تالاپتارىن ساقتاۋ ماقساتىندا جاستاردىڭ ءبىر جەرگە شوعىرلانىپ جۇمىس ىستەۋىنە جول بەرىلمەيدى. تازا اۋادا, اشىق كەڭىستىكتە 2 مەتردەن كەم ەمەس قاشىقتىق ساقتاۋ قاجەت. وسى جوباعا قاتىسۋشى جاستار مىندەتتى تۇردە بەتتۇمشا تاعىپ, قولعاپ كيىپ جۇمىس ىستەيدى.
