جاقىندا ەل استاناسىندا تابيعات توسىن مىنەز كورسەتىپ, تولاسسىز جاڭبىر جاۋعانى, ءبىر كۇندە ءبىر ايلىق كورسەتكىشتەن اسقانى, سونىڭ سالدارىنان ءبىراز كوشەنى سۋ باسىپ قالعانى جايلى گازەتىمىزگە جازىلدى. دەگەنمەن قالا اكىمدىگىنىڭ شۇعىل ءىس-قيمىلى ناتيجەسىندە 140-تان اسا تەحنيكا جۇمىلدىرىلىپ, ولقىلىقتاردىڭ ورنى تولتىرىلدى. قالا باسشىلىعى جاڭبىر سۋى اعاتىن جۇيە جەدەل قارقىنمەن سالىناتىنىن مالىمدەدى. ەكى-ءۇش جىل ىشىندە وسى باعىتتا ۇلكەن جوبالار ىسكە اسپاق. مىنە, تاعى دا جاۋىن جاۋىپ تۇر. ءبىز وسى تۇستا الەمنىڭ بىرنەشە قالاسىندا بولعان, وسىعان ۇقساس جاعدايلاردى نازارلارىڭىزعا ۇسىنۋدى ءجون كوردىك. سەبەبى تابيعات اپاتى توسىننان تۋىندايدى, وعان شاھار شارۋاشىلىعى ءار كەزدە تاس ءتۇيىن دايىن بولۋى ءتيىس.
پاريج
بيىل مامىردىڭ سوڭعى كۇنى فرانتسيا استاناسىندا تولاسسىز جاۋعان جاڭبىر سۋى بىرنەشە كوشە مەن ستانسانى الىپ كەتتى. وسىنىڭ سالدارىنان جەراستى جولى ۋاقىتشا جۇمىسىن توقتاتۋعا تۋرا كەلدى.
جەرگىلىكتى باق-تىڭ حابارلاۋىنشا, تابيعات اپاتىنان قالانىڭ وڭتۇستىك-باتىسىنداعى شاتنە-مالابري كوممۋناسىنان باس-اياعى 450 ادام قاۋىپسىز جەرگە كوشىرىلىپتى.
كيەۆ
بيىل شىلدەنىڭ 25-ىنە قاراعان ءتۇنى ۋكراينا استاناسىندا بولعان توسىن اپاتتان كوپتەگەن اۋدان سۋ استىندا قالدى. كەي كوشەلەردە ءتىپتى كولىكتەردىڭ قوزعالۋى مۇمكىن بولماعان.
ەسپلانادا كوشەسىنىڭ بويىنداعى «گۋلليۆەر» ساۋدا ورتالىعى الدىنداعى ونداعان كولىك سۋ استىندا قالدى. بۇعان قوسا, تولاسسىز جاۋىن جارناما تاقتالارىن قۇلاتىپ, ماڭايىنا زيانىن تيگىزگەن. كەيىننەن ولاردىڭ سۋدىڭ قىسىمىنان قۇلاعانى انىقتالدى. بۇعان قوسا, جەراستى جولدارىنىڭ سۋعا تولۋىنا بايلانىستى جابىلىپ قالعان.
سۋحۋم
بيىل بۇلت رەسەي جەرىنە ءۇيىرىلىپ, بار قاھارىن توككەندەي. بىرەر اپتا بۇرىن سۋحۋم قالاسىندا جاۋعان كۇشتى جاۋىننىڭ مولشەرى 180 سانتيمەترگە جەتكەن. گۋلرىپش اۋدانىنىڭ باسشىسى اسلان باراتەليانىڭ ايتۋىنشا, كاشتاك, باگماران, مەرحەۋل جانە ماچاركا تۇستارى زارداپ شەككەن. مەرحەۋلدەگى كوپىردى سۋ شايىپ كەتكەن.
ءۇندىستان, كەرالا شتاتى
ءۇندىستاننىڭ وڭتۇستىگىندە وتكەن اپتادا مۋسسوندى جاڭبىر جاۋىپ, سالدارىنان 400-دەن اسا ادام وپات بولدى. تابيعات كەرالا شتاتىنا كوبىرەك شىعىن كەلتىردى. ۋاقىتشا لاگەر الاڭىنا 700-مىڭنان اسا تۇرعىن كوشىرىلدى. جاقىندا زارداپ شەككەن اۋدانداردىڭ تاعى بىرىنەن 22 مىڭ ادام قۇتقارىلدى. جاۋىن ءبىر اپتادان كەيىن بارىپ قانا سايابىرلاعان. ايتا كەتەيىك, اتالعان شتاتتا 33 ملن ادام ءومىر سۇرەدى.
ۆولگوگراد
توسىن اپات فۋتبولدان الەم چەمپيوناتىن وتكىزگەن رەسەي ەلىن اينالىپ وتپەدى. 15 شىلدە كۇنى ۆولگوگراد قالاسىندا تابيعات كۇتپەگەن مىنەزىن كورسەتىپ, ناتيجەسىندە جەرگىلىكتى بيلىكتىڭ توتەنشە جاعداي جاريالاۋىنا تۋرا كەلدى.
كۇن رايىنىڭ كۇرت وزگەرۋىنە ۆولگوگراد قالاسى دايىن بولماي شىقتى. سەبەبى جازدىڭ العاشقى بولىگى قۇرعاق بولعاندىقتان, مۇنداي اۋا رايىن ەشكىم كۇتپەگەن بولسا كەرەك. اياقاستىنان جاۋعان جاۋىن بىرنەشە ساعات بويى توقتاماي, مولشەرى ەكى ايعا جۋىق نورمادان اسىپتى. جاۋىن سۋى قالاداعى ءىرى ساۋدا ورتالىقتارىن الىپ كەتتى. ءتىپتى كەيبىر عيماراتتاردىڭ شاتىرى شىداس بەرمەي, قيراپ قالىپتى. بۇدان بولەك, ترانسپورت توننەلدەرى سۋعا تولىپ, بەلگىلى ءبىر ۋاقىتقا دەيىن قىزمەتىن توقتاتۋىنا تۋرا كەلدى.
ال «ۆولگوگراد ارەنا» ماڭىنداعى قۇمتوبەشىكتەر شاشىلىپ, ستاديونعا بارار جولدى جاۋىپ قالعان. سول سياقتى قالانىڭ نەگىزگى ماگيسترالدى كوشەلەرىنە دە زيانى ءتيدى.
حيۋستون
تابيعاتتىڭ دۇلەي كۇشى بىلتىر قۇراما شتاتتارعا دا زيانىن تيگىزدى. تەحاس شتاتىنداعى حيۋستون قالاسىندا تامىز ايىندا بولعان «حارۆي» داۋىلىنىڭ ارتى نوسەرگە ۇلاسىپ, سالدارىنان ەكى مىڭ تۇرعىن قاۋىپسىز جەرگە كوشىرىلدى. ال تەحاس شتاتىنىڭ وزگە ايماقتارىندا جاۋىن توقتاماي جاۋىپ تۇردى. گۋبەرناتور گرەگ ەببوت حيۋستون مەن كورپۋس-كريستي قالالارىندا 50 سم جاڭبىر جاۋعانىن, قوسىمشا 40 سم تاعى جاۋى مۇمكىن ەكەنىن مالىمدەگەن. ناتيجەسىندە ايماقتا توتەنشە جاعداي ءتارتىبى قابىلداندى.
سوچي
رەسەي-حورۆاتيا ماتچىنىڭ الدىندا سوچيدە تروپيكالىق نوسەر جاۋىن جاۋىپ, قالا تۇرعىندارى مەن قوناقتارىنا ايتارلىقتاي كەدەرگى كەلتىردى. ۇلكەن كولىكتەر بەلىنە دەيىن سۋ كەشسە, جەڭىل اۆتوموبيلدەر جاڭبىر استىندا قالدى. ال سىرتتا جۇرگەن جاندارعا قولشاتىر مۇلدەم كومەكتەسپەگەن. ءبىر ساعاتتىڭ ىشىندە ايلىق كورسەتكىشكە تەڭ جاڭبىر جاۋعان.
ايان ءابدۋالي
