ەلوردادا «جۇمىسپەن قامتۋدىڭ جول كارتاسى 2020-2021» باعدارلاماسى اياسىندا جۇزدەن استام جوبانى جۇزەگە اسىرۋ جوسپارلانعان. سونىڭ ىشىندە اباتتاندىرۋ جۇمىستارى, جولدار مەن ينجەنەرلىك جەلىلەردى قالپىنا كەلتىرۋ, جاڭا جەلىلەردى تارتۋ, كوشەلەردى سالۋ, الەۋمەتتىك نىساندار قۇرىلىسى مەن ولاردىڭ كۇردەلى جوندەۋدەن وتكىزىلۋى بار. تاياۋدا نۇر-سۇلتان قالاسى ءماسليحاتىنىڭ دەپۋتاتتارى «Nur Otan» پارتياسى قالالىق فيليالى جانىنداعى پارتيالىق باقىلاۋ كوميسسياسى مۇشەلەرىمەن بىرگە سونداي جۇمىستارمەن تانىستى.
كوللەدج جاتاقحاناسى سۇرىلەدى
– باستى ماقساتىمىز بيۋدجەت قارجىسىنىڭ جۇمسالۋى مەن اتقارىلىپ جاتقان جۇمىستاردىڭ ساپاسىن قاداعالاۋ, نىسانداردا جاڭا جۇمىس ورىندارىن قۇرۋ كورسەتكىشىمەن تانىسۋ بولدى, – دەيدى ءماسليحات دەپۋتاتى ميراس شەكەنوۆ.
اتالمىش توپ, نەگىزىنەن, ءبىلىم بەرۋ نىساندارىن ارالادى. الدىمەن كوميسسيا پوليتەحنيكالىق كوللەدجگە باردى. مۇندا ستۋدەنتتەرگە ارنالعان جاتاقحاناعا كۇردەلى جوندەۋ جۇمىسى باستالىپ, ورتا جولدان توقتاتىلعان. مۇنىڭ سەبەبى جۇمىستار بارىسىندا نىسان ىرگەتاسى مەن كوتەرگىش قۇرىلىمدارىنىڭ سوگىلگەنى انىقتالدى. سوندىقتان جۇمىستى ءارى قاراي جالعاستىرماي, اپاتتى جاعدايداعى جاتاقحانانى ءسۇرۋ تۋرالى شەشىم شىعارىلدى. ستۋدەنتتەردى ورنالاستىرۋ ماسەلەسىن كوللەدج باسشىلىعى شەشتى.
مەكتەپ ماسەلەسى باقىلاۋعا الىندى
كولىك جانە كوممۋنيكاتسيا كوللەدجىن, م.وتەمىسۇلى اتىنداعى وقۋشىلار سارايىنىڭ باسسەينى مەن شاتىرىن جوندەۋ اياقتالىپ قالدى. مۇندا كوميسسيا تاراپىنان ەشقانداي ەسكەرتۋلەر ايتىلعان جوق.
ا.بايتۇرسىنۇلى اتىنداعى №48 مەكتەپ-ليتسەيدى جوندەپ جاتقان مەردىگەر ءبىراز كەمشىلىك جىبەرگەن. بىرىنشىدەن, قاجەت قوندىرعىلار ۋاقىتىلى جەتكىزىلمەگەندىكتەن, قاسبەت پەن جەلدەتۋ جۇيەسىن جوندەۋ باستالماعان. ارينە, سول سەبەپتەن نىساندى تاپسىرۋ مەرزىمى كەشەۋىلدەپ جاتىر. مەردىگەرگە سول ءۇشىن ەسكەرتۋ ايتىلدى. كوميسسيا نىساندى باقىلاۋعا الىپ, قايتا اينالىپ سوعاتىن بولدى.
«ۇركەردە» شاعىن باق اشىلادى
№37 «ارمان» بالاباقشاسى مەن №32 «بالداۋرەن» بالاباقشاسىن جوندەۋ كەستەگە ساي جۇرگىزىلىپ جاتىر. وسى ايدىڭ باسىنا قاراي ءتيىستى جۇمىستاردىڭ 70 پايىزى ورىندالدى. مەردىگەر قىركۇيەك ايىنا دەيىن بارلىق جۇمىستاردى اياقتاۋعا ۋادە بەردى.
«ۇركەر» تۇرعىن الابىندا قوعامدىق كەڭىستىكتى اباتتاندىرۋ جۇرگىزىلىپ جاتىر. «بۇل – مەنىڭ سايلاۋ ايماعىم. وسى جەردە ن.حيكمەت, ف.دوستوەۆسكي, س.قوجانۇلى كوشەلەرى كۆادراتىندا 4293 شارشى مەتر اۋماقتا جانە اقتامبەردى جىراۋ-ۇمبەتەي جىراۋ كوشەلەرىندە 10154 شارشى مەتر كەڭىستىكتە باسكەتبول, بالالار الاڭدارى سالىنىپ, ترەناجەرلەر ورناتىلادى. بۇعان قوسا, بۇل جەردە شاعىن باق بولادى. كەستەدەن قالۋ جوق. بارلىق جۇمىستار وسى جىلدىڭ 1 قازانىنا دەيىن اياقتالۋى ءتيىس» دەيدى ميراس شەكەنوۆ.
ءبىر ايتا كەتەرلىگى, «جۇمىسپەن قامتۋدىڭ جول كارتاسى 2020-2021» باعدارلاماسى اياسىندا وسى ۋاقىتتا 15 مىڭ جۇمىس ورنى قۇرىلدى. سونىڭ ىشىندە ەسىل اۋدانىندا ەكى مىڭعا جۋىق ادام جۇمىس تاپتى. «ۇركەر» تۇرعىن الابى ءدال وسى اۋدانعا قارايدى.
جاستار سارايى قاشان تاپسىرىلادى؟
مادەني نىسانداردى كۇردەلى جوندەۋ جۇمىسى ءبىراز ماسەلە تۋىنداتىپ وتىر. ماسەلەن, جاستار سارايىن جوندەۋ جوباسىنا تۇزەتۋ ەنگىزۋگە تۋرا كەلدى. سونىڭ سالدارىنان نىساندى تاپسىرۋ مەرزىمى شەگەرىلدى. قازىر جىلۋ قۇبىرىنا قوسىلۋدا پروبلەمالار بار. نەگىزى, نىسان وسى جىلدىڭ اياعىنا دەيىن تاپسىرىلۋى كەرەك ەدى. بىراق مەردىگەر وعان دەيىن ۇلگەرمەسە, بولىنگەن بيۋدجەت قارجىسى دا يگەرىلمەيدى.
جاقىندا بۇل ماسەلە قالالىق ءماسليحاتتىڭ تۇراقتى كوميسسياسىنىڭ وتىرىسىندا قارالدى. دەپۋتات رامزيا ومىرباەۆانىڭ دەرەگىنشە, نىساندى جوندەۋگە بيۋدجەتتەن 1 ميلليارد تەڭگەدەن استام قارجى ءبولىندى. بىراق جۇمىستار باياۋ ءجۇرىپ جاتىر.
– جۇمىستىڭ سىلبىرلىعىنا, نىسانعا تارتىلعان جۇمىسشىلاردىڭ سانىنا قاراعاندا, جىلدىڭ اياعىنا دەيىن ءىس بىتپەيدى. وسىعان بايلانىستى بولىنگەن قارجىنى يگەرۋ دەڭگەيىنە تالداۋ نەمەسە ونى باقىلاۋ جۇمىسى جۇرگىزىلىپ جاتىر ما؟ – دەگەن ساۋالدى جولدادى دەپۋتات.
ونىڭ ساۋالىنا جاۋاپ بەرگەن قالالىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى قايسار ماڭقاراەۆ جاستار سارايىن كۇردەلى جوندەۋگە «جۇمىسپەن قامتۋدىڭ جول كارتاسى» باعدارلاماسى اياسىندا 1,9 ميلليارد تەڭگە بولىنگەنىن جەتكىزدى. ونىڭ ايتۋىنشا, بۇل جوبانى جۇزەگە اسىرۋ بيىلعى ءساۋىر ايىندا باستالدى. سول كەزدە بيۋدجەتتەن ءتيىستى جۇمىستارعا 100 پايىز قارجى ءبولىندى. بىراق جوندەۋ بارىسىندا كەيبىر ماڭىزدى ماسەلەلەر ەسكەرىلمەگەنى انىقتالدى.
– وكىنىشكە قاراي, جوبانى جاساعان ۇيىم, تەحنيكالىق باقىلاۋ جانە مەردىگەر اراسىندا داۋلار تۋىندادى. قازىر ولار ءبىر مامىلەگە كەلدى. بىراق قارجىنى يگەرمەۋ قاۋپى تۋىنداعاندىقتان, ۆەدومستۆوارالىق كوميسسيا وتىرىسىندا 800 ميلليون تەڭگەنى شەگەرۋ تۋرالى شەشىم شىعارىلدى. قازىر 400 ميلليون تەڭگەنى يگەرۋ عانا قالدى. مادەنيەت باسقارماسى جىل اياعىنا دەيىن جوندەۋ جۇمىستارى اياقتالادى دەپ وتىر. الايدا قوسىمشا قارجىلاندىرۋ ماسەلەسى تۋىنداۋى مۇمكىن. بالكىم شەگەرىلگەن قارجىنى جوباعا قايتارۋ سوندا كەرەك بولادى, – دەيدى ق.ماڭقاراەۆ.
مادەنيەت باسقارماسى نىساندى جوندەۋگە بولىنگەن قارجىنى قايتارۋعا تۋرا كەلگەنىن راستادى. باسقارماداعىلار قا رجى يگەرىلمەي قالا ما دەپ قورىققان. الايدا بيۋدجەتتى كەزەكتى ناقتىلاۋ كەزىندە قايتادان اقشا سۇراۋدى جوسپارلاپ وتىر. سونىمەن نەگىزگى جوندەۋ جۇمىستارىن وسى جىلدىڭ سوڭىنا دەيىن اياقتاماق. نىساندى كەلەسى جىلدىڭ ناۋرىز ايىنىڭ اياعىنا دەيىن تولىعىمەن پايدالانۋعا بەرۋدى جوسپارلاپ وتىر. ءتيىستى كەستە ازىرلەنگەن.
